టీటీడీ ఓ సుద్దపూస. తప్పంతా భక్తులదే.!

దైవ దర్శనం కోసం భక్తులు వెళ్లడం నేరమా.? కొందరు రాజకీయ నాయకులు చేస్తున్న వ్యాఖ్యలు చూస్తుంటే అవునేమో.. దేవుడ్ని దర్శించుకోవడం నేరమేనేమో అనిపించక మానదు. సోమవారం శివాలయానికి వెళతారు. శనివారం వేంకటేశ్వరస్వామి దర్శనానికి వెళతారు. మిగతా రోజుల్లోనూ దేవాలయాలేమీ ఖాళీగా వుండవు.

చిన్నా చితకా దేవాలయాల్లోనూ ఒక్కోసారి అనూహ్యమైన రద్దీ వుంటుంది. ఎందుకు.? అని అంటే దానికి ప్రత్యేకమైన కారణాలేమీ వుండవు. ‘కష్టమొస్తే, ఆ కష్టం తీర్చు దేవాడా.? అని దేవుడ్ని మొక్కుకుంటాం. కష్టం తీరితే, మమ్మల్ని ఆదుకున్నావ్ దేవుడా..’ అంటూ ఆ దేవుడికి మొక్కు చెల్లించుకుంటాం.

ఎవరి వెసులుబాటును బట్టి, వారు దేవాలయాలకు వెళ్లడం జరుగుతుంది. దైవ దర్శనానికి కోటా విధించడం అంటే, అంతకన్నా దిగజారుడుతనం ఇంకోటి వుండదు. ఎప్పుడైతే, సాధారణ, విఐపీ అనే విభజన భక్తుల మధ్య పుడుతుందో, అప్పుడే సమస్యలు వస్తాయ్. ఇదేమీ కొత్త పద్ధతి కాదు.

విభజించు, పాలించు తరహాలో, విభజించు పూజించు విధానమన్నమాట. కలియుగ ప్రత్యక్ష దైవం శ్రీ వేంకటేశ్వర స్వామిని దర్శించుకునేందుకు తిరుమలకు భక్తులు పోటెత్తుతున్నారు. భక్తుల్లో క్రమశిక్షణ కొరవడిందంటూ అడ్డగోలుగా కొందరు మాట్లాడుతున్నారు. అలా మాట్లాడేది విఐపీలే.

వాళ్లకీ, వాళ్ల బంధువులకీ, వాళ్ల స్నేహితులకీ స్పెషల్ దర్శనాలు లభిస్తాయ్. సో, అలాంటోళ్లకు సామాన్య భక్తుల బాధలెలా తెలుస్తాయ్.? క్యూ లైన్లో తోపులాట జరిగిందంటే, అందుకు కారణం అధికారుల చేతకానితనం. వేలకు వేలు జీతాలు మేసేస్తూ, భక్తులకి కనీస సౌకర్యాలు కల్పించకపోవడం దుర్మార్గం.

దేవాలయాల ద్వారా వచ్చే ఆదాయాన్ని అనుభవిస్తూ, భక్తుల మీద పెత్తనం చెలాయించడం ఎంతవరకూ సబబు.?రాజకీయ నాయకులు అధికారులు కూడా సర్వదర్శనాల్లో దేవుడ్ని దర్శించుకునే రోజులొస్తే తప్ప దైవత్వానికి పట్టిన ఈ మకిలి వదలదు.

అధికారుల నుంచి, అమాత్యుల దాకా అందరూ భక్తుల్ని తప్పు పట్టేవాళ్లే. నవ్విపోదురు గాక.. వాళ్లకేటి సిగ్గు.