తెలంగాణలో కరోనా మరణాలపై ప్రభుత్వానికి హైకోర్టు అక్షింతలు.!

‘వేల సంఖ్యలో కరోనా పాజిటివ్‌ కేసులు ప్రతిరోజూ నమోదవుతున్నా.. మరణాల సంఖ్య 9, 10 మాత్రమే నమోదవుతుండడం వెనుక అసలు కారణమేంటి.?’ అంటూ హైకోర్టు అనుమానం వ్యక్తం చేసింది. తెలంగాణలో కరోనా విషయమై మొదటి నుంచీ హైకోర్టు, ప్రభుత్వ తీరు పట్ల మొదటి నుంచీ అసహనం వ్యక్తం చేస్తున్న విషయం విదితమే. హైకోర్టు అక్షింతలు, మొట్టికాయల నేపథ్యంలోనే ప్రస్తుతం కరోనా టెస్టులు ఎక్కువ సంఖ్యలో జరుగుతున్నాయన్నది నిర్వివాదాంశం.

ఇక, కరోనా మరణాల విషయానికొస్తే, తెలంగాణలో వాస్తవ పరిస్థితులకీ, ప్రభుత్వం చూపుతున్న లెక్కలకీ సంబంధమే లేదన్న ఆరోపణలున్నాయి. ‘వివిధ కారణాలతో మృతిచెందినవారికి కరోనా పరీక్షలు చేయడంలేదు..’ అంటూ గతంలోనే తెలంగాణ ప్రభుత్వం ప్రకటించుకుంది. అదొక్కటే కాదు, కరోనా వైరస్‌ సోకినా, ఇతరత్రా తీవ్ర అనారోగ్య సమస్యలతో చనిపోయినవారిని కరోనా మృతుల జాబితాలో వెయ్యబోమని సాక్షాత్తూ తెలంగాణ హెల్త్‌ మినిస్టర్‌ ఓ సందర్భంలో చెప్పుకొచ్చారు. ఈ నేపథ్యంలో, అసలు తెలంగాణలో కరోనా మరణాలు ఎన్ని.? అన్న ప్రశ్న అందర్నీ వేధిస్తున్న మాట వాస్తవం.

ప్రధానంగా హైద్రాబాద్‌లో పలు స్మశాన వాటికల్లో గుట్టు చప్పుడు కాకుండా కరోనా మృతులకు అంత్యక్రియల్ని నిర్వహిస్తున్నారన్న విమర్శలూ వెల్లువెత్తుతున్నాయి. ఈ మేరకు మీడియాలో సంచలనాత్మక కథనాలూ రావడంతో, న్యాయస్థానం ఇప్పటికే పలుమార్లు తెలంగాణ ప్రభుత్వంపై ఆగ్రహం వ్యక్తం చేసింది.

ఇవన్నీ ఓ ఎత్తు.. ప్రైవేటు ఆసుపత్రుల దోపిడీ ఇంకో ఎత్తు. ప్రైవేటు ఆసుపత్రుల్లో కరోనా వైద్య చికిత్స విషయమై ప్రభుత్వం కొన్ని గైడ్‌లైన్స్‌ జారీ చేసింది. అయితే, ప్రభుత్వం జారీ చేసిన గైడ్‌ లైన్స్‌కి భిన్నంగా ఫీజులు వసూలు చేస్తున్నాయి చాలా కార్పొరేట్‌ ఆసుపత్రులు. లక్షల్లో వసూళ్ళకు పాల్పడుతూ పేషెంట్ల కుటుంబాల్ని పిప్పి పీల్చి చేస్తున్నాయి. ఈ అంశంపైనా హైకోర్టు ఆగ్రహం వ్యక్తం చేసింది. ‘ప్రైవేటు ఆసుపత్రులపై ప్రభుత్వానికి నియంత్రణ లేదా.? కొన్ని ఆసుపత్రుల విషయంలో ప్రభుత్వ చర్యలు ఒకలా, ఇంకొన్ని ఆసుపత్రుల విషయంలో ఇంకోలా ఎందుకు వుంటున్నాయి.?’ అని ప్రశ్నించింది ఉన్నత న్యాయస్థానం.

60 వేల పైచిలుకు పరీక్షలు ఈ మధ్య ప్రతిరోజూ జరుగుతుండగా, 2 వేల నుంచి 3 వేల మధ్య నిత్యం కరోనా పాజిటివ్‌ కేసులు నమోదవుతున్నాయి తెలంగాణలో. అయితే, అధికారిక లెక్కలతో పొంతన లేకుండా తెలంగాణలో కరోనా బాధితుల సంఖ్య చాలా ఎక్కువగా వుందన్న వాదనలు లేకపోలేదు. సమగ్ర సమాచారం కోసం ఉన్నత న్యాయస్థానం తెలంగాణ ప్రభుత్వానికి స్పష్టమైన ఆదేశాలు జారీ చేసిన దరిమిలా.. ప్రభుత్వం తరఫు సమాధానం ఎలా వుంటుందో వేచి చూడాల్సిందే.