జనంలోకి జనసేనాని.. లాభమా.? నష్టమా.?

జనసేనాని మళ్ళీ జనంలోకి వెళ్ళాడు. కొద్ది రోజుల విదేశీ టూర్‌ అనంతరం, ఇటీవలే రాష్ట్రానికి చేరుకున్న జనసేన అధినేత పవన్‌ కళ్యాణ్‌, వస్తూనే.. ఆంధ్రప్రదేశ్‌ రాజకీయాలోల్లో హీటు పుట్టించేలా వ్యవహరిస్తున్నారు. రాజధాని అమరావతి విషయమై జరుగుతున్న రాజకీయ రచ్చపై జనసేన పార్టీ ఆచి తూచి స్పందిస్తోంది. రాష్ట్ర అభివృద్ధికి తాము వ్యతిరేకం కాదనీ, అభివృద్ధి వికేంద్రీకరణ జరగాల్సిందేననీ, రాష్ట్రంలో అన్ని జిల్లాల్నీ సమాంతరంగా అభివృద్ధి చేయాలనీ అంటోన్న జనసేనాని, పరిపాలనా కేంద్రం మాత్రం ఒక్కటే వుండాలని చెబుతున్నారు.

‘ఒక్క చోటే రాజధాని వుండాలని చెప్పడమంటే, ఇతర ప్రాంతాల అభివృద్ధికి వ్యతిరేకం అని కాదు.. మా విధానం సుస్పష్టం. అధికార పార్టీ తన వైఫల్యాల్ని కప్పిపుచ్చుకోవడానికి మూడు రాజధానుల పేరుతో రాష్ట్ర ప్రజల మధ్య ప్రాంతాల వారీగా విద్వేషాలు సృష్టిస్తోంది..’ అంటున్నారు జనసేనాని. రాజధాని అమరావతి ప్రాంత రైతుల్ని పవన్‌ కళ్యాణ్‌ ఈ రోజు కలిశారు. ఆందోళన బాట పట్టిన రైతులకు జనసేన పార్టీ బాసటగా వుంటుందని భరోసా ఇచ్చారు.

ఇప్పటికే జనసేన ముఖ్య నేతలు, రైతుల ఆందోళనలకు సంఘీభావం ప్రకటించిన దరిమిలా, జనసేన పార్టీ తమ ఉద్యమానికి ఇస్తున్న మద్దతు పట్ల రైతులు హర్షం వ్యక్తం చేస్తున్నారు. అయితే, ఈ ఎపిసోడ్‌ మొత్తాన్ని అధికార పార్టీ తనకు అనుకూలంగా ‘ట్విస్ట్‌’ చేసి చూపించేందుకు ప్రయత్నిస్తోంది. విశాఖ అభివృద్ధికి పవన్‌ వ్యతిరేకమనీ, పవన్‌ కళ్యాణ్‌ రాయలసీమ వ్యతిరేకి అనీ.. అధికార పార్టీ నేతలు విమర్శిస్తుండడం గమనార్హం.

ఏదిఏమైనా, ఇప్పుడున్న రాజకీయాల్లో జనసేనాని విధానాలకు సానుకూలత కంటే వ్యతిరేకతే ఎక్కువ వచ్చేలా కన్పిస్తోంది. ఆ విషయం మొన్నటి ఎన్నికలతోనే స్పష్టమయ్యింది. సమస్యలొచ్చినప్పుడు మాత్రమే ప్రజలకు పవన్‌ కళ్యాణ్‌ గుర్తుకొస్తుండడం, ఆ తర్వాత తేలిగ్గా పవన్‌ కళ్యాణ్‌ని జనం పక్కన పెట్టేస్తుండడం చూస్తూనే వున్నాం. రాజకీయంగా పవన్‌కళ్యాణ్‌కి ఈ రాజధాని అంశం కూడా నష్టం చేకూర్చే అవకాశాలే సుస్పష్టం. అయితే, రాజకీయ లబ్ది కోసం కాదు, ప్రజల కోసం తాము రాజకీయాలు చేస్తామని పవన్‌ కళ్యాణ్‌ చెబుతున్నారు.