వూహాన్ వాటర్ పార్కులో జోరుగా హుషారుగా..

అది ఓ వాటర్ పార్క్. వేలాదిగా స్విమ్ సూట్లలో జనాలు కేరింతలు కొడుతున్నారు. భారీ స్పీకర్ల నుంచి వచ్చే సంగీతం.. దానికి అనుగుణంగా జనాల డ్యాన్సులు.. ఎటు చూసినా కోలాహలం.. మాస్కుల మాటే లేదు. సోషల్ డిస్టెన్స్ అన్నది లేనే లేదు.. ఇదంతా కరోనా కల్లోలానకి ముందు అయి ఉంటుంది అనుకుంటే మాత్రం క్వారంటైన్ లో కాలు పెట్టినట్టే. ఇదంతా జరుగుతోంది ఇప్పుడే. ఎక్కడో తెలుసా? కరోనా మహమ్మారి పుట్టిన చైనాలోని వూహాన్ లో.

ప్రపంచం మొత్తం కరోనాతో కకావికలమవుతుంటే.. ఆ రాకాసి వైరస్ ను ప్రపంచానికి పాకేలా చేసిన చైనాలో మాత్రం జనాలు జోరుగా చిందులేస్తున్నారు. చైనాలో 76 రోజుల కఠినమైన లాక్ డౌన్ ను ఏప్రిల్ లో ఎత్తివేయగా.. అప్పటికే అక్కడ కేసులు తగ్గుముఖంగా పట్టాయి. మే వరకు అడపాదడపా కేసులు నమోదైనా.. మే నెల మధ్య నుంచి ఒక్క కేసు కూడా రాలేదు.

ఈ నేపథ్యంలో క్రమంగా అన్ని ఆంక్షలూ ఎత్తివేశారు. ఇందులో భాగంగా వాటర్ పార్కులు కూడా తెరిచేశారు. సందర్శకులను ఆకర్షించడం కోసం భారీగా రాయితీలు ప్రకటించారు. దీంతో వారంతాపు రోజుల్లో వాటర్ పార్కులకు జనాలు పోటెత్తుతున్నారు. కరోనా వైరస్ పుట్టినల్లు అయిన వూహాన్ లోని మాయా వాటర్ పార్కు మొన్న శని, ఆదివారాల్లో అయితే.. ఇసుక వేస్తే రాలనంత జనంతో నిండిపోయింది. ఎవరికీ మాస్కులు లేకపోవడం.. భౌతిక దూరం అనేది భూతద్దంలో పెటిట చూసినా కానరాకపోవడం చూసి నెటిజన్లు నోరెళ్లబెట్టారు. దీనికి సంబంధించిన ఫొటోలు సోషల్ మీడియాలో చక్కర్ల కొట్టడం.. వెబ్ సైట్లలో వార్తలు రావడంతో.. అక్కడి పరిస్థితులు చూసి అవాక్కయ్యారు.

అసలు కరోనా అంటే ఏమిటో తమకు తెలియదు అనేంతగా వూహాన్ జనం సంబరాల్లో మునిగిపోయారు. అయితే, దీనిపై ప్రపంచవ్యాప్తంగా విమర్శలు వ్యక్తమవుతున్నాయి. కరోనా నుంచి కోలుకున్నంత మాత్రాన ప్రమాదం లేకుండా పోలేదని.. చిన్న తప్పిదం చేసినా మరోసారి ఆ మహమ్మారి విరుచుకుపడే ప్రమాదం ఉందని వైద్య నిపుణులు హెచ్చరిస్తున్నారు. దీనిని చైనా అధికార వర్గాలు తేలిగ్గా తోసిపుచ్చుతున్నాయి. తమ ప్రావిన్సులో మే నుంచి కేసులు నమోదు కాకపోవడంతోనే వాటర్ పార్కులకు అనుమతి ఇచ్చామని చెబుతున్నాయి.

కాగా, ప్రపంచవ్యాప్తంగా కరోనా మహమ్మారి విజృంభణ కొనసాగుతూనే ఉంది. ఇప్పటివరకు ప్రపంచవ్యాప్తంగా 2.20 కోట్ల మంది కరోనా బారిన పడగా.. ప్రతిరోజూ దాదాపు 3 లక్షల కేసులు నమోదవుతున్నాయి. ఒక్క భారత్ లోనే రోజుకు 50వేలకు పైగా కేసులు వెలుగు చూస్తున్నాయి. కానీ ప్రపంచానికి ఈ వైరస్ పరిచయం చేసిన చైనాలో మాత్రం 85వేలకు మించి కేసులు నమోదు కాలేదు. ఈ నేపథ్యంలోనే అక్కడి అధికారులు, ప్రజలు పార్టీ మూడ్ లోకి దిగిపోయి కేరింతలు కొడుతున్నారు.