సిగ్గు సిగ్గు.! మరీ ఇంత ‘బులుగు’ బానిసత్వమా.?

ప్రత్యేక హోదా వచ్చిందా.? రాలేదాయె.! పోలవరం ప్రాజెక్టు పూర్తయ్యిందా.? పూర్తవలేదాయె.! మూడు రాజధానులు అయ్యాయా.? అవలేదాయె.! మరెందుకు బులుగు పార్టీకి ‘జేజేలు’ పలకాలి.? రాజకీయ పార్టీలకు వంత పాడే మీడియా.. అన్నది ఈ రోజుల్లో సర్వసాధారణమైన విషయం.

కానీ, అది తమ రాష్ట్రంలో రాజకీయ విధ్వంసం జరుగుతున్నా, ఇంకా ‘బులుగు భజన’ చేస్తూనే వుంటామంటే ఎలా.? పూర్వాశ్రమంలో ఆయనో జర్నలిస్టు.. అధికార వైసీపీలో ఇప్పుడు అత్యంత కీలక నేత. ప్రభుత్వంలోనూ కీలకంగా వ్యవహరిస్తున్నారాయన.

రాజధాని అమరావతి విషయంలో తాజాగా హైకోర్టు ఇచ్చిన తీర్పుతో ఊపిరి పీల్చుకున్నారు రాజధానికి భూములిచ్చిన రైతులు. అప్పటిదాకా లాఠీల దెబ్బలు తిన్నారు.. నానా రకాల హింసా ఎదుర్కొన్నారు.. అవమానాల సంగతి సరే సరి. అంతటి దారుణమైన పరిస్థితుల్లో న్యాయస్థానం నుంచి ఊరట లభిస్తే, ఆ న్యాయస్థానానికీ, భూదేవికీ నమస్కరించకూడదా.?

‘కుక్కల్లా.. నక్కల్లా..’ అని ప్రభుత్వంలో వున్న వ్యక్తి రైతుల్ని ఉద్దేశించి, మీడియాని ఉద్దేశించి, విపక్షాలను ఉద్దేశించి అనొచ్చా.? బానిసత్వానికీ ఓ హద్దూ అదుపూ వుంటుంది. ఇది చరిత్రలో కనీ వినీ ఎరుగని బానిసత్వం.

ఉమ్మడి రాష్ట్రానికి గతంలో మంత్రిగా పనిచేసిన ఒకాయన ఇప్పుడు సీనియర్ మంత్రి. అమరావతిని ఎడారిగా అభివర్ణించాడాయన. ఓ మంత్రి, తాను మంత్రిగా పనిచేస్తున్న రాష్ట్రంలో ఓ ప్రాంతాన్ని ఉద్దేశించి ‘ఎడారి, స్మశానం’ అనొచ్చా.?

వాళ్ళూ వీళ్ళూ అని కాదు.. దాదాపుగా అధికార పార్టీలో చాలామంది నేతలు.. అత్యంత హేయంగా వ్యవహరించారు అమరావతి విషయంలో. ఆత్మసాక్షి అనేదొకటుంటే.. ఇలా తమను తాము ఇలా బానిసల్లా మార్చేసుకునేవారే కాదు.!

బులుగు మీడియా, బులుగు రాజకీయ నాయకులు.. రాష్ట్రాన్ని ఎందుకిలా నాశనం చేయాలనుకుంటున్నారు.? ఇదేమీ మిలియన్ డాలర్ల ప్రశ్న కాదు.. ఇదంతా స్వామి భక్తి.. ఆ స్వామి భక్తి మాయలో పడి.. తమకు జన్మనిచ్చిన రాష్ట్రానికి అన్యాయం చేస్తున్నారు.