మాకొద్దీ ప్రభుత్వం: అమరావతిలో మహిళల నినాదం.!

‘మాకొద్దీ ప్రభుత్వం.. మేం గెలిపించుకున్న ప్రభుత్వం మమ్మల్ని చంపేస్తోంది.. రాజధాని కోసం మేం మా భూముల్ని త్యాగం చేశాం. ఇప్పుడు మా భూముల్ని తిరిగిచ్చేస్తారా.? మీకు మేమిచ్చిన అధికారాన్ని కూడా తిరిగిచ్చెయ్యండి.. మళ్ళీ ఎన్నికలు జరగాల్సిందే..’ అంటూ ఆంధ్రప్రదేశ్‌ రాజధాని అమరావతిలో మహిళా లోకం నినదిస్తోంది. ఎట్టి పరిస్థితుల్లోనూ వైఎస్‌ జగన్‌ ప్రభుత్వం కొనసాగడానికి వీల్లేదని మహిళలు తేల్చి చెబుతున్నారు.

తాజాగా ఈ రోజు అమరావతిలో మహిళా రైతులకీ, పోలీసులకీ మధ్య వాగ్యుద్ధం చోటు చేసుకుంది. శాంతియుతంగా ఆందోళనలు కొనసాగిస్తున్న తమపైకి పోలీసులు దూసుకొచ్చారనీ, కొట్టుకుంటూ, తిట్టుకుంటూ తమను పోలీస్‌ వ్యాన్లలో ఎక్కించేందుకు ప్రయత్నించారనీ, వ్యాన్‌లోకి ఎక్కించాక మెడకు చున్నీని చుట్టి గొంతు నులిమేయాలని పోలీసులు ప్రయత్నించారనీ ఓ మహిళ కన్నీరు మున్నీరయ్యింది. మరోపక్క, మహిళల్ని తరలించేందుకు సిద్ధం చేసిన వ్యాన్‌కి అడ్డంగా కొందరు వ్యక్తులు నేల మీద పడుకుంటే, ‘తొక్కించెయ్యండి.. చంపెయ్యండి..’ అని పోలీసులే అన్నారంటూ రైతులు వాపోతున్నారు.

ఈ క్రమంలో ఓ వ్యక్తి చేతి మీదకు వ్యాన్‌ ఎక్కించే ప్రయత్నం జరిగిందనీ, మరో రైతు చాకచక్యంగా ఆ వ్యక్తిని బయటకు లాగారనీ సాటి రైతులు చెబుతున్నారు. నిన్ననే వైసీపీకి చెందిన ఓ ముఖ్య నేత, ‘అమరావతిలో హత్యలు జరుగుతాయి.. వాటిని ఆత్మహత్యలుగా చిత్రీకరించే ప్రయత్నం జరుగుతుంది.. రైతులూ జాగ్రత్త..’ అంటూ వివాదాస్పద వ్యాఖ్యలు చేసిన విషయం విదితమే. ఆ వెంటనే ఈ పరిస్థితి తలెత్తడం పట్ల రైతుల్లో ఆందోళనలు పెరుగుతున్నాయి.

ప్రతిపక్షాన్ని బూచిగా చూపే ప్రయత్నంలో అధికార పార్టీనే ఈ తరహా కుట్రల్ని పన్నుతోందన్నది రైతుల ఆరోపణ. కాగా, పోలీసులు ఎవర్నీ కొట్టరనీ, కించపర్చే అవకాశం కూడా లేదనీ, కేవలం శాంతి భద్రతల్ని పరిరక్షించడమే తమ లక్ష్యమనీ పోలీస్‌ ఉన్నతాధి ఒకరు ఈ ఘటనపై స్పందించారు.