బ్రేకింగ్: పాక్ బరితెగింపు వెనుక కారణమేంటి?

పొరుగుదేశం పాకిస్తాన్ ఇటీవల కాలంలో పదేపదే మనల్ని కవ్విస్తోంది. డ్రాగన్ అండ చూసుకుని కయ్యానికి కాలు దువ్వుతోంది. గత కొన్నిరోజులుగా సరిహద్దుల వద్ద కాల్పుల ఉల్లంఘనకు పాల్పడుతూ వస్తున్న పాక్.. తాజాగా మరింత హద్దు మీరింది. జమ్మూ కాశ్మీర్ లో సరిహద్దుల వెంబడి శుక్రవారం కాల్పులకు తెగబడింది. ఆయా ఘటనల్లో నలుగురు జవాన్లు అమరులు కాగా, మరో నలుగురు పౌరులు కూడా ప్రాణాలు కోల్పోయారు. మరికొంతమంది గాయపడ్డారు. యురి హీజిపీర్ కమల్ కోట్, బాలాకోట్ ప్రాంతాల్లో పాక్ సైన్యం కాల్పులకు పాల్పడటంతో భారత సైన్యం కూడా ధీటుగా స్పందించింది.

పాకిస్తాన్ బంకర్లు, ఇంధన ట్యాంకులు, లాంచ్ పాడ్లను పేల్చివేసింది. ఈ దాడుల్లో కనీసం 8 మంది పాక్ సైనికులు హతమైనట్టు తెలుస్తోంది. మరో 12 మంగి గాయపడినట్టు సమాచారం. ఆర్థిక సంక్షోభంతో తీవ్రంగా సతమతమవుతున్న పొరుగుదేశం ఇటీవల భారత సరిహద్దుల్లో దూకుడుగా వ్యవహరిస్తోంది. ఈ వ్యవహారంలో మరో పొరుగుదేశం చైనా హస్తం ఉందనే అభిప్రాయాలు వినిపిస్తున్నాయి. సరిహద్దుల్లో ఇప్పటికే తీవ్రంగా సమస్యలు సృష్టిస్తున్న చైనా.. ఓ వైపు పాక్, మరోవైపు నేపాల్ ను మన మీదకు ఉసిగొల్పుతోంది. అన్ని వైపుల నుంచీ మన దేశంపై ఒత్తిడి పెంచడం ద్వారా దురాక్రమణకు పాల్పడాలనే ఎత్తుగడ పన్ని ఉంటుందని చెబుతున్నారు.

జూన్ లో గాల్వాన్ లోయలో జరగిన ఘటనలో పెద్ద సంఖ్యలో తన సైనికులను కోల్పోయిన చైనా.. తాను వెనుకుండి పాక్ ను రెచ్చగొడుతుందని అంటున్నారు. డ్రాగన్ అండ చూసుకునే దాయాది దేశం రెచ్చిపోతోందని.. ఇటు ఉగ్రవాద దాడులకు తెగబడుతూనే, కాల్పుల విరమణ ఒప్పందానికి తూట్లు పొడిచి తన సైన్యంతో యథేచ్ఛగా కాల్పులకు తెగబడుతోందని పేర్కొంటున్నారు. గతేడాది మన వాయుసేన కమాండర్ అభినందన్ అప్పగింత వ్యవహారంలో ఆర్మీ చీఫ్ వణికిపోయాడని ఆ దేశ మంత్రి చెప్పడంతో కాస్త డ్యామేజీ జరిగింది. దీంతో ఈ వ్యవహారాన్ని కప్పిపుచ్చుకునేందుకు పుల్వామా దాడి తమ ఘనతే అని పార్లమెంటు సాక్షిగా ప్రకటించుకుంది. ఇదే క్రమంలో చైనా అండతో సరిహద్దుల్లో దురాగతాలకు పాల్పడుతోంది.