అక్కడ ప్లేట్ బిర్యానీ 20వేలు..! ఇందులోని ప్రత్యేకత ఏంటంటే..

నోరూరించే బిర్యానీ అంటే ఎవరికి ఇష్టం ఉండదు. ఇంట్లో చేసుకునే బిర్యానీ.. రెస్టారెంట్లో వివిధ రకాలుగా చేసే బిర్యానీకి లొట్టలేయని వారు అరుదు. అయితే.. ఈ బిర్యానీ చేసే పద్ధతులు, రెస్టారెంట్లను బట్టి బిర్యానీ ధర ఉంటుంది. ఎంత ఎక్కువ ధర అయినా ప్లేట్ బిర్యానీ 1000 రూపాయలకు మించదు. కానీ.. దుబాయిలో ఓ బిర్యానీ ధర మాత్రం రూ.19,700. మీరు చదువుతోంది నిజమే. అక్కడ ప్రత్యేకంగా తయారయ్యే ఓ బిర్యానీ ధర 20 వేలు.  ఆ బిర్యానీ పేరు ‘గోల్డ్ బిర్యానీ’. అదే ఫ్లేవర్ తో తయారు చేస్తారు కాబట్టే ఆ ధర.

దుబాయిలో ఓ భరతీయ రెస్టారెంట్ ఉంది. ‘బాంబే బరో’ అనే రెస్టారెంట్లో ‘రాయల్ గోల్డ్ బిర్యానీ’ అనే పేరుతో ఈ ప్రత్యేకమైన బిర్యానీ తయారు చేస్తారు. అక్కడి కరెన్సీ ప్రకారం ప్లేట్ బిర్యానీ 1000 దిరామ్స్. 23 కేరట్ల తినే బంగారంతో గార్నిష్ చేసి ఈ ఈ బిర్యానీకి ప్రత్యేకమైన ఫ్లేవర్ తీసుకొస్తారు. ఇదొక్కటే కాకుండా బిర్యానీలో ప్రత్యేకమైన పదార్ధాలు వేయడం వల్లే ఈ ధర. ప్రపంచవ్యాప్తంగా ప్రముఖులెందరో ఈ బిర్యానీ కోసం వస్తూంటారు. దీంతో ఈ రెస్టారెంట్ అక్కడ ఎంతో ఫేమస్. దీని ప్రత్యేకత ఏంటంటే..

ఇందులో బిర్యానీ రైస్, కీమా రైస్, వైట్ రైస్, కుంకుమపువ్వుతో ప్రత్యేకంగా తయారు చేసే రైస్ వేస్తారు. అన్నంపై కశ్మీరీ గొర్రె కబాబ్స్, రాజ్ పుత్ చికెన్ కబాబ్స్, ఓల్డ్ ఢిల్లీ కబాబ్స్, మొఘలాయి కోఫ్తా మాంసం ముక్కలను ఉంచుతారు. దీనిపై ఉడకబెట్టిన గుడ్లు, జీడిపప్పు, దానిమ్మ గింజలు, బంగాళాదుంపలు ఉంచి.. 23 కేరెట్ల తినే బంగారం అలంకరించి బిర్యానీ సిద్ధం చేస్తారు. దీనికి అదనంగా జోధ్ పురి సలాన్, బాదామీ సాస్, రైతాసు, నిహారీ సలాన్ ఇస్తారు. ఇన్ని ప్రత్యేకతలతో ఈ బిర్యానీ చేస్తారు. ప్రపంచంలో ఇదే అత్యంత ఖరీదైన బిర్యానీ అంటున్నారు నిర్వాహకులు.