‘మన్మథుడు-2’కి కత్తెరేస్తున్న నాగార్జున.!

అక్కినేని నాగార్జున నుంచి అతి త్వరలో రాబోతోన్న ప్రతిష్టాత్మక చిత్రం ‘మన్మథుడు-2’. చాలాకాలం క్రితం నాగార్జున హీరోగా వచ్చిన ‘మన్మథుడు’ పెద్ద హిట్‌. దాన్ని మించేలా ‘మన్మథుడు-2’ సినిమాని నాగ్‌ ప్లాన్‌ చేసిన మాట వాస్తవం. అయితే, యంగ్‌ హీరో రాహుల్‌ రవీంద్రన్‌, దర్శకుడిగా మారి.. సినిమాలో ‘హాట్‌ స్టఫ్‌’ని పెంచేశాడు. పైగా, ప్రమోషన్స్‌లో ఆ ‘అడల్ట్‌ స్టఫ్‌’ ఎక్కువ హైలైట్‌ అవుతోంది. దురదృష్టవశాత్తూ అదే ఇప్పుడు ‘మన్మథుడు-2’ సినిమాపై నెగెటివ్‌ ఇంపాక్ట్‌ చూపించేస్తోంది.

వస్తోన్న ఫీడ్‌ బ్యాక్‌ చూసి నాగార్జున బాగా అప్‌సెట్‌ అయ్యాడట. మరోపక్క, దర్శకుడు రాహుల్‌ రవీంద్రన్‌ భార్య చిన్మయి సోషల్‌ మీడియాలో ప్రదర్శిస్తున్న అత్యుత్సాహం ‘మన్మథుడు-2’కి మరో తలనొప్పిగా తయారైంది. చిన్మయి నీతుల పట్ల విసిగిపోయిన నెటిజన్స్‌, ఆ అసహనాన్ని ‘మన్మథుడు-2’ సినిమా మీద చూపిస్తున్నారు అప్పుడే. ‘ఇంత వల్గర్‌ సినిమానా.. నీ భర్త తీసింది.?’ అంటూ నెటిజన్లు వేస్తున్న కామెంట్లు.. చిన్మయికి తగులుతున్నాయో లేదోగానీ, అక్కినేని నాగార్జునని బాగా హర్ట్‌ చేస్తున్నాయట.

నాగార్జున ట్రూ జెంటిల్‌మెన్‌. ఎప్పుడూ ఆయన వివాదాల జోలికి వెళ్ళడానికి ఇష్టపడరు. తన సినిమాల విషయంలో క్లీన్‌గా వుండడానికే ఆయన మొగ్గు చూపుతారు. సినిమాల్లో హాట్‌ కంటెంట్‌.. అనేది వేరే విషయం. కానీ, వల్గర్‌ టచ్‌ తన సినిమాలకు వుండాలని ఆయనెప్పుడూ ఆశించరు. ఆ వల్గర్‌ టచ్‌ ఇప్పుడు ‘మన్మథుడు-2’ సినిమాకి అంటేసుకుంది. దాంతో, ఆ వల్గర్‌ ఆరోపణల్ని తట్టుకోవడానికి సినిమాలో కొన్ని కత్తిరింపులు తప్పవనే నిర్ణయానికి నాగార్జున వచ్చారట.

క్లీన్‌గా వుండే ప్రోమో ఒకటి విడుదల చేయాలని నాగ్‌ ఆదేశించడంతో, ఆ దిశగా కసరత్తులు ప్రారంభమయ్యాయట. సమంత, కీర్తి సురేష్‌ గెస్ట్‌ రోల్స్‌ చేస్తోన్న ఈ సినిమాలో నాగార్జున సరసన రకుల్‌ ప్రీత్‌ సింగ్‌ హీరోయిన్‌గా నటిస్తున్న విషయం విదితమే. ఏదిఏమైనా ‘మన్మథుడు’ చాలా క్లీన్‌ సినిమా.. ఆ గౌరవం ఆ సినిమాకి వుండాలంటే, నాగ్‌ అభిమానులు ఆశిస్తున్నట్లు ‘మన్మథుడు-2’ సినిమాలో ఆ ‘అడల్ట్‌’ టచ్‌ అస్సలేమాత్రం కన్పించకూడదు.