అర్జంటుగా ‘బీజేపీ – జనసేన’ మధ్య చిచ్చుపెట్టెయ్యాల్సిందే.!

బీజేపీ – వైసీపీ బంధం మీద అధికార వైసీపీ అడ్డగోలు ఆరోపణలు చేస్తోంది. ‘పాచిపోయిన లడ్డూలు కమ్మగా వున్నాయా.?’ అంటూ జనసేన అధినేతను వైసీపీ మంత్రులు ప్రశ్నించేస్తున్నారు. పవన్ కళ్యాణ్‌ని ప్రశ్నించేముందు, ‘కేంద్రంతో మాకు సన్నిహిత సంబంధాలున్నాయి..’ అని పదే పదే చెప్పుకుంటున్న వైసీపీ అధినాయకత్వం, ఢిల్లీ నుంచి ఎలాంటి లడ్డూల్ని అందుకుందో మాత్రం చెప్పలేకపోతున్నారు.

ఏ లడ్డూ దెబ్బలకి వైసీపీ పెద్దల నోళ్ళు ప్రత్యేక హోదా విషయంలో మూతబడ్డాయో చెప్పడం వైసీపీకి సాధ్యమయ్యే పని కాదు. టీడీపీ పరిస్థితీ అంతే. ఇక, తెలుగుదేశం పార్టీ తంతు ఇంకోలా వుంది. నేరుగా జనసేన – బీజేపీలను విమర్శించే పరిస్థితుల్లో లేదు టీడీపీ. అందుకే, టీడీపీ తన అను‘కుల’ మీడియాని రంగంలోకి దించింది.

‘జనసేన – బీజేపీ ఉమ్మడి ముఖ్యమంత్రి అభ్యర్థి పవన్ కళ్యాణ్ కాదట..’ అంటూ ప్రచారం షురూ అయ్యింది టీడీపీ అను‘కుల’ మీడియాలో. పవన్ కళ్యాణ్ కాకపోతే ఇంకెవరు.? ఆ ప్రశ్నకు టీడీపీ, ఆ పార్టీ అను‘కుల’ మీడియా.. అదే సమయంలో వైసీపీ, వైసీపీ అను‘కుల’ మీడియా సమాధానం చెబితే బావుంటుందేమో.

బీజేపీతో తెగతెంపులు చేసుకోవడం జనసేన అధినేత పవన్ కళ్యాణ్‌కి పెద్ద విషయం కాదు. బీజేపీతో రాసుకుపూసుకు తిరిగితే వచ్చే లాభమేంటన్నదానిపై జనసేన అధినేతకు ఓ ఖచ్చితమైన అంచనా వుండే వుంటుంది. బీజేపీతో ఉపయోగం లేదన్న అంచనాకి వస్తే, ఆ పార్టీతో తెగతెంపులు చేసుకోవడంజనసేన కి చిటికె వేసినంత పని.

బీజేపీ విషయానికొస్తే, ఏపీలో బలపడాలనే ఆలోచనతో పవన్ కళ్యాణ్‌ని ముందు పెట్టి రాజకీయం చేస్తోంది. పవన్ కళ్యాణ్‌ని ముఖ్యమంత్రి అభ్యర్థిగా కూడా ప్రకటించేసింది. జాతీయ స్థాయి నేతలూ ఈ విషయాన్ని కుండబద్దలుగొట్టేశారు. పవన్ కాకపోతే ఇంకెవరు.? అన్న ప్రశ్నకు బీజేపీ వద్ద సమాధానం లేనప్పుడు, పవన్ కళ్యాణ్ విషయంలో బీజేపీ రిస్క్ తీసుకునే అవకాశమే లేదు కదా.!

ఇవన్నీ టీడీపీ, వైసీపీ.. ఆయా పార్టీల అనుకూల మీడియా సంస్థలకి తెలియనివేమీ కావు. కానీ, అర్జంటుగా బీజేపీ – జనసేన మధ్య చిచ్చపెట్టెయ్యాలన్న కక్కుర్తితో ఏవేవో చెత్త ప్రచారాలు తెరపైకి తెస్తున్నారంతే.