5 కోట్లు.. అబ్బే, ఆయనకి అస్సలేమాత్రం సంబంధం లేదు.!

పది లక్షలో, పాతిక లక్షలో తీసుకెళుతూ పోలీసులకు దొరికితే.. ఆ తర్వాత సామాన్యుడు పడే ఇబ్బందులు అన్నీ ఇన్నీ కావు. లెక్కలన్నీ పక్కాగా చూపించాల్సి వుంటుంది. అదే, రాజకీయ నాయకుల విషయంలో అయితే పరిస్థితి ఇంకోలా వుంటుంది. అందునా, అధికార పార్టీకి చెందిన నేతల విషయంలో కోట్లు పట్టుబడినా, ‘అబ్బే.. అంతా తూచ్‌..’ అనేస్తుంటారు. తమిళనాడు సరిహద్దుల్లో రాష్ట్రంలోని అధికార పార్టీ నేతకి అత్యంత సన్నిహితుడైన వ్యక్తి నుంచి 5కోట్లు స్వాధీనం చేసుకున్నారు పోలీసులు. ఈ కేసులో వైఎస్‌ జగన్‌ మోహన్‌రెడ్డికి అత్యంత సన్నిహితుడైన వైసీపీ నేత, మంత్రి బాలినేని శ్రీనివాస్‌రెడ్డి పేరు తెరపైకొచ్చింది. మరో వైసీపీ ముఖ్య నేత అన్నా రాంబాబు పేరు కూడా ప్రచారంలోకి వచ్చింది.

అయితే, అది అక్రమ సొమ్ము కాదు.. సక్రమ సొమ్మేనని అంటున్నారు ఆరోపణలు ఎదుర్కొంటున్న వ్యక్తి నల్లమల్లి బాబు. బంగారం కొనుగోలు కోసం ఆ సొమ్ము తీసుకెళుతున్నామనీ, దానికి సంబంధించి అన్ని లెక్కలూ పక్కాగా వున్నాయని చెబుతున్నారాయన. అయితే, మంత్రి బాలినేని శ్రీనివాస్‌రెడ్డికి నల్లమల్లి బాలు అత్యంత సన్నిహితుడైన వ్యక్తి కావడం, పైగా.. మంత్రి బాలినేని శ్రీనివాస్‌రెడ్డి పేరుతో ‘అధికారిక స్టిక్కర్‌’ని జిరాక్స్‌ చేసి, వేరే వాహనానికి వాడి, దాంట్లో డబ్బుని తరలించడం పలు అనుమానాలకు తావిస్తోంది. ‘వైసీపీ నేతల దోపిడీకి ఇంతకన్నా నిదర్శనం ఇంకేం కావాలి.? దొరికింది కొంత మాత్రమే.. దొరకనిది కొండంత..’ అంటోంది ప్రతిపక్షం తెలుగుదేశం పార్టీ.

‘స్టిక్కర్ల రాజకీయం’లో వైసీపీ మాస్టర్‌ డిగ్రీ చేసేసిందనీ, ఇలాంటి దొంగ స్టిక్కర్లతో ఎన్ని వాహనాల్లో డబ్బులు తరలించేస్తున్నారోనని టీడీపీతోపాటు ఇతర విపక్షాలూ అనుమానం వ్యక్తం చేస్తున్నాయి. నిజానికి, ఇది చాలా చాలా సీరియస్‌ అంశంగానే పరిగణించాల్సి వుంటుంది. చిన్న చిన్న విషయాలకి పెద్ద పెద్ద కేసులు పెడుతున్న ఆంధ్రప్రదేశ్‌ పోలీస్‌ విభాగం, ఇంత పెద్ద మొత్తంలో డబ్బులు తరలిస్తుండడం, పైగా నకిలీ స్టిక్కర్లను వాహనాలకు అంటించి పోలీసుల కళ్ళు గప్పే ప్రయత్నం చేసిన దరిమిలా.. తెరవెనుక ‘కుట్ర’ని బయటపెట్టాల్సిందేనన్న డిమాండ్లు తెరపైకొస్తున్నాయి. కాగా, మంత్రి బాలినేని శ్రీనివాస్‌రెడ్డి, మరో వైసీపీ నేత అన్నా రాంబాబు, ఈ ఘటనతో తమకేమీ సంబంధం లేదని చెబుతున్నారు. నకిలీ స్టిక్కర్‌ ఉదంతంపై విచారణ జరగాల్సిందేనని అంటున్నారు.