ఆర్టీసీ సమ్మె ఇక కంచికేనా?

తెలంగాణలో ఆర్టీసీ కార్మికుల చేపట్టిన సమ్మె 20 రోజులుగా ఉధృతంగా సాగుతోంది. నిరసనలు, ఆందోళనలు, విపక్షాల మద్దతుతో ముందుకెళ్తోంది. ఓ దశలో సకల జనుల సమ్మెకు దారి తీస్తుందా అనే పరిస్థితి కూడా కనిపించింది. ఇంత జరుగుతున్నా అధికార టీఆర్ఎస్ మాత్రం అస్సలు స్పందించలేదు. మాకు ఏం సంబంధం లేదనే రీతిలోనే వ్యవహరించింది. చివరకు హైకోర్టు కలగజేసుకుని చర్చలు జరపాలని ఆదేశించినా.. ఉత్తర్వులు అందలేదంటూ నాలుగు రోజులపాటు జాప్యం చేసింది.

హైకోర్టు ఉత్తర్వులు అందిన తర్వాత సీఎం కేసీఆర్ స్పందించారు. ఆర్టీసీ కార్మికుల డిమాండ్లపై అధ్యయనానికి కమిటీ ఏర్పాటు చేశారు. అందులోనూ వారి ప్రధాన డిమాండ్ ‘ప్రభుత్వంలో ఆర్టీసీ విలీనం’ అంశాన్ని పక్కన పెట్టారు. తాజాగా హుజూర్ నగర్ ఉప ఎన్నికల ఫలితం అధికార పార్టీకే అనుకూలంగా రావడంతో ఇక సమ్మె కథ దాదాపుగా ముగిసిపోయినట్టే అనే టాక్ వినిపిస్తోంది.

ఇప్పటివరకు ఆర్టీసీ సమ్మె కారణంగా అధికార పార్టీపై తీవ్ర వ్యతిరేకత ప్రబలిందని, అది హుజూర్ నగర్ ఉప ఎన్నికల ఫలితంలో కనిపిస్తుందని విపక్షాలు భావించాయి. ఆర్టీసీ కార్మికులు కూడా అలాగే భావించారు. కానీ ఫలితం మాత్రం వారి అంచనాలకు భిన్నంగా వచ్చింది. టీఆర్ఎస్ అభ్యర్థి సైదిరెడ్డి భారీ మెజార్టీతో గెలుపొందారు. దీంతో సాధారణ జనాల్లో ఆర్టీసీ సమ్మె కార్మికులకు మద్దతు లేదని తేలిపోయినట్టేనని అధికార పార్టీ నేతలు అంటున్నారు.

ఈ నేపథ్యంలో సమ్మె చేస్తున్నవారు పునరాలోచించక తప్పని పరిస్థితి ఏర్పడినట్టేనని చెబుతున్నారు. ఆర్టీసీ కార్మికులతో చర్చలు జరపడానికి ఏమాత్రం ఆసక్తి చూపని సీఎం కేసీఆర్.. గురువారం కీలక నిర్ణయం తీసుకునే అవకాశం ఉందని సమాచారం. బేషరతుగా విధుల్లో చేరడానికి కార్మికులకు ఓ అవకాశం ఇస్తారని తెలుస్తోంది. ఒకవేళ అలాంటి పిలుపు ఇస్తే పెద్ద సంఖ్యలో కార్మికులు విధుల్లో చేరడానికి అవకాశం కనిపిస్తోంది.

సంఘాల నేతల వల్లే తమ పరిస్థితి అటూ ఇటూ కాకుండా అయిపోయిందనే ఆవేదన పలువురిలో కనిపిస్తోందని అంటున్నారు. ఈ నేపథ్యంలో కేసీఆర్ అవకాశం ఇస్తే వారు సమ్మె వీడి తమ విధుల్లో చేరిపోతారనే వాదన వినిపిస్తోంది. కార్మికులకు కేసీఆర్ ఓ ఛాన్స్ ఇస్తారా? లేక తన వైఖరికే కట్టుబడి హైకోర్టు సూచనల మేరకు ముందుకెళ్తారా అనేది ఒకటి లేదా రెండు రోజుల్లోనే తేలనుంది.