లగడపాటి సర్వే ముందే వచ్చింది!

ఆంధ్రా ఆక్టోపస్‌గా పేరుగాంచిన విజయవాడ మాజీ ఎంపీ లగడపాటి రాజగోపాల్‌ అనూహ్యంగా మీడియా ముందు ప్రత్యక్షమయ్యారు. ఎగ్జిట్‌ ఫలితాలను వెల్లడించేందుకు మరో రోజు సమయం ఉన్నప్పటికీ, చూచాయగా తన సర్వే వివరాలను బయటపెట్టారు. రాజధాని ప్రాంతానికి వచ్చిన సందర్భంగా విలేకరుల సమావేశం ఏర్పాటు చేశానని, తన సర్వే ఫలితాలను ఆదివారం సాయంత్రం 6 గంటలకు తిరుపతిలో వెల్లడిస్తానని చెబుతూనే తెలంగాణలో ఎవరికి ఎక్కువ సీట్లు వస్తాయి? ఏపీలో అధికారం ఎవరిది అనే అంశాల్లో స్పష్టత ఇవ్వడం గమనార్హం. ఏపీలో హంగ్‌ వచ్చే అవకాశం లేదని లగడపాటి స్పష్టంచేశారు. ప్రజలు ఒక పార్టీకే కచ్చితమైన మెజార్టీ ఇచ్చారని పేర్కొన్నారు.

ఏపీలో ప్రధానంగా మూడు పార్టీల మధ్యే పోరు జరిగిందని, 95 శాతం మంది ఓటర్లు మూడు పార్టీలకు ఓటేశారని వివరించారు. తెలంగాణలో మిగులు బడ్జెట్‌ ఉన్న కారణంగా అక్కడి ప్రజలు కారు ప్రయాణాన్నే కోరుకున్నారని.. లోటు బడ్జెట్‌తో ఉన్న ఆంధ్రప్రదేశ్‌ ఓటర్లు సైకిల్‌తో సరిపెట్టుకున్నారంటూ అసలు విషయం చెప్పకనే చెప్పేశారు. తెలంగాణలో టీఆర్‌ఎస్‌ అధిక సీట్లు గెలుచుకుంటుందని, ఏపీలో అధికారం టీడీపీదేనంటూ పరోక్షంగా వెల్లడించారు. ఎన్నికల కోడ్‌ అమల్లో ఉన్నందున పూర్తి వివరాలు ఇప్పుడు వెల్లడించలేనంటూ చూచాయగా విజయం ఎవరిదో లగడపాటి తెలివిగా వివరించారు.

ఇక జనసేన అధినేత పవన్‌ కల్యాణ్‌ అసెంబ్లీలో అడుగు పెట్టడం ఖాయమని పేర్కొన్నారు. అయితే, ఆయన పార్టీకి ప్రజారాజ్యం కంటే తక్కువ సీట్లు వస్తాయన్నారు. తనకు ఏ రాజకీయ పార్టీతో అనుబంధం లేదని, ప్రజల నాడి తెలుసుకోవడం తన హాబీ అని, అందుకే సర్వే చేయిస్తుంటానని తెలిపారు. గతంలో తెలంగాణలో తాను చెప్పినదానికి వ్యతిరేక ఫలితం వచ్చిందని ప్రస్తావిస్తూ.. అన్నిసార్లు సరైన ఫలితం రావాలని ఏమీ లేదని వ్యాఖ్యానించారు. ప్రజానాడి తెలుసుకుని ఆదివారం తిరుపతిలో మొత్తం వివరాలు వెల్లడిస్తానని చెప్పారు.

తాను చెప్పబోయే ఫలితాలు రాజకీయ కోణంలో చూడొద్దన్నారు. అయితే, లగడపాటి సర్వే ఫలితాలను వెల్లడించడంపై వైఎస్సార్‌ సీపీ మండిపడింది. చంద్రగిరిలో ఆదివారం రీపోలింగ్‌ జరగనున్న నేపథ్యంలో ఓటర్లను ప్రభావితం చేయడానికి లగడపాటి ‍ప్రయత్నిస్తున్నారని విమర్శించింది. గతంలో తెలంగాణ ఎన్నికల సమయంలో కూడా ఆయన ఇలాగే వ్యవహరించారని గుర్తు చేసింది. తాజాగా టీడీపీ నేత బుద్దా వెంకన్నతో భేటీ తర్వాత విలేకరుల సమావేశం ఏర్పాటు చేసి నిబంధనలకు విరుద్ధంగా సర్వే ఫలితాలు వెల్లడించారని దుయ్యబట్టింది.