సిగ్గు సిగ్గు: పవన్‌ కళ్యాణ్‌పై ‘పచ్చ మీడియా’ ఏడుపు.!

మూడు రాజధానుల ఎపిసోడ్‌ ‘పచ్చ మీడియా’లోని ఓ ప్రముఖ మీడియా సంస్థకి అస్సలేమాత్రం మింగుడుపడ్డంలేదు. ఇక్కడో ఆసక్తికరమైన విషయమేంటంటే, ప్రభుత్వాన్ని ప్రశ్నించాల్సింది పోయి.. పవన్‌ కళ్యాణ్‌ని ప్రశ్నిస్తోంది ‘పచ్చ మీడియా’. ఓ మీడియా సంస్థని స్థాపించి, దాంట్లోంచి బయటకు వచ్చి ‘పచ్చ మీడియా’లో మళ్ళీ చేరిన ఓ సీనియర్‌ జర్నలిస్ట్‌.. తన ‘ఊసరవెల్లి’ అవతారాన్ని బయటపెట్టేసుకున్నాడు. గతంలో మూడు రాజధానులకు మద్దతిస్తూ.. తన సొంత మీడియా ఛానల్‌లో ఉపన్యాసం దంచేసిన సదరు సీనియర్‌ జర్నలిస్టు, ఇప్పుడు మూడు రాజధానులపై భగ్గుమంటున్నాడు.. ఈ క్రమంలో ‘పవన్‌ కళ్యాణ్‌ సమాధానం చెప్పాలి..’ అంటూ బీభత్సమైన కామెడీ చేశాడు. అక్కడికేదో సదరు జర్నలిస్టుకి అమరావతిలో ఓ వెయ్యి ఎకరాలున్నట్టు.. దాన్ని ప్రభుత్వమో, పవన్‌ కళ్యాణో స్వాధీనం చేసుకున్నట్లూ ఆవేశంతో ఊగిపోయాడు.

నిజానికి, అమరావతి విషయంలో జనసేన అధినేత పవన్‌ కళ్యాణ్‌ మొదటి నుంచీ ఖచ్చితమైన అభిప్రాయంతో వున్నారు. ‘ప్రభుత్వానికి భూములు ఇచ్చే క్రమంలో ఒకటికి పదిసార్లు ఆలోచించుకోండి..’ అని రైతులకు సలహా ఇచ్చారు. ‘ప్రభుత్వాలు మారితే, ఒప్పందాలు రద్దయ్యే పరిస్థితి వుండకూడదు.. ఆ దిశగా స్పష్టత తీసుకున్నాకే భూములు ఇవ్వాలి..’ అని రైతుల్ని ఎడ్యుకేట్‌ చేసే ప్రయత్నం చేశారు. ‘ప్రభుత్వం, రైతుల త్యాగాన్ని వృధా కానీయకూడదు.. ప్రభుత్వం మారినాసరే.. ప్రభుత్వంతో రైతులు చేసుకున్న ఒప్పందాలకు చట్టబద్ధత వుండాలి..’ అని అప్పటి చంద్రబాబు ప్రభుత్వానికీ అల్టిమేటం జారీ చేశారు. అప్పట్లో కొందరు టీడీపీ మద్దతుదారులు పవన్‌ కళ్యాణ్‌పై అమరావతిలోనే రాళ్ళేశారు. ఇప్పుడు మళ్ళీ పవన్‌ కళ్యాణ్‌ మీదనే టీడీపీ దాడి షురూ అయ్యింది.

సోషల్‌ మీడియాలో నిన్న సాయంత్రం నుంచి పడ్డ ట్వీట్లు చూస్తే, అందులో మేగ్జిమమ్ ట్వీట్లు పవన్‌ కళ్యాణ్‌ మీదనే కావడం గమనార్హం. పవన్‌ కళ్యాణ్‌ నేతృత్వంలోని జనసేన పార్టీకి వున్నది ఒకే ఒక్క ఎమ్మెల్యే.. ఆ ఎమ్మెల్యే కూడా పార్టీకి దూరంగా వుంటున్నారు. పవన్‌ కళ్యాణ్‌ సమాధానం చెబితే, మూడు రాజధానులు ఆగిపోతాయా.? నవ్విపోదురుగాక మనకేటి.? అన్నట్టుంది ‘పచ్చ మీడియా.. అలాగే పచ్చ పార్టీ’ తీరు. ‘అమరావతినే రాజధానిగా కొనసాగించాలి..’ అని బీజేపీ చెబుతోంది. ‘అమరావతికి జనసేన కట్టుబడి ఉంది..’ అని జనసేన నేతలు చెబుతున్నారు. టీడీపీకి చెందిన ఉత్తరాంధ్ర ఎమ్మెల్యే మాత్రం ‘అయ్యిందేదో అయిపోయింది.. విశాఖ విషయంలో వ్యతిరేకత అనవసరం..’ అని నినదిస్తున్నారాయె. పచ్చ పార్టీనో, పచ్చ మీడియానో.. తొలుత ప్రశ్నించుకోవాల్సింది తమను తామే. ఆ తర్వాతే, ఇతరుల జోలికి వెళ్ళాల్సి వుంటుంది.