Sarath Babu: టాలీవుడ్ సీనియర్ నటుడు శరత్ బాబు( Sarath Babu) కన్నుమూశారు. గత కొంతకాలంగా అనారోగ్యంతో బాధపడుతున్న ఆయన హైదరాబాద్ లోని గచ్చిబౌలి ఏఐజి ఆసుపత్రిలో చికిత్స పొందుతున్నారు. శరీరం విషతుల్యం కావడంతో ఆ ప్రభావం ఊపిరితిత్తులు, కిడ్నీ, కాలేయం గుండె పై పడింది. దీంతో శరత్ బాబు ఆరోగ్యం మరింత క్షీణించి కన్నుమూసినట్లు వైద్యులు తెలిపారు.
తన అందం, నటన తో 70, 80 ల్లో టాలీవుడ్ లో స్టార్ నటుడుగా వెలుగొందారు. ఓవైపు హీరోగా నటిస్తూనే మరోవైపు ప్రతినాయక, సహాయక పాత్రల్లో కనిపించారు. నటనకు గాను ఈయన ఏకంగా 8 నంది అవార్డులను అందుకున్నారు. ‘అభినందన’ చిత్రంలో శరత్ బాబు పోషించిన సహాయ పాత్ర ఎప్పటికీ గుర్తుండిపోతుంది. సీతాకోకచిలుక, ఓ భార్య కథ, నీరాజనం చిత్రాలకి గాను సహాయ నటుడు గా నంది అవార్డులు అందుకున్నారు. వీటితోపాటు మరెన్నో హిట్ చిత్రాలు ఈయన ఖాతాలో ఉన్నాయి. తెలుగు, తమిళం, మలయాళం, కన్నడ భాషల్లో 200 చిత్రాలకు పైగా శరత్ బాబు నటించారు. చివరిసారిగా తెలుగులో ‘వకీల్ సాబ్’ చిత్రంలో లాయర్ గా కనిపించారు.
పోలీస్ అవుదామనుకొని ..
శరత్ బాబు అసలు పేరు సత్యం బాబు దీక్షితులు. శ్రీకాకుళంలోని ఆమదాలవలస లో 1951 లో జన్మించారు. శరత్ బాబు పోలీస్ ఆఫీసర్ అవ్వాలని కలలు కనేవారట. అయితే ఆయనకు కంటి సమస్యలు తలెత్తడంతో పోలీస్ కాలేకపోయారు. అనుకోకుండా ఓ పేపర్ యాడ్ చూసి ఆడిషన్ కు వెళ్లారు. అలా డైరెక్టర్ కె బాలచందర్(K Bala Chandar) దర్శకత్వం వహించిన ‘అవరుగల్’ అనే తమిళ చిత్రంతో సినీ పరిశ్రమలోకి అడుగు పెట్టారు. ఆ సినిమా ‘ఇది కథ కాదు’ పేరుతో తెలుగులో రీమేక్ అయింది. చిరంజీవి( Chiranjeevi), కమల్ హాసన్( Kamal Hassan), జయసుధ( Jayasudha), సరిత( Saritha), రమాప్రభ( Ramaprabha) వంటి భారీతరాగణం ఉన్న ఈ సినిమా సూపర్ హిట్ కావడంతో శరత్ బాబు వెనక్కి తిరిగి చూసుకోలేదు. శరత్ బాబు.. 1974 లో సీనియర్ నటి రమాప్రభ ని వివాహం చేసుకున్నారు. కొన్ని కారణాల వల్ల 1988 లో వీరిద్దరూ విడిపోయారు. తర్వాత 1990 లో స్నేహ నంబియార్ ని వివాహం చేసుకుని 2011లో విడాకులు ఇచ్చారు.