‘త్రీడీ’ వెటకారం: అదిరింది రాయుడూ.!

ఏ క్రికెటర్‌కైనా ప్రపంచ కప్‌ పోటీల్లో తన దేశానికి ప్రాతినిధ్యం వహించాలనేది జీవిత లక్ష్యంగా ఉంటుంది. మన తెలుగోడు అంబటి తిరుపతి రాయుడు ఇందుకు అతీతమేమీ కాదు. చాలా చిన్న వయసు నుండే క్రికెట్‌లో రాయుడు పేరు మార్మోగిపోతున్నా, జాతీయ జట్టులో అవకాశాలు మాత్రం చాలా కష్టమయ్యాయి ఈ తెలుగు ఆటగాడికి. ఎవరు అవునన్నా, ఎవరు కాదన్నా, క్రికెట్‌పై ఉత్తరాది పెత్తనం సుస్పష్టం. ప్రతీసారీ తెలుగు నేలకు క్రికెట్‌ పరంగా అన్యాయం జరుగుతూనే వచ్చిందని చాలా సందర్భాల్లో నిరూపితమైంది.

అజారుద్దీన్‌, వి.వి.యస్‌.లక్ష్మణ్‌, వెంకటపతి రాజు.. ఇలా కొందరు సత్తా చాటినా, చాలా మంది తెలుగు క్రికెటర్లు అవకాశాల కోసం వేచి చూడడంతోనే సరిపెట్టేయాల్సి వచ్చింది. ఒకటీ అరా అవకాశాలు వచ్చినా ఆ తర్వాత వివిధ కారణాలు చూపుతూ వారిని పక్కన పెట్టేసిన ఘటనలు కోకొల్లలు. వేణుగోపాలరావు ఆ జాబితాలోకే వస్తాడు. అంబటి రాయుడు విషయానికి వస్తే, సుదీర్ఘ పోరాటం అనంతరం జాతీయ జట్టులో చోటు దక్కించుకుని కొన్ని అద్భుతమైన ఇన్నింగ్స్‌తో కెరీర్‌ని నిలబెట్టుకునేందుకు ప్రయత్నించాడు.

కానీ ఏం లాభం.? త్వరలో జరగనున్న వరల్డ్‌ కప్‌ క్రికెట్‌ పోటీల కోసం ప్రకటించిన తుది భారత జట్టులో చోటు సంపాదించుకోలేకపోయాడు అంబటి రాయుడు. దురదృష్టమేంటంటే, తెలుగు వాడైన ఎమ్‌.ఎస్‌.కె.ప్రసాద్‌ చీఫ్‌ సెలక్టర్‌గా ఉన్నా, అంబటి రాయుడికి చోటు దక్కకపోవడం. తెలుగు వాడు కాబట్టి ఎమ్‌.ఎస్‌.కె.ప్రసాద్‌ చీఫ్‌ సెలక్టర్‌గా సాటి తెలుగువాడైన అంబటి రాయుడికి ఊరికినే సాయం చేయాలనే మాట ఎవరూ అనరు. కానీ అంబటి రాయుడిలో సత్తా ఉంది. మ్యాచ్‌ని మలుపు తిప్పగల టాలెంట్‌ అంబటి రాయుడి సొంతం. మ్యాచ్‌ని అద్భుతమైన ఇన్నింగ్స్‌తో ఎలాంటి పరిస్థితిలోనైనా నిలబెట్టగల దమ్మున్నోడు రాయుడు.

రాయుడి కంటే మిన్నగా ఆడగలడనే నమ్మకంతో విజయ్‌ శంకర్‌ని సెలక్టర్లు ఎంపిక చేయడంపై చాలా విమర్శలు వస్తున్నాయి. ఒత్తిడిని ఏమాత్రం తట్టుకోలేని విజయ్‌ శంకర్‌ వైపు మొగ్గు చూపడం పలు అనుమానాలకు తావిస్తోంది. బౌలింగ్‌, ఫీల్డింగ్‌ విషయంలో రాయుడు కంటే, విజయ్‌ శంకర్‌ మెరుగైన ప్రదర్శన ఇవ్వగలడన్న సెలక్టర్ల అభిప్రాయాన్ని క్రికెట్‌ అభిమానులు ఎవరూ సమర్ధించడం లేదు. టీమ్‌ ఇండియా మాజీ క్రికెటర్‌ గౌతమ్‌ గంభీర్‌ సైతం అంబటి రాయుడుకి మద్దతిచ్చాడు. జరిగిన అన్యాయాన్ని సోషల్‌ మీడియా వేదికగా నిలదీశాడు.

ఇదిలా ఉంటే, సోషల్‌ మీడియాలో అంబటి రాయుడు చేసిన ఓ వ్యాఖ్య ఇప్పుడు పెను సంచలనంగా మారింది. ‘త్రీడీ కళ్లద్దాల కోసం ఆర్డర్‌ చేశాను వరల్డ్‌ కప్‌ని చూసేందుకు..’ అని అంబటి రాయుడు ట్వీట్‌ చేశాడు. ఇప్పుడీ ట్వీట్‌ వైరల్‌గా మారింది. వేలాది మంది అభిమానులు అంబటి రాయుడికి బాసటగా నిలిచారు. ‘అన్నా.. నీకు చాలా అన్యాయం జరిగింది. అయినా హుందాగా వ్యవహరించావు. ధైర్యం కోల్పోవద్దు. నీ కష్టమే నీకొక దారి చూపిస్తుంది. అప్పుడే ఆట ముగిసిపోలేదు.. అద్భుతాలు జరుగుతాయి.. ఖచ్చితంగా వరల్డ్‌ కప్‌ పోటీలో భారత జెర్సీలో నిన్ను మేము మైదానంలో చూస్తాం..’ అని అభిమానులు తమ అభిమాన ఆటగాడికి ధైర్యం చెబుతున్నారు.

క్రికెట్‌లో రాజకీయాలు అందరికీ తెలిసినవే. ఆ రాజకీయాలపై సుతి మెత్తగా అంబటి రాయుడు తనదైన స్టైల్‌లో సెటైర్‌ వేసిన వైనం ఇప్పుడు చర్చనీయాంశంగా మారింది. బ్యాటింగ్‌, బౌలింగ్‌, ఫీల్డింగ్‌.. ఇలా త్రీ డైమన్షన్స్‌లో ఆలోచించి విజయ్‌ శంకర్‌ని ఎంపిక చేశామని చీఫ్‌ సెలక్టర్‌ ఎమ.ఎస్‌.కె చెప్పడాన్ని వెటకారం చేస్తూ రాయుడు ‘త్రీడీ గ్లాసెస్‌’ అనే మాటని తన ట్వీట్‌లో ప్రస్తావించిన వైనం అందరికీ అర్ధమవుతోంది. ఇంతకన్నా తన మనసులోని బాధని రాయుడు ఇంకెలా బయట పెట్టగలడు.?