క్షమించు బాలూ.. నిన్ను ఉండగానే చంపేస్తున్నాం..!

గాన గంధర్వుడు ఎస్పీ బాలసుబ్రహ్మణ్యం ఆరోగ్య పరిస్థితి అత్యంత విషమంగా మారిందని నిన్న సాయంత్రం ఓ మెడికల్‌ బులెటిన్‌ని విడుదల చేసింది, ఆయనకు వైద్య చికిత్స అందిస్తోన్న చెన్నయ్‌లోని ఓ ప్రముఖ ఆసుపత్రి. అంతే, మీడియాలో.. అందునా తెలుగు మీడియాలో.. అందునా ఓ ఎల్లో ఛానల్‌లో ఆయన్ని ముందే చంపేశారు. ‘బాలు ఇక లేరన్న సమాచారం వుంది..’ అంటూ ఓ రాజకీయ ప్రముఖుడు చేసిన వ్యాఖ్యల్ని ఉటంకిస్తూ, ‘బాలు ఇక లేరు’ అనే బ్రేకింగ్‌ న్యూస్‌ని క్వశ్చన్‌ మార్క్‌ పెట్టి ప్రచారంలోకి తీసుకొచ్చేసింది ‘యెల్లో ఛానల్‌’. నవ్విపోదురుగాక మనకేటి సిగ్గు.? అన్నట్టుంది వ్యవహారం.

గతంలోనూ పలువురు సినీ ప్రముఖుల విషయంలో ఇదే తరహా అత్యుత్సాహం తెలుగు మీడియా ప్రదర్శించింది. ఎస్పీ బాలు త్వరగా కోలుకోవాలని కోట్లాదిమంది సంగీత ప్రియులు కోరుకుంటున్నారు. సరే, ప్రాణం పోకడ అనేది దేవుడి చేతుల్లో వుంటుందనుకోండి.. అది వేరే విషయం. దాదాపు యాభై రోజులుగా ఆసుపత్రిలో అత్యంత విషమ పరిస్థితుల్లో వైద్య చికిత్స పొందుతున్న ఎస్పీ బాలు, కోలుకుని మన మధ్యకు రావాలనే కోరుకుంటున్నారు చాలామంది. ఇలాంటి తరుణంలో, ‘ఎస్పీ బాలు ఇక లేరు’ అనే వార్తని అందరికన్నా ముందే ‘బ్రేకింగ్‌’ చేసెయ్యాలనుకోవడాన్ని ఎలా అర్థం చేసుకోవాలి.?

మామూలుగా రాజకీయ వ్యభిచారం.. అని అంటాం. ఇక్కడ, మీడియా వ్యభిచారం అనాలేమో. కానీ, ఇంతకన్నా దారుణమైన పదాన్ని వెతికితే బావుంటుందేమో. ఎందుకంటే, మీడియాలో నైతిక విలువలు అంత పతన స్థాయికి పడిపోయాయి. ‘దయచేసి ఫేక్‌ న్యూస్‌ ప్రచారం చేయొద్దు..’ అంటూ బాలు అభిమానులు సోషల్‌ మీడియా వేదికగా నిన్న సాయంత్రం నుంచీ వేడుకుంటూనే వున్నారు.

కొన్నాళ్ళ క్రితం సీనియర్‌ నటుడు చంద్రమోహన్‌ని ఇలాగే తెలుగు మీడియా చంపేసింది.. కానీ, ఆయన ఆరోగ్యంగానే వున్నారు. అంతెందుకు, మొన్నటికి మొన్న సునీల్‌ విషయంలోనూ ఈ తరహా దిక్కుమాలిన ప్రచారమే జరిగింది. అయినా, ‘మరణం’ విషయంలో ఈ మీడియాకి ‘తొందర’ ఎందుకు.? వాళ్ళింట్లో చావులకీ ఇలాగే సోకాల్డ్‌ ‘మీడియా’ స్పందిస్తుందా.? ‘క్షమించు బాలూ.. నిన్ను ముందే చంపేస్తున్నాం..’ అంటూ బాలు అభిమానులు కన్నీరు మున్నీరవుతున్నారు మీడియాలో వస్తున్న దురుద్దేశ్యపూర్వక కథనాల నేపథ్యంలో.