ఆంధ్రప్రదేశ్‌లో రాజకీయ శూన్యత వుందా.? లేదా.?

ఆంధ్రప్రదేశ్ రాష్ట్రంలో రాజకీయ శూన్యత వుందా.? లేదా.? ఈ అంశంపై ఇప్పుడు ఆసక్తికరమైన చర్చ అటు రాజకీయ వర్గాల్లోనూ, ఇటు మీడియాలోనూ, ఇంకోపక్క ప్రజల్లోనూ జోరుగా సాగుతోంది. తెలంగాణలో రాజకీయ శూన్యత వుందనీ, అందుకే అక్కడ కొత్త పార్టీలు వస్తున్నాయనీ, ఆంధ్రప్రదేశ్‌లో వైఎస్సార్సీపీ గత ఎన్నికల్లో 151 సీట్లు గెలుచుకున్నాక శూన్యత ఎక్కడ వుంటుందని మంత్రి పేర్ని నాని వ్యాఖ్యానించడమే ఇందుకు కారణం.

అసలు రాజకీయాల్లో శూన్యత ఏర్పడిందని ఎలా తెలుస్తుంది.? తెలిస్తే, దాన్ని భర్తీ చేయడానికి ఎవరెలాంటి ప్రయత్నాలు చేస్తారు. నిజానికి, ప్రజా నాడిని పసిగట్టడం అంత తేలిక కాదు. అధికారంలో వున్నోళ్ళకి, ప్రజా వ్యతిరేకత అస్సలు కనిపించదు.

స్థానిక ఎన్నికల్లో అసలు విపక్షాలు పోటీ చేయకుండా ‘రక్తచరిత్ర’ సృష్టించిన అధికార వైసీపీకి రాష్ట్రంలో ప్రజా వ్యతిరేకత వుందని ఎలా తెలుస్తుంది.? పైగా, ‘మాకు ఓటెయ్యకపోతే మీకు సంక్షేమ పథకాలు రావు..’ అని కీలక నేతలే స్థానిక ఎన్నికల ప్రచారంలో నినదించారాయె. ఆ ఎన్నికల్లో ఫలితాల్ని చూసుకుని, ‘వాపుని బలుపుగా’ అధికార పార్టీ భావిస్తే అంతకన్నా హాస్యాస్పదం ఇంకోటుండదు.

చంద్రబాబు హయాంలో పార్టీ ఫిరాయింపుల్ని ప్రోత్సహించి, ‘వాపుని బలుపు’గా భావించింది అప్పటి టీడీపీ సర్కారు. ఇప్పుడు వైసీపీ సర్కార్, పైన చెప్పుకున్న కొత్త విధానంలో పండగ చేసుకుంటోంది.. ప్రజా వ్యతిరేకత లేదని చెప్పుకుంటూ.

‘మాకు అమ్మవొడి వద్దు..’ అని చిన్న పిల్లలు సైతం ఛీత్కరిస్తున్న వైనం ప్రభుత్వానికి అర్థం కాకపోవడం ఆశ్చర్యకరమేమీ కాదు. అధికారం అనే ‘పొర’ కంటికి కమ్మేశాక.. అలాగే వుంటుంది. తిరుపతి ఉప ఎన్నికల్లో బస్సులు, లారీలు, కార్లు, ఇతర వాహనాల్లో దొంగ ఓటర్లను తీసుకొచ్చి ఓట్లు గుద్దించుకున్నా, ఆశించిన మెజార్టీ వైసీపీకి రాకపోవడం కూడా రాజకీయ శూన్యతలో భాగమే.

స్థానిక ఎన్నికల్లోనో, ఉప ఎన్నికల్లోనో గెలుపు వాపుని చూసి రాజకీయ బలుపు అనుకుంటే.. సార్వత్రిక ఎన్నికల నాటికి, వాపు అనే బుడగ పేలిపోతుంది. పెరుగుతున్న ధరలు, మోత మోగిపోతున్న పన్నులు.. రాజధాని లేకపోవడం.. అధికార పార్టీ నేతల బూతులు, దాడులు.. ఇవన్నీ జనం మెదళ్ళలో గట్టిగానే రిజిస్టర్ అవుతున్నాయ్.