విశాఖను ఊరించి.. సీమకు రాజధాని తరలిస్తారా.?

విశాఖపట్నంలో హైకోర్టు బెంచ్‌.. విశాఖపట్నం అడ్మినిస్ట్రేటివ్‌ క్యాపిటల్‌.. విశాఖపట్నంలో వేసవి కాలం అసెంబ్లీ సమావేశాలు.. విశాఖపట్నంలో సీఎం క్యాంప్‌ కార్యాలయం.. అంటూ విశాఖపట్నంపై రాజధాని పేరుతో వైఎస్సార్‌ కాంగ్రెస్‌ పార్టీ నేతలు, మంత్రులు చేస్తున్న యాగీ అంతా ఇంతా కాదు.

ఉత్తరాంధ్ర వైసీపీ నేతలు ఈ విషయంలో ఓ రేంజ్‌లో అత్యుత్సాహం ప్రదర్శిస్తున్నారు. ‘విశాఖలో, కర్నూలులో, అమరావతిలో.. ఇలా మూడు రాజధానులు ఆంధ్రప్రదేశ్‌కి వుండొచ్చు..’ అని ముఖ్యమంత్రి వైఎస్‌ జగన్‌, అసెంబ్లీలో చేసిన ప్రకటనతో మొదలైన దుమారమిది. సీఎం జగన్‌ చేసిన ప్రకటన తర్వాత, ప్రభుత్వం ఏర్పాటు చేసిన కమిటీ, ఇంకో విధమైన నివేదిక ఇచ్చే ఛాన్సే వుండదు. ఇక, విశాఖ చుట్టూనే ఓ పక్క రచ్చ జరుగుతోంటే, వైఎస్సార్‌ కాంగ్రెస్‌ పార్టీకి చెందిన సీమ నేతలు, అత్యంత వ్యూహాత్మకంగా పావులు కదుపుతున్నారు.

గ్రేటర్‌ రాయలసీమ డిమాండ్‌ తెరపైకొచ్చిందంటే, దాని వెనుకాల అధికార పార్టీ నేతలు వుండరని ఎలా అనుకోగలం.? పైకి, వైసీపీ నేతలెవరూ కన్పించకపోయినా, వైసీపీ మద్దతుదారుల నుంచే ఈ వాదన గట్టిగా విన్పిస్తోంది. కర్నూలులో హైకోర్టు వద్దు, రాజధానిని కర్నూలుకి ఇచ్చేయాలంటూ కొత్త డిమాండ్‌ పుట్టుకొచ్చింది. రాజదానితోపాటు హైకోర్టు బెంచి, సీఎం కార్యాలయం, అసెంబ్లీ కూడా కర్నూలులోనే వుండాలన్నది వారి వాదన. ఎప్పుడైతే సీమ నుంచి ఈ తరహా వాదన వచ్చిందో, ఉత్తరాంధ్ర వైసీపీ నేతలు ఒక్కసారిగా షాక్‌కి గురయ్యారు.

అదే సమయంలో ప్రస్తుత రాజధాని అమరావతి ప్రాంత వైసీపీ ప్రజా ప్రతినిథులు కూడా తాజా పరిణామాలపై ఆందోళన చెందుతున్నారు. పైకి మాత్రం నీళ్ళు నములుతున్నా.. సీమ జిల్లాలకు చెందిన వైసీపీ నేతలపై, మిగతా నేతలంతా గుస్సా అవుతున్నారట. నిజానికి, ఇదేమీ అనూహ్యమైన పరిణామం కాదు. ఉత్తరాంధ్ర మీద రాజకీయ పార్టీల మమకారంలో చిత్తశుద్ధి ఏంటో చాలాకాలంగా చూస్తూనే వున్నాం. ఉమ్మడి ఆంధ్రప్రదేశ్‌లోనూ భౌగోళికంగా ఓ మూలకు విసిరివేయబడ్డట్టుండే ఉత్తరాంధ్రని, రాజకీయంగానూ ఎప్పుడో ఓ మూలకి విసిరేశారు. సో, విశాఖను ఊరించి.. సీమలో తమ వ్యూహాల్ని అధికార వైఎస్సార్సీపీ.. అత్యంత సమర్థవంతంగా అమలు చేయబోతోందన్నమాట.