టిబి విశ్లేషణ: జగన్ ఫ్రస్ట్రేషన్ కి కారణాలేంటో తెలుసా..?

కరోనా కష్టాలు ప్రపంచమంతా ఒకలా ఉంటే ఏపీలో మాత్రం మరోలా ఉన్నాయి. భూగోళాన్ని భూచక్రంలా తిప్పుతున్న కరోనా మహమ్మారి పేరెత్తితేనే అభివృద్ధి చెందిన దేశాలు చిగురుటాకుల్లా వణికిపోతుంటే.. ఏపీ ప్రభుత్వం మాత్రం లైట్ తీసుకున్నట్లు వ్యవహరిస్తోంది. కరోనా కూడా మామూలు జ్వరమే..ఇట్ కమ్ అండ్ గో, పారాసిటమాల్ వేసుకుని బ్లీచింగ్ చల్లుకుంటే చాలన్నట్లు ముఖ్యమంత్రి జగన్ మాట్లాడుతున్న తీరు ఎవరినీ మెప్పించలేకపోతోంది.

మిగతా వాళ్ల సంగతి సరే…సొంతపార్టీ వాళ్లే తమ అధినేత తీరుచూసి అవాక్కవుతున్న పరిస్థితి. రాబోయే రోజుల్లో కరోనా, మనం కలిసి ఉండాల్సిన పరిస్థితి అన్న జగన్ చేసిన వ్యాఖ్యలు కరోనాను అరికట్టడంలో ఇక ప్రభుత్వం చేతులు ఎత్తేసిందేమో అన్నట్లు అనిపిస్తోంది. ఇది ఏ ఒక్క ప్రాంతానికో లేక రాష్ట్రానికో సంబంధించిన అంశమైతే జగన్ వ్యాఖ్యలకు జనం జేజేలు పలికేవారేమో..కానీ వాస్తవపరిస్థితులు అత్యంత భయానకంగా కనిపిస్తున్నాయి. ఇక భవిష్యత్తు అయితే పూర్తి గందగరగోళంగా కనిపిస్తోంది. ఇలాంటి పరిస్థితుల్లో జనానికి ధైర్యం కల్పించి, సామాన్యులకు భరోసా కల్పించి, వైద్య, పోలీసు సిబ్బందికి అండగా నిలబడుతూ వారి ఆత్మవిశ్వాసం పెంపొందేలా మాట్లాడాల్సిన ముఖ్యమంత్రి పై ఎక్కువ సెటైర్లే వినిపిస్తున్నాయి.

ఆయన తరచుగా చేస్తోన్న వ్యాఖ్యల వల్ల అన్న చెప్పాడు ఇది మామూలు జ్వరమేనట, భయపడాల్సిన పనే లేదట అని సీరియస్ గా నమ్మే ఆయన ఫాలోయర్స్ ఇక విచ్చలవిడిగా రోడ్లపైకి వచ్చేస్తే దాన్ని కంట్రోల్ చేయటం పోలీసులకు సాధ్యమయ్యేపనేనా..? కుటుంబాలకు దూరంగా త్యాగాలకు మారుపేరుగా నిలుస్తోన్న వైద్య సిబ్బంది చేస్తోన్న ప్రయత్నాలు ఫలిస్తాయా..? అన్న ప్రశ్నలకు సమాధానాలు కరవవుతున్నాయి.

ఇలా కరోనా కధ కంచికి చేరకుండా సశేషంలా ఓవైపు కొనసాగుతోంటే.. మరోవైపు రాజకీయాలు మాత్రం రాజీలేకుండా సాగుతూనే ఉన్నాయి. ముఖ్యమంత్రి జగన్ తీరు పట్ల టిడిపి శ్రేణులు పండగ చేస్కుంటున్నాయి. 2019 ఎన్నికల ఫలితాల నుండే కరోనాతో సంబంధం లేకుండా లాక్ డౌన్ లో ఉన్న టిడిపి లీడర్లకు జగన్ తీసుకుంటోన్న కొన్ని నిర్ణయాలు చాలా బాగా కలిసొచ్చాయి. దీంతో ప్రతిరోజూ వైసీపీ, టిడిపిల మధ్య విమర్శల యుద్ధమే నడుస్తోంది. మీ వల్ల కావట్లేదు, మా నాయకుడు చంద్రబాబైతే ఈపాటికే కరోనాను కాటికి పంపేవాడన్నట్లు మాట్లాడుతున్నారు టిడిపి నేతలు.

ఇక సీపీఐ, సీపీఎం, కాంగ్రెస్ లు సైతం వైసీపీ ప్రభుత్వ తీరుపై అవకాశం ఉన్నపుడల్లా టార్గెట్ చేస్తూనే ఉన్నాయి. ఇంకోవైపు ఆంధ్రజ్యోతి, ఈనాడు నెట్ వర్క్స్ ప్రభుత్వతీరును తమదైన శైలిలో ఎండగడుతున్నాయి. ఇదిలా ఉంటే కొంతలో కొంత జనసేన వైఖరే వైసీపీకి కొండంత ఊరటని చెప్పొచ్చు. రాజకీయాలకు తావులేదు, కరోనా నివారణకు ప్రభుత్వానికి సాయం చేద్దాం..సామాన్యులను ఆదుకునేందుకు మనవంతు సహకారం అందిద్దామని పిలుపునిచ్చిన పవన్, రెండు తెలుగురాష్ట్రాలకు భారీ విరాళమే ఇచ్చి తన పంథా ఎలాంటిదో చూపాడు.

