ఇన్‌సైడ్‌ స్టోరీ: 2020లో పెద్ద సినిమాల రిలీజులుంటాయా.?

ఈ నెలలో సినిమా థియేటర్లు తెరుచుకునే అవకాశం లేదు. వచ్చే నెలలో పరిస్థితులు ఎలా వుంటాయో ఇప్పుడే చెప్పలేం. కానీ, జూన్‌ 8వ తేదీ నుంచి హోటళ్ళు, రెస్టారెంట్లతోపాటు, పర్యాటక ప్రాంతాలు తెరుచుకుంటాయని ఆంధ్రప్రదేశ్‌ ప్రభుత్వం చెబుతోంది. తెలంగాణలో పర్యాటకానికి సంబంధించి ఇంకా ఎలాంటి అధికారిక నిర్ణయం వెలువడలేదు.

దేశంలోని వివిధ రాష్ట్రాలు తమ పరిధిలో వున్న విషయాలకు సంబంధించి కీలక నిర్ణయాలు తీసుకుంటున్నాయి. అయితే, సినిమా థియేటర్ల విషయంలో మాత్రం సస్పెన్స్‌ అలాగే కొనసాగుతోంది. ఎలా చూసినా, ఇప్పట్లో సినిమా థియేటర్లు తెరవడం అంత క్షేమం కాదన్నది మెజార్టీ అభిప్రాయం.

అయితే, ఎక్కువ కాలం సినిమా థియేటర్ల మూసివేత కొనసాగితే, సినిమా పరిశ్రమ దారుణంగా నష్టపోతుంది. ఇప్పటికే ఆయా రాష్ట్రాల్లో ఆయా సినీ పరిశ్రమలకు సంబంధించిన పెద్దలు తమ సమస్యల్ని ప్రభుత్వాలకు విన్నవించుకుంటున్నారు. మార్చి మూడో వారం నుంచి మూగబోయిన థియేటర్లు.. ఇంకెన్నాళ్ళు మూసివేయబడి వుంటాయన్నది ఇప్పుడే చెప్పలేం.

కానీ, పెద్ద సినిమాలైతే ఇప్పట్లో విడుదలయ్యే అవకాశమే లేదంటున్నారు. బాలీవుడ్‌ నుంచి టాలీవుడ్‌ దాకా ఇదే మాట. చిన్న సినిమాలు మాత్రం.. విడుదలయ్యే అవకాశాలున్నాయట.. అదీ థియేటర్లు తెరుచుకున్న కొంత కాలం తర్వాత మాత్రమే. గతంలోనే విడుదలైన కొన్ని సినిమాల్ని మళ్ళీ రిలీజ్‌ చేసి.. థియేటర్లను కొన్నాళ్ళు రన్‌ చేస్తే.. క్రౌడ్‌ తక్కువగా వుంటుంది కాబట్టి, పరిస్థితిని అంచనా వేయడానికి వీలవుతుందన్నది నిపుణుల అభిప్రాయం.

‘ఎలాగూ కరోనాతో సహజీవనం చేయక తప్పదని ప్రభుత్వాలు చెబుతున్నాయి.. ఆ సహజీవనానికి థియేటర్లు ఎందుకు అడ్డంకిగా మారతాయి.?’ అన్న ప్రశ్న సగటు సినీ అభిమాని నుంచి వస్తుండడం గమనార్హమిక్కడ. అంతే మరి, దేవాలయాలు తెరుచుకోగా లేనిది.. పర్యాటక ప్రాంతాలు తెరుచుకోగా లేనిది.. కిక్కిరిసిపోయే ప్రజా రవాణా షురూ అవగా లేనిది.. సినిమా మాత్రం ఎందుకు మూసివేసి వుండాలట.!

కాగా, సినిమాని జస్ట్‌ ఎంటర్‌టైన్‌మెంట్‌గా చూస్తూ, దాన్నొక ప్రాధాన్యత లేని రంగంగా భావిస్తూ వుండడం వల్లే ఈ తరహా చులకన భావం చాలామందిలో వుండడమే ఈ దుస్థితికి కారణమని సినీ ప్రముఖులు వాపోతున్నారు.