కర్నాటకలో కాంగ్రెస్ పార్టీని గెలిపించిన డీకే శివకుమార్ ఏమయ్యారు.? డిప్యూటీ సీఎం పదవితో సరిపెట్టుకోవాల్సి వచ్చింది. మరి, తెలంగాణలో ఏం జరగబోతోంది.? పీసీసీ అధ్యక్షుడు రేవంత్ రెడ్డి, కాంగ్రెస్ పార్టీని గెలిపిస్తే, కాంగ్రెస్ గెలిచాక, వేరే ఆప్షన్స్ తెరపైకొస్తున్నాయ్.!
నిజానికి, ఇది కాంగ్రెస్ పార్టీలో కొత్త వ్యవహారం కాదు. గతంలో, అంటే.. వైఎస్ రాజశేఖర్ రెడ్డి కాంగ్రెస్ పార్టీలో వున్నప్పుడు.. డీఎస్ – వైఎస్ కలిసి కాంగ్రెస్ పార్టీని అధికారంలోకి తీసుకొచ్చారు. వైఎస్ హవా మొదలయ్యాక, డీఎస్ రాజకీయంగా తేలిపోయారు. ముఖ్యమంత్రి పదవిని డీఎస్‌కి వరించాల్సి వుండగా, దాన్ని వైఎస్సార్ తన్నుకుపోయారన్నది బహిరంగ రహస్యం.
ఇప్పుడు, రేవంత్ రెడ్డి విషయంలోనూ అలాగే జరుగుతుందా.? సాయంత్రంలోపు స్పష్టత వస్తుందట.! ఏ సాయంత్రమో మరి.! నేటి సాయంత్రమా.? లేదంటే, వచ్చే వారమా.? వచ్చే నెలా.? వచ్చే సంవత్సరమా.? ఇలాంటి ప్రవ్నలు తెరపైకొస్తున్నాయ్. కాంగ్రెస్ రాజకీయాలే ఇంత.
ఓడిపోయారుగానీ, లేకపోతే.. మాజీ ఎమ్మెల్యే జగ్గారెడ్డి కూడా ముఖ్యమత్రి పదవి రేసులోకి వచ్చి వుండేవారే.! కోమటిరెడ్డి వెంకటరెడ్డి కూడా సీఎం పదవిపై కన్నేశారు. ఉత్తమ్ కుమార్ రెడ్డి ఇప్పుడు రేసులో ముందున్నారు. భట్టి విక్రమార్క, శ్రీధర్ బాబు, దామోదర రాజనర్సింహ.. లిస్టు సరిపోదు.. చాలానే వుంది.!
ముఖ్యమంత్రి పదవి రేవంత్ రెడ్డికే. డిప్యూటీ సీఎంలు, మంత్రుల విషయమై కొంత గందరగోళం అంతే.. ఎక్కువమంది పోటీదారులున్నారు.. ఇదీ కాంగ్రెస్ నుంచి అందుతున్న లీకుల సారాంశం. ఈపాటికే ముఖ్యమంత్రి పదవిలో ఎవరో ఒకరు కూర్చుని వుంటే, ఇంత పంచాయితీ అయి వుండేది కాదు.!
ఇప్పుడేమో, పది మందో పాతిక మందో ఎమ్మెల్యేలు పార్టీ వీడేలా వున్నారంటూ ఓ గుసగుస తెరపైకొచ్చింది. బీజేపీ గట్టిగా పూనుకుంటే.. గులాబీ పార్టీ కాస్త ప్రత్యేక శ్రద్ధ పెడితే, కాంగ్రెస్ శాసనసభ్యుల సంఖ్య.. సగానికి పడిపోవడం పెద్ద కష్టమేమీ కాదు. మీకర్తమవుతోందా కాంగేయులూ.!