సింగపూర్ పోక.. ఏపీకి లాభమా, నష్టమా?

ఏపీ రాజధాని అమరావతి అభివృద్ధి ప్రాజెక్టు నుంచి సింగపూర్ వైదొలిగింది. కొత్త ప్రభుత్వం ఈ ప్రాజెక్టు విషయంలో అంత సుముఖంగా లేనందునే తాము ఈ నిర్ణయం తీసుకున్నట్టు సింగపూర్ మంత్రి ఈశ్వరన్ ప్రకటించారు. రాజధాని ప్రాంతంలో దాదాపు 1700 ఎకరాల్లో స్టార్టప్ ఏరియాగా అభివృద్ధి చేయడం కోసం 2017లో సింగపూర్ కి చెందిన అసెండాస్ సింగ్ బ్రిడ్స్, సెంబ్ కార్ప్ ల కన్సార్టియానికి, ఏపీ ప్రభుత్వానికి మధ్య ఒప్పందం జరిగింది.

అదే ఏడాది మేలో ప్రాజెక్టు శంకుస్థాపన కూడా జరిగింది. తర్వాత భూసేకరణకు సంబంధించి తలెత్తిన సమస్యలతో ప్రాజెక్టు జాప్యం జరిగింది. ఈలోగా ఎన్నికలు జరిగి వైఎస్సార్ సీపీ ప్రభుత్వం ఏర్పడింది. జగన్ సర్కారుకు అమరావతిపై అంత సుముఖత లేకపోవడం, సింగపూర్ సంస్థలతో పని చేయడానికి ఆసక్తి లేకపోవడంతో పరస్పర అంగీకారం మేరకు ఒప్పందాన్ని రద్దు చేసుకున్నాయి. అయితే, సింగపూర్ వెళ్లిపోవడం వల్లే మనకు లాభమా లేక నష్టమా అనే అంశంపై ప్రస్తుతం చర్చ జరుగుతోంది.

సింగపూర్ కంపెనీ ఉండి ఉంటే ఆ దేశంలా మన అమరావతి కూడా వెలిగిపోయేదని, జగన్ సర్కారుకు రాజధాని అభివృద్ధిపై శ్రద్ధ లేకపోవడం వల్లే ప్రస్తుతం అక్కడ ఎలాంటి కార్యకలాపాలూ జరగడంలేదని విమర్శలు వినిపిస్తున్నాయి. జగన్ గద్దెనెక్కిన నాటినుంచి అమరావతి అటకెక్కిందని, తాజాగా సింగపూర్ కంపెనీని కూడా సాగనంపేశారని ప్రతిపక్షాలు మండిపడుతున్నాయి. ఏపీకి రాజధాని లేకుండా అమరావతిని భ్రమరావతి చేస్తున్నారని దుయ్యబడుతున్నాయి. ఇక అధికార పార్టీ వెర్షన్ మరోలా ఉంది.

సింగపూర్ కన్సార్టియంతో చేసుకున్న ఒప్పందంలో చాలా లొసుగులు ఉన్నాయని, అవన్నీ ప్రజాధనాన్ని దోచిపెట్టే విధంగా ఉన్నాయని వైఎస్సార్ సీపీ ఆరోపిస్తోంది. జగన్ వచ్చిన తర్వాత గత ప్రభుత్వ నిర్ణయాలను సమీక్షించినట్టుగానే దీనిపైనా సమీక్ష జరిపారని చెబుతున్నారు. ఈ ప్రాజెక్టు వల్ల రాష్ట్రానికి నష్టమే తప్ప లాభం లేదని స్పష్టంచేస్తున్నారు. మొత్తానికి జగన్ సర్కారు అమరావతి విషయంలో తాను అనుకున్న విధంగానే ముందుకెళ్తోందని విశ్లేషకులు అభిప్రాయపడుతున్నారు.