పవన్‌ మరో పంచ్‌: మీ ఏడుపు మీరు ఏడవండి.!

‘నా వరకూ నేను ప్రజా సమస్యలపై నిలదీస్తూనే వుంటాను.. ఆ తర్వాత మీ ఏడుపు మీరు ఏడవండి..’ అంటూ మరోమారు వైఎస్‌ జగన్‌ ప్రభుత్వంపై జనసేన అధినేత పవన్‌ కళ్యాణ్‌ తనదైన స్టయిల్లో ‘పవర్‌ పంచ్‌’లు పేల్చారు. తనను ‘పవన్‌ నాయుడు’గా అధికార పార్టీ అభివర్ణించడాన్ని పవన్‌ కళ్యాణ్‌ పరోక్షంగా ‘ఏడుపు’తో పోల్చారు.

ఇసుక సమస్యపై రాష్ట్ర గవర్నర్‌కి నిన్న జనసేన అధినేత పవన్‌ కళ్యాణ్‌ ఫిర్యాదు చేసిన విషయం విదితమే. ఇసుక సమస్యతోపాటు, రాష్ట్రంలో తెలుగు మీడియంని రద్దు చేసి, ఆ స్థానంలో ఇంగ్లీషు మీడియంని తీసుకురావాలన్న ప్రభుత్వ ఆలోచనని తప్పు పడుతూ, ప్రెస్‌మీట్‌లో పవన్‌ కళ్యాణ్‌ ఘాటైన విమర్శలు చేశారు. తన విమర్శల్లో పవన్‌ పదే పదే ‘జగన్‌ రెడ్డి’ అని వ్యాఖ్యానించడాన్ని అధికార వైఎస్సార్‌ కాంగ్రెస్‌ పార్టీ జీర్ణించుకోలేకపోతోంది.

నిజానికి ప్రధాని నరేంద్ర మోడీ కూడా తన ప్రసంగాల్లో వైఎస్‌ జగన్‌మోహన్‌రెడ్డిని ఉద్దేశించి ‘జగన్‌ రెడ్డి’ అనే అంటుంటారు. నేషనల్‌ మీడియా సైతం, ‘జగన్‌ రెడ్డి’ అనే ప్రస్తావిస్తుంటుంది. వాళ్ళంతా జగన్‌ రెడ్డిగా సంబోదిస్తే తప్పు లేదుగానీ, పవన్‌ కళ్యాణ్‌ విషయంలోనే ఎందుకు అధికార పార్టీ అత్యుత్సాహం ప్రదర్శిస్తోందన్నది ఆసక్తికరమైన విషయమిక్కడ.

ఆ సంగతి పక్కన పెడితే, తెలుగు మీడియం రద్దు చేయాలని చూస్తే ఊరుకునే ప్రసక్తే లేదని ప్రభుత్వాన్ని మరోమారు హెచ్చరించారు పవన్‌ కళ్యాణ్‌. తెలుగు మీడియంని మంటగలపాలని చూస్తే, ఎవరైనాసరే మట్టిలో కలిసిపోవాల్సిందేనన్నారు. మొత్తమ్మీద, పవన్‌ నుంచి విమర్శల పర్వం ఇంకోసారి షురూ అయ్యింది.. అధికార పార్టీ నేతలు (మంత్రి పేర్ని నానినే ముందుంటారు) సిద్ధమయ్యారా మరి.!