రెండో ఆలోచనే లేదు.. గెలుపు టీడీపీదే: చంద్రబాబు

ఆంధ్రప్రదేశ్ అసెంబ్లీ, లోక్ సభకు జరిగిన ఎన్నికల్లో తెలుగుదేశం పార్టీదే గెలుపు అని ఆ పార్టీ అధినేత చంద్రబాబు ధీమా వ్యక్తంచేశారు. ప్రజలు అభివృద్ధికి పట్టం కట్టారని పేర్కొన్నారు. గురువారం అర్ధరాత్రి దాటాక ఆయన పార్టీ నేతలతో టెలికాన్ఫరెన్స్ నిర్వహించారు. ఈ సందర్భంగా మాట్లాడుతూ.. ఈ ఎన్నికల్లో గెలుపు తమదేనని పేర్కొన్నారు. ఇందులో రెండో ఆలోచనే లేదని వ్యాఖ్యానించారు. ఇప్పటివరకు తమకు వచ్చిన సమాచారం మేరకు 130కి పైగా స్థానాల్లో తెలుగుదేశం పార్టీ గెలుస్తుందని వివరించారు. ఇది ఇంకా పెరుగుతుంది తప్ప తగ్గే అవకాశం లేదని చెప్పారు. వందకు వంద శాతం గెలుపు టీడీపీదేనని ఉద్ఘాటించారు. ఓటమి భయంతోనే వైఎస్సార్ సీపీ పలుచోట్ల విధ్వంసానికి పాల్పడిందని ఆరోపించారు. వారి వల్లే అర్ధరాత్రి వరకు పోలింగ్ సాగే పరిస్థితి నెలకొందని.. మహిళలు, వృద్ధులు ఇబ్బంది పడాలనే ఉద్దేశంతోనే ఇలాంచి నీచ రాజకీయాలకు పాల్పడ్డారని ధ్వజమెత్తారు.

అయితే, ఎవరు ఎలాంటి కుట్రలు పన్నినప్పటికీ.. ప్రజలు టీడీపీ పక్షాన నిలిచి ఓటింగ్ శాతం పెంచారని పేర్కొన్నారు. అర్ధరాత్రి వరకు విధులు నిర్వహించిన పోలింగ్ ఏజెంట్లకు చంద్రబాబు అభినందనలు తెలిపారు. ఎన్నికల ఫలితాలు వెలువడే వరకు ఇదే పోరాట స్ఫూర్తితో ముందుకెళ్లాలని సూచించారు. వచ్చే 40 రోజులు ఈవీఎంలు భద్రపరిచిన స్ట్రాంగ్ రూంల వద్ద షిప్టులవారీగా కాపలా కాయాలని పేర్కొన్నారు.

వాస్తవానికి పోలింగ్ ముగిసిన తర్వాత ప్రెస్ మీట్ పెట్టి మాట్లాడటం ఆనవాయితీ. గత ఎన్నికల్లోనూ పోలింగ్ ముగిసిన తర్వాత చంద్రబాబు మీడియాతో మాట్లాడారు. అయితే, ఈసారి మాత్రం ఆయన మీడియాతో మాట్లాడలేదు. సాయంత్రం 8.30 గంటల సమయంలో వైఎస్సార్ సీపీ అధినేత వైఎస్ జగన్ మోహన్ రెడ్డి లోటస్ పాండ్ లోని తన నివాసంలో మీడియాతో మాట్లాడారు. గెలుపు తమదేనని.. భారీ మెజార్టీతో తమ పార్టీ అధికారంలోకి రాబోతోందని ధీమా వ్యక్తంచేశారు. ఓటింగ్ శాతం తగ్గించడానికి తెలుగుదేశం పార్టీ ప్రయత్నించిందని, కానీ వారి ప్రయత్నాలు విఫలమయ్యాయని పేర్కొన్నారు.

జగన్ మాట్లాడిన తర్వాత టీడీపీ అధినేత చంద్రబాబు కూడా మాట్లాడతారని అంతా భావించారు. పోలింగ్ సరళి, తమ విజయావకాశాలపై మాట్లాడటానికి మీడియా సమావేశం ఏర్పాటు చేస్తారని అనుకున్నారు. అయితే, అర్థరాత్రి దాటినప్పటికీ చంద్రబాబు మీడియా ముందుకు రాలేదు. కొన్నిచోట్ల అర్ధరాత్రి 12.30 గంటల వరకు కూడా పోలింగ్ సాగడంతో ఆయన పరిస్థితిని సమీక్షిస్తూ ఉండిపోయారు. ఈ నేపథ్యంలో పార్టీ నేతలతో టెలికాన్ఫరెన్స్ నిర్వహించి, వారితో మాట్లాడారు.