శ్రీలక్ష్మి.. పడి లేచిన కెరటం

పోగొట్టుకున్న చోటే వెతుక్కోవాలన్నది నానుడి. ప్రస్తుతం ఐఏఎస్ అధికారి శ్రీలక్ష్మి చేస్తున్నది అదే. ఈమె గురించి తెలుగు రాష్ట్రాల ప్రజలకు పరిచయం చేయక్కర్లేదు. చిన్న వయసులోనే ఐఏఎస్ కు ఎంపికైన శ్రీలక్ష్మి.. అనూహ్యంగా జైలుకెళ్లారు. జగన్ కేసుల్లో సీబీఐ ఆమెను అరెస్టు చేసి జైలులో పెట్టింది. ఓబులాపురం మైనింగ్ కంపెనీ అక్రమంగా గనులు తవ్వకాలు జరిపిందని, ఇందుకు శ్రీలక్ష్మి అనుమతిచ్చి సహకరించారని ఆరోపిస్తూ సీబీఐ ఆమెను జైలుకు పంపించింది.

సమర్థవంతమైన ఐఏఎస్ అధికారిని జైలుకు పంపిన ఘనత జగన్ దే అంటూ విపక్షాలు ధ్వజమెత్తాయి. జగన్ కు సహకరిస్తే అంతే సంగతి అంటూ విమర్శలు గుప్పించాయి. ఏ ఐఏఎస్ అధికారి జగన్ వద్దకు వెళ్లినా వారికి జైలు జీవితం ఖాయమంటూ ప్రచారం చేశాయి. మరోవైపు జైలుకు వెళ్లిన శ్రీలక్ష్మి సైతం తీవ్రంగా కుంగిపోయారు. అనారోగ్యానికి గురై చాలా పోగొట్టుకున్నారు. జైలుకు వెళ్లిన కారణంగా ఆమె సస్పెండ్ అయ్యారు. 11 నెలలపాటు జైలులో ఉన్నారు. దాదాపు నాలుగున్నరేళ్లపాటు కష్టాలు అనుభవించారు. చివరకు ఆ కేసులో శ్రీలక్ష్మి నిర్దోషి అని తేలడంతో 2016లో ఆమెపై సస్పెన్షన్ ఎత్తివేశారు.

మాతృరాష్ట్రం ఏపీ అయినప్పటికీ, చంద్రబాబు ప్రభుత్వంలో పనిచేయడం ఇష్టం లేకపోవడంతో ఆమె తెలంగాణను ఎంచుకున్నారు. దీంతో ఆమె తెలంగాణ ప్రభుత్వం పోస్టింగ్ ఇచ్చింది. ఈ నేపథ్యంలో తాజాగా ఏపీలో వైఎస్ జగన్ ముఖ్యమంత్రి కావడంతో శ్రీలక్ష్మి అక్కడకు వెళ్లాలని నిర్ణయించుకున్నారు. జగన్ సీఎంగా విజయం సాధించిన తర్వాత ఆయన్ను కలిసి అభినందనలు తెలిపారు. జగన్ సైతం శ్రీలక్ష్మిని సాదరంగా ఆహ్వానించారు. అక్రమ కేసుల్లో ఆమె అనుభవించిన బాధ తెలిసి సానుభూతి ప్రదర్శించారు. తన ప్రభుత్వంలో కీలకమైన బాధ్యతలు అప్పగిస్తానని హామీ ఇచ్చారు. దీంతో శ్రీలక్ష్మి తనను డిప్యుటేషన్ పై ఏపీకి పంపించాలంటూ తెలంగాణ ప్రభుత్వానికి దరఖాస్తు చేసుకున్నారు.

జగన్ తో స్నేహపూర్వక సంబంధాలు కొనసాగిస్తున్న నేపథ్యంలో సీఎం కేసీఆర్ ఈ వినతిపై సానుకూలంగానే స్పందించారు. ఇక కేంద్ర సిబ్బంది వ్యవహారాల శాఖ అనుమతి రావడం ఒక్కటే మిగిలి ఉంది. రెండు రాష్ట్ర ప్రభుత్వాలూ సుముఖంగా ఉన్నందున ఇది ఇక లాంఛనమే. జగన్ ప్రతిష్టాత్మకంగా భావిస్తున్న నవరత్నాల పథకం అమలు బాధ్యతలను శ్రీలక్ష్మికి అప్పగించాలని భావిస్తున్నట్టు తెలిసింది. తద్వారా ఆమెకు గౌరవం ఇవ్వాలని జగన్ యోచిస్తున్నట్టు సమాచారం. ఎలాంటి తప్పూ చేయకపోయినా అక్రమ కేసులతో అనవసరంగా కష్టాలపడి జైలు జీవితం గడిపిన శ్రీలక్ష్మి.. మాతృ రాష్ట్ర ప్రజలకు సేవ చేసేందుకు తిరిగి వస్తుండటం హర్షణీయం.