మూడు రాజధానులపై వెనక్కి తగ్గరు.! ముందుకు వెళ్ళరు.!

ఏ రాష్ట్రంలో అయినా, అధికార పార్టీ.. ఆ రాష్ట్ర రాజధాని విషయంలో అయోమయం సృష్టిస్తుందా.? ఇట్ హ్యాపెన్స్ ఓన్లీ ఇన్ ఇండియా.! దేశంలో ఏ రాష్ట్రాన్నైనా తీసుకోండి.. ఏ అధికార పార్టీని అయినా తీసుకోండి.! రాజధాని కేంద్రంగా ఎక్కువ అభివృద్ధి చేయాలనుకుంటాయి. ప్రత్యేకంగా అభివృద్ధి చేసినా, చెయ్యకపోయినా.. రాజధాని అభివృద్ధి చెందుతుంటుంది.. రాజధానికి వుండే ప్రత్యేకత అదే.

జిల్లా కేంద్రాల్ని తీసుకుంటే.. జిల్లాలో మిగతా పట్టణాలతో పోల్చితే, జిల్లా కేంద్రమే ఎక్కువ అభివృద్ధి చెందుతుంటుంది. చాలా అరుదుగా మాత్రమే ఓ జిల్లాలో ఇంకో పట్టణం, జిల్లా కేంద్రం కంటే ఎక్కువ అభివృద్ధి చెందడం చూస్తుంటాం. దానికి మళ్ళీ ప్రత్యేక కారణాలుంటాయ్.

ఉమ్మడి తెలుగు రాష్ట్రం రెండుగా విడిపోయాక, పాత పేరుతో 13 జిల్లాలతో ఏర్పడ్డ కొత్త రాష్ట్రం ఆంధ్రప్రదేశ్‌కి రాజధాని అవసరమైతే, చంద్రబాబు ప్రభుత్వం అమరావతిని రాజధానిగా ప్రకటించింది. నిజానికి, అప్పట్లోనో విజయవాడ, విశాఖపట్నం, కర్నూలు, తిరుపతి నగరాల్లో దేన్నో ఒకదాన్ని రాజధానిగా ప్రకటించి వుండాలి.

సరే, అప్పటి ప్రభుత్వం ఓ నిర్ణయం తీసుకుంది.. దానికి అప్పటి ప్రతిపక్షమూ ఆమోద ముద్ర వేసింది. ఛత్, చంద్రబాబు ప్రకటించిన రాజధాని అమరావతిని తానెందుకు అభివృద్ధి చేయాలి.? అని అనుకున్నట్టున్నారు ప్రస్తుత ముఖ్యమంత్రి వైఎస్ జగన్. ప్రతిపక్ష నేతగా వున్నప్పుడు లేని అభ్యంతరాలు, ముఖ్యమంత్రి అయ్యాక వచ్చాయి వైఎస్ జగన్ మోహన్ రెడ్డికి.

రాజధాని మీద వైసీపీకి అక్కసు వుందా.? లేదంటే, రాష్ట్రం మీదనే వైసీపీకి అక్కసు వుందా.? అన్న అనుమానాలు కలుగుతున్నాయిప్పుడు. మూడు రాజధానుల పేరుతో.. దాదాపు మూడేళ్ళు కాలయాపన చేసేశారు. ఇప్పుడేమో, సుప్రీంకోర్టును ఆశ్రయించారు.. అసలు రాష్ట్రాన్ని ఏం చేద్దామని వైసీపీ అనుకుంటోందిట.?

రాష్ట్రంలో రోడ్లు సరిగ్గా లేవు.. రోడ్లను బాగు చేయలేని ప్రభుత్వం, రాజధానులు కట్టేస్తామంటోంది.. అసలది ఎలా సాధ్యం.? వచ్చే ఎన్నికల దాకా విషయాన్ని సాగదీయాలనే ఉద్దేశ్యం, నెపాన్ని కోర్టుల మీదా, విపక్షాల మీద నెట్టేయాలన్న కుత్సిత రాజకీయం.. వెరసి, వైసీపీ రాష్ట్రానికి తీరని నష్టం చేసింది, చేస్తూనే వుంది.
మూడు రాజధానుల విషయం ముందుకెళ్ళదు.. వెనక్కీ తగ్గదు. మధ్యలో రాష్ట్రం నాశనమైపోతుంది. ఇదీ వైసీపీ అత్యద్భుత పాలన.!