Crocodile: భర్త ప్రాణమే ముఖ్యం..! మొసలితో మహిళ వీరోచిత పోరాటం..

Crocodile: మొసలి (Crocodile) నోట చిక్కిన భర్తను కాపాడుకునేందుకు ఏమాత్రం భయపడకుండా వీరోచిత పోరాటం చేసిన మహిళ తెగువకు సర్వత్రా ప్రశంసలు దక్కుతున్నాయి. రాజస్థాన్ (Rajasthan) లోని కరౌలీ జిల్లా మండరాయల్ సబ్ డివిజన్ లో ఉన్న ఓ నది వద్ద జరిగిందీ సంఘటన. వివరాల్లోకి వెళ్తే..

మేకలు కాసే బనీసింగ్ మీనా వాటిని తీసుకుని నది వద్దకు వెళ్లాడు. తనకూ దాహంగా ఉండటంతో అక్కడే దోసిళ్లతో నీళ్లు తాగుతున్న సమయంలో నీళ్లలోని మొసలి (Crocodile) ఒక్కసారిగా దాడి చేసి బనీసింగ్ కాలిని పట్టేసి నీళ్లలోకి లాక్కెళ్లేందుకు ప్రయత్నించింది. భర్త కేకలు విన్న భార్య విమలాబాయి అక్కడకు చేరుకుని బిత్తరపోయింది. వెంటనే తేరుకుని చేతిలో ఉన్న కర్రతో మొసలి (Crocodile) తలపై పదేపదే కొట్టింది. దీంతో బన్నీసింగ్ కాలిని వదిలేసి మొసలి (Crocodile) నీళ్లలోకి వెళ్లిపోయింది.

అక్కడికి చేరుకున్న మిగిలిన గొర్రెల కాపరులు బన్నీసింగ్ ను ఆసుపత్రిలో చేర్పించడంతో చికిత్స పొందుతున్నాడు. మరణం అంచు వరకూ వెళ్లిన తనను భార్య కాపాడిందని బన్నీసింగ్ అంటున్నాడు. భర్తను కాపాడుకోవాలనే ఆలోచనే తనలో భయం కలగకుండా చేసిందని విమలాబాయి అంటోంది.