వికేంద్రీకరణ.! ఉత్తరాంధ్రకు ముఖ్యమంత్రి పదవి ఇస్తారా.?

రాష్ట్రానికి మూడు రాజధానులుంటేనే అభివృద్ధి.. అని అంటోంది అధికార వైసీపీ. మూడు రాజధానులు సరే, మూడు ముఖ్యమంత్రి పదవులైతే ఎలా వుంటుంది.? ఐదేళ్ళ పాలన కదా, ఏడాదిన్నరకు ఓ ముఖ్యమంత్రి.. అదీ ఓ ప్రాంతానికి చెందిన వ్యక్తికి ఓ సారి అవకాశం కల్పిస్తే ఎలా వుంటుంది. వైఎస్సార్ కాంగ్రెస్ పార్టీ నుంచి అలాంటి వినూత్న ఆలోచనని ఆశించగలమా.?

విశాఖ నుంచి ముఖ్యమంత్రి పరిపాలన చేపడితే, విశాఖపట్నం సహా ఉత్తరాంధ్ర అభివృద్ధి చెందిపోతుందన్నది అధికార వైసీపీ వాదన. కర్నూలుని న్యాయ రాజధానిని చేస్తే.. ఆ ప్రాంతం అభివృద్ధి చెందుతుందట.! అసలు ఇదెలా సాధ్యం.?

ముఖ్యమంత్రి వైఎస్ జగన్ మోహన్ రెడ్డి.. మూడున్నరేళ్ళుగా అమరావతి నుంచే పరిపాలన చేస్తున్నారు.. కానీ, అమరావతి అభివృద్ధి చెందలేదు. అమరావతి కూడా మూడు రాజధానుల్లో ఒకటి కదా.! మరి, అమరావతిని ముఖ్యమంత్రి వైఎస్ జగన్ ఎందుకు అభివృద్ధి చేయలేదట.? అదంతా కాదు, మూడు రాజధానులకు రాష్ట్ర ప్రజలు, విపక్షాలు.. అన్నీ ఒప్పుకుంటేనే, ఆ మూడిటిలో ఒకటైన అమరావతిని అభివృద్ధి చేసేది.. అన్నట్టుంది వైసీపీ తీరు.

రాష్ట్రానికి మూడు రాజధానులు అవసరమైనప్పుడు, అధికార వికేంద్రీకరణ కూడా జరగాలి.. ఆ లెక్కన, ముఖ్యమంత్రి పదవిని కూడా ఆయా ప్రాంతాలకు సమానంగా అందేలా చూడాల్సిన బాధ్యత వైసీపీ మీదనే వుందన్నది ఉత్తరాంధ్ర నుంచి పుట్టుకొస్తున్న నయా డిమాండ్.

ఉమ్మడి ఆంధ్రప్రదేశ్‌లో హైద్రాబాద్ తర్వాత ఆ స్థాయి నగరం.. విశాఖపట్నం మాత్రమే. విశాఖపట్నం నగరానికి రాజధాని హోదా దక్కితే మంచిదే. కానీ, అమరావతిని చంపేసి విశాఖకు పట్టం కడతామనడమే ఒకింత హాస్యాస్పదం. ఎగ్జిక్యూటివ్ క్యాపిటల్, జ్యుడీషియల్ క్యాపిటల్.. ఈ పేర్లను తెరపైకి తెచ్చి, అమరావతిని అయోమయంలో పడేయడం ద్వారా.. మొత్తం రాష్ట్రాన్నే వైసీపీ అంధకారంలోకి నెట్టేసిందన్న విషయం రాష్ట్ర ప్రజలకు అర్థమవుతోందో లేదో.!