పెగాసస్ ఎఫెక్ట్: కరోనా ముప్పు నుంచి మోడీ సర్కార్ సేఫ్.!

కరోనా వైరస్ కంటే పెద్ద సమస్య దేశంలో ఏదైనా వుందా.? వేలాది మందిని బలిగొన్న కరోనా వైరస్, ఈ క్రమంలో ప్రభుత్వ వైఫల్యాలు.. ఇవేవీ చర్చకు రాలేదు. కానీ, కేవలం పెగాసస్ చుట్టూనే రాజకీయ రచ్చ జరుగుతోంది పార్లమెంటు సమావేశాల సాక్షిగా. అసలేం జరుగుతోంది దేశంలో.?

చిత్రమేంటంటే, కేంద్రాన్ని తెలుగు రాష్ట్రాల మధ్య నీటి వివాదంపై నిలదీస్తామన్న తెలంగాణ రాష్ట్ర సమితి, పూర్తిగా సైలెంటయిపోయింది. ఆంధ్రప్రదేశ్‌లోని అధికార వైసీపీ, పార్లమెంటు సాక్ష్షిగా తమ రెబల్ ఎంపీపై అనర్హత వేటు కోసం పోరాడుతోంది. జాతీయ స్థాయిలో ప్రధాన ప్రతిపక్షమైన కాంగ్రెస్ పార్టీ, మోడీ సర్కార్ విసిరిన పెగాసెస్ ఉచ్చులో ఇరుక్కుపోయి విలవిల్లాడుతోంది.

నిజమే, పెగాసస్ స్పై వేర్ అంశంపై చర్చ జరగాల్సిందే. అదీ ప్రాముఖ్యమైన అంశమే. కానీ, ప్రజల ప్రాణాలకంటే తీవ్రమైన అంశమైతే కాదది. అసలు దేశంలో ఆక్సిజన్ కొరత కారణంగా ప్రజలెవరూ ప్రాణాలు కోల్పోలేదని కేంద్రంలోని నరేంద్ర మోడీ సర్కార్, అంత తేలిగ్గా ఎలా పార్లమెంటు వేదికగా ప్రకటించగలిగింది.? ఎందుకంటే, అడిగే దిక్కు లేదు గనుక.

ఆక్సిజన్ కొరత కారణంగా ప్రాణాలు కోల్పోయిన వేలాది మందిలో ఒక్కరూ దెయ్యాల రూపంలో అయినా వచ్చి, పార్లమెంటు సాక్షిగా తమని చంపేసింది ఆక్సిజన్ కొరత.. అని చెప్పే అవకాశం లేదు కదా.? పోనీ, విపక్షాలు, ఇతర రాజకీయ పార్టీలైనా, వాస్తవాల్ని పార్లమెంటు ముందుంచుతాయా.? అంటే అదీ లేదు.

దేశంలో చిత్ర విచిత్రమైన రాజకీయం నడుస్తోంది. ఎవరు అధికారంలో వున్నా, చట్ట సభల నిర్వహణ విషయమై ఓ పద్ధతి ప్రకారం గందరగోలం సృష్టిస్తున్నారు. కీలకమైన సమస్యలేవీ చర్చకు రాకుండానే చట్ట సభల నిర్వహణ గత కొన్నేళ్ళుగా అత్యంత సజావుగా (జుగుప్సాకరంగా) జరుగుతోందన్నది బహిరంగ రహస్యం. రావడం, గొడవ చేయడం.. సభ వాయిదాల మీద వాయిదా పడటం.. ఇదే చట్ట సభల నిర్వహణ అంటే. రాష్ట్రాల స్థాయిలో అసెంబ్లీ, శాసన మండలి ఎలా నిర్వహించబడుతోందో, అంతకు మించి గొప్పగా పార్లమెంటు ఉభయ సభలు నిర్వహించబడతాయని ఆశించగలమా.?

దేశంలో కరోనా సెకెండ్ వేవ్ వైఫల్యం.. పూర్తిగా కేంద్ర, రాష్ట్ర ప్రభుత్వాలదే. మరి, ప్రజలకు క్షమాపణ చెప్పాలన్న ఇంగితం ఎవరికైనా వుందా చట్ట సభల్లో.? సామాన్యుల ప్రాణాలే కాదు, ప్రజా ప్రతినిథులు కూడా ప్రాణాలు కోల్పోయారు కరోనా వల్ల. అందులో పార్లమెంటు సభ్యులూ వున్నారు. అయినా సరే, వ్యవస్థ మారదు.. బాధ్యత గుర్తెరగదు.