జగన్‌ సర్కార్‌ వర్సెస్‌ ఎస్‌ఈసీ: నిమ్మగడ్డ కోర్టు ధిక్కరణ పిటిషన్‌.!

ఆంధ్రప్రదేశ్‌లో వైఎస్‌ జగన్‌ ప్రభుత్వానికీ, రాష్ట్ర ఎన్నికల సంఘానికీ మధ్య ‘గ్యాప్‌’ పెరిగిపోతూ వస్తోంది. రాష్ట్ర ఎన్నికల కమిషనర్‌ నిమ్మగడ్డ రమేష్‌కుమార్‌ ఆ పదవిలో వున్నంతవరకూ స్థానిక ఎన్నికలు జరగనీయకూడదన్న పట్టుదలతో వుంది వైఎస్‌ జగన్‌ సర్కార్‌. ఈ క్రమంలో చాలా కుంటి సాకుల్ని తెరపైకి తెస్తోంది ఆంధ్రప్రదేశ్‌ ప్రభుత్వం.

మరోపక్క, ఎస్‌ఈసీ నిమ్మగడ్డ రమేష్‌కుమార్‌ మాత్రం, ఎట్టి పరిస్థితుల్లోనూ ఫిబ్రవరిలో స్థానిక ఎన్నికల ప్రక్రియను పునఃప్రారంభించేయాలన్న పట్టుదలతో వున్నారు. కరోనా కారణంగా గత మార్చి నెలలో స్థానిక ఎన్నికల ప్రక్రియ వాయిదా పడిన విషయం విదితమే. అప్పటినుంచి ఇప్పటిదాకా స్థానిక ఎన్నికల ప్రక్రియ ముందుకు సాగలేదు.

ఇటీవల, రాష్ట్రంలోని వివిద రాజకీయ పార్టీలతో రాష్ట్ర ఎన్నికల కమిషన్‌, స్థానిక ఎన్నికల విషయమై అభిప్రాయ సేకరణ చేపట్టింది. దీన్ని వైఎస్‌ జగన్‌ ప్రభుత్వం తీవ్రంగా తప్పుపట్టింది కూడా. రాష్ట్ర ప్రభుత్వాన్ని నిమ్మగడ్డ సంప్రదించడంలేదని అధికార పార్టీ చెబుతుండగా, నిమ్మగడ్డ మాత్రం.. సంప్రదింపుల ప్రక్రియ కొనసాగిస్తూనే వున్నారు. అయినాగానీ, తమకు రాష్ట్ర ప్రభుత్వం సహకరించడంలేదన్నది నిమ్మగడ్డ ఆరోపణ.

కోర్టు చెప్పినా, రాష్ట్ర ప్రభుత్వం ఎస్‌ఈసీకి సహకరించకపోవడం పట్ల ఆవేదన వ్యక్తం చేస్తూ, హైకోర్టులో కోర్టు ధిక్కరణ పిటిషన్‌ దాఖలు చేశారు నిమ్మగడ్డ రమేష్‌కుమార్‌. ‘ఎన్నికల కమిషన్‌ లేఖ రాసినా ప్రభుత్వం స్పందించడంలేదు.. రాష్ట్ర ప్రభుత్వ ప్రధాన కార్యదర్శి ప్రతి స్పందన సరిగా లేదు.. రాష్ట్రంలో స్థానిక ఎన్నికలు సజావుగా జరిగేలా ప్రభుత్వానికి దేశాలు ఇవ్వండి..’ అంటూ కోర్టు ధిక్కరణ పిటిషన్‌లో ఎస్‌ఈసీ నిమ్మగడ్డ రమేష్‌కుమార్‌ పేర్కొన్నారు.

అయితే, నిమ్మగడ్డ ఎన్ని పిల్లిమొగ్గలు వేసినా, ఇప్పట్లో స్థానిక ఎన్నికలు నిర్వహించేది లేదనీ, వేసవి కాలంలోనే స్థానిక ఎన్నికలు నిర్వహిస్తామని పలువురు మంత్రులు ఇప్పటికే తేల్చి చెప్పిన విషయం విదితమే. ఇంతకీ, కోర్టు ఎలా స్పందిస్తుంది.? ప్రభుత్వంపై కోర్టు ధిక్కరణ పిటిషన్‌ వేసిన ఎస్‌ఈసీ నిమ్మగడ్డ, సానుకూల స్పందనను న్యాయస్థానం నుంచి పొందగలరా.? వేచి చూడాల్సిందే.