రాజన్న క్యాంటీన్: వైసీపీ కడుపు మంట చల్లారిందా.?

పేదలకు రూ.5కే భోజనం పెట్టే అన్న క్యాంటీన్లను సెప్టెంబర్ ఒకటో తేదీ నుంచి మళ్లీ ప్రారంభించాలని నిర్ణయం తీసుకుంది. తెలుగుదేశం పార్టీ ప్రభుత్వం ఈ సబ్సిడీ క్యాంటీన్లను తీసుకొచ్చిన సంగతి తెలిసిందే. ప్రతిరోజూ అల్పాహారంతోపాటు రెండు పూటలా భోజనాన్ని రూ.5కే అందించేవారు. భోజన తయారీ, పంపిణీ బాధ్యతలను అక్షయపాత్ర అనే సంస్థ చూసుకునేది. వీరు భోజనానికి రూ.5 చొప్పున వసూలు చేసుకోగా.. ప్రభుత్వం ఉదయం అల్పాహారం, రెండు పూటలా భోజనానికి కలిపి ఆ సంస్థకు రూ.58 చెల్లించేలా ఒప్పందం చేసుకుంది. ఒక్కో క్యాంటీన్లో రోజుకు మూడు పూటలా వెయ్యి నుంచి 1200 మంది ఈ అవకాశాన్ని వినియోగించుకునేవారు.

అయితే,వైఎస్సార్ సీపీ అధికారంలోకి వచ్చిన తర్వాత జూలై 31తో అన్న క్యాంటీన్లను మూసివేసింది. దీనిపై రాష్ట్రవ్యాప్తంగా విమర్శలు వ్యక్తమయ్యాయి. తెలుగుదేశం పార్టీ పలు చోట్ల ఆందోళనలు కూడా నిర్వహించింది. తొలుత ఈ విషయంలో కాస్త మొండిగా వ్యవహరించిన అధికార పార్టీ జరుగుతున్న డ్యామేజీని గుర్తించింది. ఆస్పత్రుల్లో తొలుత వైఎస్సార్ క్యాంటీన్లను ప్రారంభిస్తామని ప్రకటించింది. అయితే, అన్న క్యాంటీన్ల తొలగింపు వ్యవహారంతో నష్టమే ఎక్కువ జరుగుతుందని గుర్తించడంతో వాటిని పున:ప్రారంభించాలని ప్రభుత్వం భావిస్తోంది.

కొన్ని మార్పులు చేర్పులు చేసి సెప్టెంబర్ ఒకటో తేదీ నుంచి ప్రారంభించే అవకాశం ఉందని సమాచారం. ఈ మేరకు అక్షయపాత్ర సంస్థతో ఒప్పందం కుదుర్చుకోనుంది. భోజనంలో కూరల సంఖ్యల పెంచడంతోపాటు నాణ్యత గల ఆహారం అందించే దిశగా సర్కారు కదులుతోంది. అంతే కాకుండా ప్రస్తుతం క్యాంటీన్లకు ఉన్న పసుపు రంగును ఇప్పటికే తెలుపు చేశారు. దానికి వైఎస్సార్ సీపీ జెండా రంగు వచ్చేలా పచ్చ రంగు వేసే అవకాశం ఉందని భావిస్తున్నారు.

క్యాంటీన్లకు రాజన్న పేరు పెట్టే ఛాన్స్ ఉందని అంటున్నారు. మొత్తమ్మీద సెప్టెంబర్ ఒకటో తేదీ నుంచి మళ్లీ రూ.5 భోజనం లభించనుంది. సో, తెలుగుదేశం పార్టీ మీద కడుపు మంటతో పేదోడి కడుపు మాడ్చేసిన వైఎస్సార్ కాంగ్రెస్ ప్రభుత్వం.. ఎట్టకేలకు తన తప్పు తెలుసుకుందన్నమాట. క్యాంటీన్ మీద ఏ పేరు వుంటేనేం.. పేదోడి కడుపు నిండితే అంతకన్నా కావాల్సిందేముంది.?