వైసీపీ గేమ్ ప్లాన్‌: ‘ఆ ఎమ్మెల్యేలపై’ వేటు తప్పదా.?

యువజన శ్రామిక రైతు కాంగ్రెస్‌ పార్టీ (వైఎస్సార్సీపీ) ఎంపీ రఘురామకృష్ణరాజు వ్యవహారం, సొంత పార్టీలో కుంపటి రాజేశారంటూ ఆయన మీద లోక్‌సభ స్పీకర్‌కి ఆల్రెడీ ఫిర్యాదు చేసింది విజయసాయిరెడ్డి నేతృత్వంలోని వైసీపీ ఎంపీల బృందం. ‘మరి, టీడీపీ నుంచి లాక్కున్న ఎమ్మెల్యేల సంగతేంటి.?’ అని మీడియా ప్రశ్నిస్తే, ‘అది టీడీపీని అడగండి.. నాకు వాళ్ళవరో తెలియదు..’ అనేశారు విజయసాయిరెడ్డి. ‘మీ పార్టీ ఎంపీ.. మీకు వ్యతిరేకంగా వ్యవహరిస్తే ఆయన మీద అనర్హత వేటు తప్పదా.? అదే మీరు, ఇంకో పార్టీకి చెందిన నేతల్ని లాక్కుంటే దాని మీద నోరు మెదపరా.?’ అని వైసీపీ నేతలకు ఎడాపెడా ప్రశ్నలు ఎదురవుతున్నాయి. ఈ పరిస్థితి వైసీపీకి ఇబ్బందికరమే.

నిజానికి, టీడీపీకి చెందిన ముగ్గురు, జనసేనకు చెందిన ఓ ఎమ్మెల్యే.. వైసీపీతో టచ్‌లో వున్నారు. వాళ్ళందరితోనూ రాజీనామా చేయించి, ఉప ఎన్నికలకు వెళితే, అధికారం ఎటూ తమ చేతిలోనే వుంది గనుక.. వాళ్ళని గెలిపించుకోవడం వైసీపీకి పెద్ద కష్టమేమీ కాదు. కానీ, వైసీపీ ఆ రిస్క్‌ తీసుకోవడానికి ఇష్టపడ్డంలేదాయె. మరోపక్క, రఘురామకృష్ణరాజుపై మాత్రం అనర్హత వేటు వేయించేసి, ఉప ఎన్నికల్లో సత్తా చాటాలని వైసీపీ ఉవ్విళ్ళూరుతోంది. ఇక్కడే అధికార పార్టీకి విపక్షాల నుంచి ఘాటైన ప్రశ్నలు ఎదురవుతున్నాయి. ఈ నేపథ్యంలో టీడీపీ నుంచి వైసీపీ వైపు చూస్తోన్న ఎమ్మెల్యేలపై అనర్హత వేటు వేయిస్తే ఎలా వుంటుంది.? అన్న దిశగా వైసీపీలో సమాలోచనలు జరుగుతున్నాయట.

ఈ వ్యవహారం తెలిసి, టీడీపీని వీడిన, జనసేనకు దూరంగా వుంటోన్న ఎమ్మెల్యేలలో కొంత ఆందోళన నెలకొందట. ‘అనర్హత వేటు పడదన్న హామీ తర్వాతనే.. తాము ధైర్యంగా వైసీపీతో కలిసి తిరగగలుగుతున్నాం.. ఇప్పుడు ఇలా రివర్స్‌ గేర్‌ వేస్తే, మా భవిష్యత్తు ఏంటి.?’ అని వైసీపీ ముఖ్య నేతల వద్ద, ఆయా నేతలు మొరపెట్టుకుంటున్నారంటూ రాజకీయ వర్గాల్లో గుసగుసలు విన్పిస్తున్నాయి. ‘ఇదంతా జస్ట్‌ గేమ్ ప్లాన్‌.. రఘురామకృష్ణరాజు మాటల దాడిని తప్పించుకోవడానికి.. విపక్షాలు సంధించే ప్రశ్నలకి బదులివ్వడానికి.. ఈ గేమ్ ప్లాన్‌ తప్ప.. సొంత పార్టీకి ద్రోహం చేసిన ఆయా ఎమ్మెల్యేలపై ఎలాంటి చర్యలూ వుండవు.. వాళ్ళకి వైపీపీలో ఎలాంటి ఇబ్బందులు వుండవు..’ అంటూ వైసీపీ నుంచే సెకెండరీ లీక్స్‌ వస్తున్నాయట.