ఈ అప్పుల భారం మోయాల్సింది ఎవరు జగనన్నా.?

‘సంక్షేమ పథకాల ద్వారా నేరుగా జనం చేతికే సొమ్ములు అందిస్తున్నాం.. వేల కోట్లు, లక్షల కోట్లు ఇచ్చేస్తున్నాం..’ అంటోంది వైఎస్ జగన్ సర్కారు. ప్రతి పథకానికీ జగనన్న పేరు లేదంటే వైఎస్సార్ పేరు.. ఇవి తప్ప ఇంకో పేరు వుంటే ఒట్టు.!

పేర్లు జగన్ మోహన్ రెడ్డి, వైఎస్ రాజశేఖర్ రెడ్డివి.. కానీ, ఆ సంక్షేమ పథకాల కోసం జరిగే అప్పులు తీర్చాల్సింది మాత్రం జనమే. జనమే తీసుకుంటున్నారు కాబట్టి, ఆ జనమే ఆ అప్పులు తీర్చాలి.. అదీ వడ్డీతో సహా. ఎవరు అధికారంలో వున్నా ఇదే తంతు.

ప్రజలు అధికారమిచ్చేది అధికార పీఠమెక్కి అప్పులు చేసి, తద్వారా తమ సొంత ఇమేజ్ పెంచుకోవడానికి కాదని రాజకీయ పార్టీలకు, రాజకీయ నాయకులకు ఎప్పుడు అర్థమవుతుంది.? మా మీద అప్పుల భారం మోపుతూ మీ సొంత పేర్లతో సంక్షేమ పథకాలేంటి.? అని జనం ఎందుకు నిలదీయరు.? అదే మరి మ్యాజిక్ అంటే.

దాదాపు లక్ష కోట్లకు సంబంధించి రాష్ట్ర ప్రభుత్వం లెక్కలు సరిగ్గా చూపెట్టలేదనీ, బడ్జెట్‌లోనూ పేర్కొనలేదనీ ‘కాగ్’ నిలదీస్తోంది. ప్రతిపక్షంలో వున్నప్పుడేమో ‘కాగ్’ ఎంతో గొప్పదంటూ, అప్పటి అధికార పక్షాన్ని వైసీపీ నిలదీసిందాయె. ఇప్పుడేమో, ఆ కాగ్ ప్రశ్నలకు అసలు సమాధానమే చెప్పడంలేదు.

వైసీపీ అధికారంలోకి వచ్చాక రికార్డు స్థాయిలో అప్పులు జరిగాయ్. నిజానికి, ఈ అప్పులన్నీ భవిష్యత్ తరాలపై భారమే. మద్యం పేరుతో అప్పులు, ఇంకో పేరుతో అప్పులు. ఏళ్ళ తరబడి రాష్ట్ర ప్రజల జీవితాల్ని ఈ అప్పులకి బానిసత్వమే అన్నట్టుగా మార్చేస్తూ.. అద్భుతమైన పాలన అందించేస్తున్నామంటే అంతకన్నా హాస్యాస్పదం ఇంకేముంటుంది.?

ఇన్ని వేల కోట్లు, లక్షల కోట్లు అప్పులు చేస్తున్నారుగానీ, రాష్ట్రానికి రాజధాని లేదాయె. అంతెందుకు గుంతల రోడ్లకు సరిగ్గా మరమ్మత్తులూ జరగడంలేదు. ఇదీ జగనన్న మార్కు పాలన.