Telangana: తెలంగాణలో దుకాణాలు ఇక 24×7

Telangana: తెలంగాణ ప్రభుత్వం రాష్ట్రంలోని దుకాణదారులకు సంస్థల యజమానులకు గుడ్ న్యూస్ చెప్పింది. ప్రభుత్వ నియమావళిని అనుసరించి ఇకపై 24 గంటలు షాపులు సంస్థలు తెరిచి ఉంచుకోవడానికి అనుమతులు ఇచ్చింది. తెలంగాణ దుకాణాలు, సంస్థల చట్టం 1988 కింద నమోదైన అన్ని షాపులు, కంపెనీలకు ఇది తక్షణమే వర్తిస్తుంది. ఈ మేరకు కార్మిక శాఖ రాష్ట్ర ప్రత్యేక ప్రధాన కార్యదర్శి రాణి కుముదిని ఉత్తర్వులు జారీ చేశారు.

ప్రభుత్వ నియమాల ప్రకారం షాపుల్లో లేదా కంపెనీలో పనిచేసే ప్రతి ఒక్క ఉద్యోగికి ఐడి కార్డులు జారీ చేయాలి. మహిళా ఉద్యోగులకు రవాణా సదుపాయం కల్పించాలి. వారాంతపు సెలవులు వారానికి పని గంటలు నిర్దేశించాలి. ఓవర్ టైం డ్యూటీ చేసినప్పుడు దానికి వేతనం చెల్లించాలి.

ప్రభుత్వం గుర్తించిన సెలవులు, పండగ వేళల్లో పనిచేస్తే వేతనంతో కూడిన ప్రత్యామ్నాయ సెలవును మంజూరు చేయాలని కార్మిక శాఖ స్పష్టం చేసింది. ఉద్యోగుల వివరాలు రికార్డుల్లో నమోదు చేసి ఎప్పటికప్పుడు రిటర్న్లను సమర్పించాలి. 24 గంటలు షాపులు తెరిచి ఉంచుకున్నందుకుగాను ప్రభుత్వానికి ఏడాదికి రూ. 10000 చొప్పున రుసుము చెల్లించాల్సి ఉంటుంది.