వైఎస్‌ జగన్‌ దెబ్బ: కేసీఆర్‌.. ఇప్పుడేమంటారో.?

ఆర్టీసీని ప్రభుత్వంలో విలీనం చేయాలనే డిమాండ్‌తో దాదాపు 50 రోజులపాటు తెలంగాణ ఆర్టీసీ కార్మికులు సమ్మె చేపట్టారు. దురదృష్టవశాత్తూ ఆ సమ్మె సత్ఫలితాలనివ్వలేదు. పలువురు ఆర్టీసీ కార్మికులు బలవన్మరణాలకు పాల్పడ్డారు.. మరికొందరు తీవ్ర మనస్థాపానికి గురై ప్రాణాలు కోల్పోయారు. ఆర్టీసీ సమ్మె కాలంలో ప్రభుత్వం మొండికేయడంతో.. చాలా దురదృష్టకర సంఘటనలు చోటు చేసుకున్నాయి.

ఆంధ్రప్రదేశ్‌లో ప్రభుత్వం ఆర్టీసీని విలీనం చేసుకుంటోంది కదా.? అన్న ప్రశ్నకు కేసీఆర్‌ గతంలో సమాధానమిస్తూ, ‘విలీనం జరగదు.. మన్నూ జరగదు..’ అంటూ ఎద్దేవా చేశారు. అప్పుడే అసలు కథ మొదలైంది. మరింత వేగంగా విలీన ప్రక్రియను ముందుకు నడిపించింది వైఎస్‌ జగన్‌ సర్కార్‌. ఈ విలీన పక్ర్రియలో కీలకమైన అడుగు నిన్న రాష్ట్ర అసెంబ్లీలో పడింది. విలీన ప్రక్రియకు సంబంధించి శాసన సభ వేదికగా బిల్లుని ప్రవేశపెట్టింది వైఎస్‌ జగన్‌ సర్కార్‌.

జనవరి 1 నుంచి ఆర్టీసీ కార్మికులు ప్రభుత్వ ఉద్యోగులుగా పరిగణింపబడ్తారని ముఖ్యమంత్రి అసెంబ్లీలో ప్రకటించారు. దాంతో, ఆంధ్రప్రదేశ్‌ ఆర్టీసీ కార్మికుల్లో పండగ వాతావరణం నెలకొంది. అదే సమయంలో, తెలంగాణ ఆర్టీసీ కార్మికులు.. తమ సమ్మె నిర్వీర్యమైపోవడం పట్ల మరోమారు తీవ్ర ఆవేదన వ్యక్తం చేస్తున్నారు. అయితే, సమ్మె విరమించాక.. తెలంగాణ ముఖ్యమంత్రి కేసీఆర్‌ కురిపించిన వరాల జల్లుతోనే సంతృప్తి చెందాల్సిన పరిస్థితి వారిది.

ఇదిలా వుంటే, ఆర్టీసీ విలీనానికి సంబంధించి ఇంకా టెక్నికల్‌ అంశాలు చాలా వున్నాయని తెలంగాణ నుంచి వాదన విన్పిస్తోంది. ‘అలాంటి సమస్యలేవీ లేవు..’ అని ఆంధ్రప్రదేశ్‌లో అధికార వైఎస్సార్‌ కాంగ్రెస్‌ పార్టీ చెబుతోంది. చాలా విషయాల్లో కేసీఆర్‌, వైఎస్‌ జగన్‌.. ఒకర్ని ఒకరు ఫాలో అవుతున్న దరిమిలా, ఒకరికొకరు స్నేహ హస్తం అందించుకుంటున్నప్పటికీ ఈ ఆర్టీసీ విలీన అంశం మాత్రం.. ఇద్దరి మధ్యా విభేదాలకు కారణమవుతోంది.

ఇంతకీ, ఏపీలో ఆర్టీసీ విలీనంపై తెలంగాణ ముఖ్యమంత్రి కేసీఆర్‌ ఏమంటారో.! అప్పుడు తూలనాడారు.. ఇప్పుడు ఆయనకు బహుశా నోట మాట రావడం కూడా కష్టమేనేమో విలీనంపై మాట్లాడేందుకు.