ఏపీకి ‘వరద విరాళాలు’ టాలీవుడ్‌ నుంచి రావా.?

ఎప్పుడూ ఎవరో ఒకర్ని విమర్శించడం తప్ప కొందరికి వేరే పని వుండదు. సోషల్‌ మీడియా వేదికగా ఇలాంటి పనిలేని బ్యాచ్‌కి కావాల్సినంత ‘మషాలా’ ఎప్పుడూ దొరకుతూనే వుంటుంది. తెలుగు సినీ ప్రముఖులు కష్ట కాలంలో స్పందించడంలేదంటూ ‘హైద్రాబాద్‌ వరదల’ నేపథ్యంలో నిందలు వేసేశారు. కొందరైతే, పలువురు సినీ ప్రముఖులపై జగుప్సాకరమైన భాష కూడా వాడేశారు. కానీ, మెగాస్టార్‌ చిరంజీవి, పవన్‌ కళ్యాణ్‌, ప్రభాస్‌, మహేష్‌, ఎన్టీఆర్‌, విజయ్‌ దేవరకొండ, హరీష్‌ శంకర్‌, అనిల్‌ రావిపూడి సహా పలువురు సినీ ప్రముఖులు పెద్దయెత్తున విరాళాల్ని ప్రకటించారు.. ఇంకా ప్రకటిస్తూనే వున్నారు. ‘సామాజిక బాధ్యతను’ చాటుకున్నారు.

సినీ పరిశ్రమ నుంచి విరాళాల వెల్లువ ఇదే కొత్త కాదు. గతంలోనూ వున్నదే. ఎప్పుడూ సినీ పరిశ్రమ ఈ విషయంలో వెనుకంజ వేసింది లేదు. కరోనా కారణంగా పరిశ్రమ నష్టపోయినా.. సినీ ప్రముఖులు విరాళాల విషయంలో పెద్దమనసు చాటుకుంటూనే వున్నారు. ఇక, ఇప్పుడు ఆంధ్రప్రదేశ్‌ నుంచి కొందరు ‘పనిలేని బ్యాచ్‌’కి చెందిన నెటిజన్లు, ‘తెలంగాణకు మాత్రమేనా.? ఆంధ్రప్రదేశ్‌కి విరాళాలు ఇవ్వరా.?’ అంటూ కొత్త రచ్చ మొదలు పెట్టారు.

నిజమే, తెలంగాణతోపాటు ఆంధ్రప్రదేశ్‌ కూడా వరద నష్టాల్ని చవిచూస్తున్న మాట వాస్తవం. తెలంగాణకు ఇచ్చి, ఆంధ్రప్రదేశ్‌కి ఇవ్వకుండా వుండరు సినీ ప్రముఖులు. ఇస్తారు, కానీ.. ఆ ‘స్పేస్‌’ సినీ ప్రముఖులకి కాస్తయినా ఇవ్వాలి కదా.!

కొన్నాళ్ళ క్రితం విజయ్‌ దేవరకొండ ఇలాంటి విమర్శలపైనే ఘాటుగా స్పందించాడు. రాజమౌళి కూడా అసహనం వ్యక్తం చేశాడు. ‘మేం ఎప్పుడివ్వాలి.? ఎంత ఇవ్వాలి.? ఎలా ఇవ్వాలి.? అన్నది మా ఇష్టం. దయచేసి మాకు ఆ స్పేస్‌ ఇవ్వండి..’ అని చాలామంది సినీ ప్రముఖులు చెప్పుకున్నారు. కానీ, ‘పనిలేని బ్యాచ్‌’ నెటిజన్లు ఆగుతారా.? ససేమిరా ఆగరు.

పోనీ, ఇలా సినీ పరిశ్రమ మీద బురదజల్లే బ్యాచ్‌ ఏమన్నా తమవంతు సామాజిక బాధ్యతగా కనీసం పది, పాతిక రూపాయలన్నా విరాళం ఇస్తారా.? అంటే అదీ లేదు. అన్నట్టు, ఈ తరహా విమర్శల వెనుక రాజకీయ కోణం కూడా వుంటుంది. దురదృష్టమేంటంటే, సినీ ప్రముఖులు, పారిశ్రామికవేత్తలు మాత్రమే విరాళాలు ఇస్తారు.. ఎన్నికల్లో గెలుపు కోసం కోట్లాది రూపాయలు వెదజల్లే రాజకీయ నాయకులు.. కష్ట కాలంలో విరాళాల ఇవ్వడం చాలా చాలా ఆరుదు.