ప్రస్తుతం ఏపీలో జరుగుతున్న పరిణామాలను ఆయన నిశితంగా గమనిస్తున్నారు. కానీ మంత్రి వెలంపల్లి లాంటి వాళ్లు పనికట్టుకుని జనసేనానిపై విమర్శులు చేస్తున్నా సంయమనం పాటించండని పవన్ ఇచ్చిన పిలుపుకు పార్టీ శ్రేణులు కూడా సైలెంట్ అయ్యారు. ఇదంతా పక్కనబెడితే ఇక సోషల్ మీడియాలో అయితే జగన్ నీ, ఇతర వైసీపీ నేతల్ని నెటిజన్లు చెడుగుడు ఆడేసుకుంటున్నారు. దీంతో జగన్ విపరీతమైన చిరాకులో ఉన్నట్లు తెలుస్తోంది. చెప్పినంత ఈజీగా దారిలోకి రాని కరోనా ఉపద్రవాన్ని అరికట్టేందుకు తమ ప్రభుత్వం అన్ని రకాలుగా శ్రమిస్తోంటే మధ్యలో ఈ పంచాయితీలేంటన్నది జగన్ బాధగా కనిపిస్తోంది.

ముఖ్యంగా నాలుగైదు నెలలుగా జరుగుతున్న పరిణామాలు ముఖ్యమంత్రికి ఏమాత్రం మింగుడుపడటం లేదు. కరకట్ట కట్టడాల తొలగింపు దగ్గర స్టార్టయిన చిరాకు ప్రభుత్వ స్కూళ్లలో ఇంగ్లీషు మీడియంలో విద్యాబోధన, రాజధాని తరలింపు, మండలి రద్దు, స్థానిక సంస్థల నిర్వహణ వంటి అంశాలతో కంటిన్యూ అవుతూ వస్తోంది. మరోవైపు హెకోర్టు నుండి తరచుగా ఎదురవుతున్న చీవాట్లు, మొట్టికాయలూ ఆయన చికాకుకు జీఎస్టీలా మారాయి.

సహజంగా తాను అనుకున్నది జరగాలనీ..తనకు ఎదురన్నది లేకుండా ఉండాలనీ జగన్ భావిస్తుంటారని ఆయన సన్నిహితులే చెబుతుంటారు. అందుకు ఉదాహరణగా తాజాగా ఎన్నికల నిర్వహణాధికారి నిమ్మగడ్డ రమేష్ ఉదంతమే మనకు కనిపిస్తోంది. కేవలం పన్నెండుగంటల్లో నిమ్మగడ్డ రమేష్ ను తొలగించటం, ఆయన స్థానంలో కనగరాజ్ ను నియమించటం, ఆయన క్వారంటైన్ సరిహద్దులు దాటుకుని వచ్చిమరీ బాధ్యతలు స్వీకరించటం రాష్ట్రంలో హాట్ టాపిక్ గా మారాయి. అయితే ఈ ఇష్యూ కూడా ఇప్పుడు కోర్టుపరిధిలోనే ఉంది. ఇలా ఓవైపు విపక్షాలు వాటి అనుకూల మీడియా, మరోవైపు కోర్టుల చివాట్లు, కార్యరూపం దాల్చని తన ఆలోచనలు..ఇంకోవైపు ముందరకాళ్లకు బంధంలా కరోనా సమస్య..ఇవన్నీ వెరసి జగన్ ఫ్రస్ట్రేషన్ ను పీక్స్ లోకి తీసుకెళ్తున్నాయి.

దీంతో ఎవరైతే తననీ, తన ప్రభుత్వాన్నీ టార్గెట్ చేస్తున్నారో వారిపై చట్టపరంగా చర్యలు తీసుకోవటానికి కూడా సిద్ధమవ్వండని తన టీమ్ కు జగన్ ఆదేశాలిస్తున్నారట. ఈ మేరకు ప్రభుత్వం, ఎల్లో మీడియా శిబిరంలో వ్యక్తులుగా భావించే కొందరిని అరెస్టు చేయొచ్చని కూడా తెలుస్తోంది. మరి ఇక్కడతో ఆయన ఆగుతారా…? లేదా ఇంకో అడుగు ముందుకేస్తారా..? అన్న సందేహాలు కూడా మీకు వచ్చి ఉంటాయి. మరి వీటన్నింటినీ దాటుకుని జగన్ ముందుకు ఎలా వెళ్తారన్న చికాకు కూడా వచ్చిందా ఏంటి కొంపదీసి..? బాబోయ్, కాలమే అన్నింటికీ సమాధానం చెబుతుందంటారు కదా..చూద్దాం ఏం జరుగుతుందో..