టీడీపీలో రాజధాని రగడ

ఏపీకి మూడు రాజధానుల వ్యవహారం తెలుగుదేశం పార్టీలో చిచ్చు రేపుతోంది. ఈ అంశంపై సీఎం వైఎస్ జగన్ మోహన్ రెడ్డి అసెంబ్లీలో ప్రకటన చేయగానే తీవ్రంగా వ్యతిరేకించిన టీడీపీ అధినేత చంద్రబాబు.. తర్వాత కాస్త సైలెంట్ అయ్యారు. అమరావతి ప్రాంత రైతులు ఆందోళనలు చేస్తున్నా నేరుగా రంగంలోకి దిగకుండా పరోక్షంగా మద్దతుగా నిలిచారు. మూడు రాజధానుల ప్రతిపాదనను వ్యతిరేకిస్తే ఆయా ప్రాంతాల్లో నష్టపోతామనే భావనతో అలా వ్యవహరించారు. అయితే, ఈ ముసుగులో గుద్దులాట ఎందుకని అనుకున్నారో లేక ఇతరత్రా ఒత్లిళ్లు ఏమైనో వచ్చాయో తెలియదు గానీ, ఒక్కసారిగా అమరావతికే జై కొట్టారు. ఆ ప్రాంతంలో ఆందోళన చేస్తున్నవారికి మద్దతు ప్రకటించారు.

ఇక టీడీపీ జాతీయ ప్రధాన కార్యదర్శి నారా లోకేశ్ స్వయంగా ఆందోళనలో పాల్గొన్నారు. తద్వారా అమరావతి ఒక్కటే రాజధానిగా ఉండాలనేది తమ వైఖరని చెప్పకనే చెప్పారు. అయితే, ఈ పరిణామం మిగిలిన ప్రాంతాల టీడీపీ నేతల్లో అంతర్మథనానికి కారణమైంది. తమ ప్రాంత ప్రజల మనోభావాలను పరిగణనలోకి తీసుకోకుండా పార్టీ అధినాయకత్వం ఇలాంటి నిర్ణయం తీసుకోవడంతో తమ రాజకీయ జీవితం ఏమవుతుందో అనే ఆందోళన వారిలో వ్యక్తమవుతోంది.

ఈ నేపథ్యంలో విశాఖకు చెందిన టీడీపీ ఎమ్మెల్యేలు, ఎమ్మెల్సీలు మంగళవారం రాత్రి ఓ హోటల్లో ప్రత్యేకంగా భేటీ కావడం ప్రాధాన్యత సంతరించుకుంది. మాజీ మంత్రి గంటా శ్రీనివాసరావు కీలక పాత్ర పోషించిన ఈ భేటీకి టీడీపీ ఎమ్మెల్యేలు వెలగపూడి రామకృష్ణ, వాసుపల్లి గణేశ్, గణబాబులతోపాటు నలుగురు ఎమ్మెల్సీలు, పలువురు మాజీ ఎమ్మెల్యేలతోపాటు బాలకృష్ణ అల్లుడు భరత్ సైతం హాజరు కావడం చర్చనీయాంశమైంది. వీరంతా విశాఖను ఎగ్జిక్యూటివ్ రాజధాని చేయలనే ప్రతిపాదనకు మద్దతు తెలపాలని నిర్ణయం తీసుకున్నారు.

రాజకీయంగా ఎలాంటి పరిస్థితులున్నా.. తమ ప్రాంత ప్రజల మనోభావాలకు అనుగుణంగా నడుచుకుందామని, అందరం కలసి ఏకతాటిపై ఉందామని నిర్ణయించుకున్నారు. త్వరలోనే పార్టీ అధినేత చంద్రబాబును కలిసి ఆయనపై కూడా ఒత్తిడి చేద్దామని నిర్ణయం తీసుకున్నారు. మొత్తానికి అధికార పార్టీ తీసుకొచ్చిన మూడు రాజధానుల వ్యవహారం టీడీపీని ఇరుకున పెట్టింది.