అంగారక నగరానికి వెళ్లొద్దమా?

భూమ్మీద కాకుండా ఇతర గ్రహాలపై ఆవాసం ఏర్పరుచుకోవాలన్ని మనిషి కల. అటు చంద్రుడిపైనో లేక ఇటు అంగారక గ్రహంపైనో మానవులు నివసించడానికి వీలుగా కాలనీలు ఏర్పాటు చేయాలనే ప్రయత్నాలు ఎప్పటి నుంచో జరుగుతున్నాయి. ఈ నేపథ్యంలో అంగారక గ్రహంపై నగరాన్ని నిర్మిస్తే.. ఇలా కడితే బాగుంటుందంటూ అబిబో అనే ఆర్కిటెక్చర్ సంస్థ ఓ ప్రణాళిక సిద్ధం చేసింది. చైనా దేవతల్లో ఒకరైనా ‘నువా’ పేరుతో ఈ ప్రణాళికను సిద్ధం చేశారు. టెస్లా కంపెనీ అధినేత ఎలన్ మస్క్.. 2050 నాటికి అంగారక గ్రహంపై ఓ కాలనీ కడతానంటూ ప్రకటించిన నేపథ్యంలో అబిబో రూపొందంచిన ప్లాన్ ప్రాధాన్యత సంతరించుకుంది.

ఈ డిజైన్ ప్రకారం అంగారకుడిపై థార్సిస్ ప్రాంతంలో టెంపే మెన్సా శిఖరానికి ఒకవైపు గుహల వంటి నిర్మాణాలతో ఉండే నువాలో దాదాపు రెండున్నర లక్షల మంది ఉండొచ్చు. ఒక్కో ఇల్లు 25 నుంచి 35 చదరపు మీటర్ల విస్తీర్ణంలో ఉంటుంది. అరుణ గ్రహంపై వెలువడే రేడియో ధార్మికత నుంచి రక్షణ కల్పించేందుకు వీలుగా నువాలో ప్రత్యేక ఏర్పాట్లు చేస్తారు. ఈ శిఖరానికి ఓ వైపు రేడియో ధార్మికత తక్కువగా ఉంటుంది. అందువల్లే నువా నిర్మాణానికి ఈ ప్రాంతాన్ని ఎంచుకున్నారు. ఇక మనుషులు జీవించడానికి అవసరమైన గాలి, నీరు, ఆహారం అన్నీ అక్కడే తయారు చేసుకోవాలి. అక్కడే వ్యవసాయం చేసుకునే ఏర్పాట్లు కూడా ఉంటాయి.

ఇక శిఖరం దిగువ భాగంలో నువాలో నివసించేవారు ఒకరిని ఒకరు కలుసుకోవడానికి వీలుగా తగిన ఏర్పాట్లు చేస్తారు. భూమి నుంచి అరుణ గ్రహానికి, అరుణ గ్రహం నుంచి భూమికి వచ్చేందుకు అవసరమయ్యే స్పేస్ స్టేషన్, స్థానికంగా అటూ ఇటూ తిరిగేందుకు రైలు కూడా అందుబాటులో ఉంటుంది. ఇది ఎప్పుడు కడతారు అనేదానిపై ప్రస్తుతానికి జవాబు లేదు. కానీ విశ్వంలో ఎన్నో విజయాలు సాధించిన మానవుడు.. అంగారకుడిని కూడా జయిస్తాడు అనడంలో మాత్రం సందేహం లేదు.