రాహుల్‌ ‘బాంబు’: కాంగ్రెస్‌ ఖేల్‌ ఖతమ్‌.!

వందేళ్ళకు పైనే ఘన చరిత్ర కలిగిన కాంగ్రెస్‌ పార్టీ, 2014 ఎన్నికలతో దారుణంగా దెబ్బతినేసింది. 2019లో కాస్త పుంజుకున్నా, నిజానికి అది పుంజుకున్నట్లు కానే కాదు. నిజానికి, 2004 ఎన్నికల్లో ఉమ్మడి ఆంధ్రప్రదేశ్‌ నుంచి అత్యధిక సంఖ్యలో ఎంపీలు కాంగ్రెస్‌ తరఫున గెలిచి వుండకపోతే.. అప్పటికే కాంగ్రెస్‌ ఖేల్‌ ఖతమ్‌ అయిపోయి వుండేది. అనారోగ్య సమస్యలతో, కాంగ్రెస్‌ సారధ్య బాధ్యతలు ఎప్పుడైతే వదులుకోవాలని సోనియా నిర్ణయించుకున్నారో, ఆ తర్వాతి నుంచి కాంగ్రెస్‌ పార్టీ పరిస్థితి మరింత దారుణంగా తయారవుతూ వచ్చింది.

రాహుల్‌ గాంధీకి పార్టీ బాధ్యతలు అప్పగించిన సోనియాగాంధీ, ఇప్పుడు అందుకు చింతించాల్సిన దుస్థితి దాపురించిందంటే.. రాహుల్‌, కాంగ్రెస్‌ పార్టీని ఏ స్థాయిలో ముంచేశారో అర్థం చేసుకోవచ్చు. ఓ దశలో రాహుల్‌, కాంగ్రెస్‌కి ఊపు తెచ్చినట్లే కన్పించినా.. ఆ ఊపు తాజా ఎన్నికల్లో కనిపించలేదు. ఎన్నికల్లో గెలవడం, ఓడిపోవడం కాంగ్రెస్‌కి కొత్తేమీ కాదు. కానీ, ఓడిపోయాక.. అధ్యక్ష బాధ్యతల్ని వదులుకోవాలని రాహుల్‌ అనుకోవడమే ఘోర తప్పిదం. రాహుల్‌ నిర్ణయం కాంగ్రెస్‌ పార్టీ పాలిట పెను శాపంగా మారింది.

మొదట్లో ఏదో చిన్నపిల్లాడు.. కామెడీ చేస్తున్నాడని అనుకున్నారు కాంగ్రెస్‌లో సీనియర్లు. కానీ, సీరియస్‌గానే రాహుల్‌ తన రాజీనామాకి కట్టుబడి వున్నట్లు ప్రకటించారు. అంతే, అందరికీ మైండ్‌ బ్లాంక్‌ అయిపోయింది. కొత్త అధ్యక్షుడి ఎంపిక వ్యవహారంపై రాహుల్‌ సీరియస్‌ అవడంతో, సోనియాగాంధీ సైతం తన పుత్రరత్నం తీరు అర్థం కాక షాక్‌కి గురయ్యారట. మరోపక్క, కాంగ్రెస్‌ సారధ్య బాధ్యతలు ప్రియాంకా గాంధీకి అప్పగించాలనే డిమాండ్‌ ఊపందుకుంటోంది. రాహుల్‌కి అప్పగిస్తే.. పార్టీని ఓటమిలోకి నెట్టేసి, బాధ్యతలనుంచి తప్పుకున్నారు.. ప్రియాంకని నమ్ముకుంటే మాత్రం ఏం ప్రయోజనం.? అన్న చర్చ కాంగ్రెస్‌ వర్గాల్లో జరుగుతోంది.

ఎలాంటి పార్టీ, ఎలా అయిపోయింది.? అని కాంగ్రెస్‌ నేతలు నిట్టూరుస్తూ, బీజేపీ వైపు చూడటం తప్ప ఇంకో మార్గం వారికి కనిపించడంలేదు. ‘కాంగ్రెస్‌ ముక్త భారత్‌..’ అంటూ 2014 ఎన్నికల సమయంలో ‘నినదించిన’ బీజేపీకి, అన్నీ అలా కలిసొచ్చేస్తున్నాయ్‌. ఈ సంక్షోభం నుంచి కాంగ్రెస్‌ బయటపడటం అంత ఈజీ కాదు. మొత్తమ్మీద, పార్ట్‌టైమ్‌ పొలిటీషియన్‌ అనే విమర్శల్ని ఎదుర్కొంటూ వచ్చిన రాహుల్‌, ఇన్నాళ్ళకు ఆ విషయాన్ని ప్రూవ్‌ చేసేశారన్నమాట.