పవ‘నిజం’: ఆ హీరోల కోసం పవన్ అండగా నిలబడతాడు.!

నేచురల్ స్టార్ నాని హీరోగా రూపొందిన ‘టక్ జగదీష్’ సినిమా ఎందుకు ఓటీటీలో నేరుగా విడుదవ్వాల్సి వచ్చింది.? ‘శ్యామ్ సింగారాయ్’ సినిమాకి ఎందుకు ఇబ్బందులు ఆంధ్రప్రదేశ్ రాష్ట్రంలోనే వచ్చాయి.? నానికి అప్పట్లో అండగా నిలబడింది, నాని తరఫున మాట్లాడింది పవన్ కళ్యాణ్ మాత్రమే.

చాన్నాళ్ళ క్రితం, మహేష్ హీరోగా నటించిన ఓ సినిమా పైరసీ సమస్యను ఎదుర్కొంటే, పవన్ కళ్యాణ్.. మహేష్‌కి అండగా నిలబడ్డాడు. మరి, పవన్ కళ్యాణ్ కోసం ఎప్పుడైనా ఎవరైనా అండగా నిలబడ్డారా.? నిలబడరు.!

‘అఖండ’ సినిమా విషయమై పైకి బిల్డప్ కబుర్లు చెప్పిన నందమూరి బాలకృష్ణ, తెరవెనుకాల ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డికి లొంగిపోయినంత పని చేశారు. లొంగిపోయారు కూడా.! ఆ విషయం సాక్షాత్తూ మంత్రి పేర్ని నాని చెప్పకనే చెప్పేశారు.

సరే, ఇవన్నీ ఇప్పుడు ఎందుకంటే, పరిశ్రమ కోసం పవన్ నిలబడతాడు.. పవన్ కోసం పరిశ్రమలో ఎవరూ నిలబడకపోయినా.. అంటూ మెగా బ్రదర్ నాగబాబు ఓ వీడియో విడుదల చేశారు. అందులో, ‘వకీల్ సాబ్’ నుంచి ‘భీమ్లానాయక్’ వరకు ఆంధ్రప్రదేశ్ ప్రభుత్వం పవన్ కళ్యాణ్ మీద కక్ష కట్టిన వైనాన్ని చెప్పారు నాగబాబు.

‘ఇది సినీ పరిశ్రమ సమస్య.. సినిమా ఫ్లాప్ అయి వుంటే, నిర్మాత తీవ్రంగా నష్టపోయేవాడు.. చాలామందికి అన్నం పెట్టాల్సిన నిర్మాత.. సినిమాలు తీయలేని పరిస్థితి వచ్చేది.. అంతలా ఆంధ్రప్రదేశ్ ప్రభుత్వం ఇబ్బందులు పెట్టింది.. హీరోలు ఈ సందర్భంలో గొంతు విప్పాలి. దర్శకులు, నిర్మాతలు స్పందించాలి. ఒకవేళ స్పందించకపోయినా ఫర్లేదు. రేప్పొద్దున్న ఖచ్చితంగా మీకూ సమస్య వస్తుంది.. అలా వచ్చినప్పుడు మాత్రం పవన్ కళ్యాణ్ మీ కోసం గట్టిగా, బలంగా నిలబడతాడు..’ అని నాగబాబు చెప్పుకొచ్చారు.

‘ఏం, మాట్లాడితే బెదిరిస్తారా.? కక్ష సాధింపులకు దిగుతారా.? చంపేస్తారా.? భయపడుతూ ఎంతకాలమిలా.?’ అని నాగబాబు ప్రశ్నించారు. కానీ, నాగబాబు అర్థం చేసుకోవాల్సిందేంటంటే, ఆంధ్రప్రదేశ్‌లో అధికార పార్టీ కొందరి మీదనే కక్ష కట్టింది. అందులో పవన్ కళ్యాణ్ పేరే ముందుంటుంది. మిగతా హీరోలకు పెద్దగా వుండదు. బాలకృష్ణ వ్యవహారమే అందుకు నిదర్శనం.

రేప్పొద్దున్న ‘రాధేశ్యామ్’ సినిమాకి ఆంధ్రప్రదేశ్ ప్రభుత్వం ఎలాంటి ఇబ్బందులూ పెట్టదు. థియేటర్లకు పోలీసుల్ని, వీఆర్వోలనీ పంపదు. తగ్గించిన టిక్కెట్ల ధరల్ని అమలు చేయదు. ఎందుకంటే, ఆ లెక్కలు వేరే.!