పెద్దలు పవన్ కళ్యాణ్.! సోదరుడు కేటీయార్.!

‘తెలంగాణలో సినీ పరిశ్రమ మరింతగా అభివృద్ధి చెందేందుకు పెద్దలు పవన్ కళ్యాణ్ గారు ప్రభుత్వానికి తమవంతు సహాయ సహకారాలు అందించాలి..’ అంటూ నిన్న ‘భీమ్లానాయక్’ సినిమా ప్రీ రిలీజ్ వేడుక సందర్భంగా మంత్రి కల్వకుంట్ల తారకరామారావు చేసిన వ్యాఖ్యలు, చాలామందికి ‘ఎక్కడో కాలేలా’ చేశాయి.

‘పవన్ కళ్యాణ్ ఎవరు.? ఆయన సినిమాలకు అంత సీన్ లేదు.. ప్రభాస్ కంటే, అల్లు అర్జున్ కంటే, జూనియర్ ఎన్టీయార్, రామ్ చరణ్ కంటే.. మెగాస్టార్ చిరంజీవి కంటే గొప్పగా ఏం ఊడబీకేశాడట..’ అంటూ ఓ మంత్రిగారు (ఏపీకి చెందానాయన) వ్యాఖ్యానించిన విషయం విదితమే.

‘మీరు సినీ పరిశ్రమ వైపా.? పవన్ కళ్యాణ్ వైపా.?’ అంటూ ఓ సినీ మూర్ఖుడు మొన్నామధ్య ‘మా’ ఎన్నికల నేపథ్యంలో చెత్త వాగుడు వాగాడు. తెలంగాణ ప్రభుత్వానికి తెలుసు, హైద్రాబాద్‌లో సినీ పరిశ్రమ ప్రాముఖ్యత ఏంటో. ఆ పరిశ్రమలో ఎవరు ముఖ్యులో, ఎవరి కారణంగా సినీ పరిశ్రమకు వెలుగులు కొనసాగుతున్నాయో.!

ఇక, కేటీయార్ తనతో సినీ పరిశ్రమకు సంబంధించి అంశాలపై చర్చించడం పట్ల పవన్ కళ్యాణ్ కూడా మనస్ఫూర్తిగా కృతజ్ఞతలు తెలియజేశారు. ముఖ్యమైన అధికారిక కార్యక్రమాలున్నాసరే, తన సినిమా ప్రీ రిలీజ్ వేడుకకు కేటీయార్ రావడం పట్ల హర్షం వ్యక్తం చేశారు పవన్ కళ్యాణ్. ‘ఎంత భావ వైరుద్యాలున్నా.. రాజకీయ విమర్శలు చేసుకున్నా.. వాటిని కళకు, సంస్కృతికి అంటనీయకపోవడం తెలంగాణ రాజకీయ నేతల శైలిలో వుంది..’ అంటూ పవన్ కళ్యాణ్, ప్రత్యేకంగా ప్రెస్ నోట్ విడుదల చేయడం ఏపీలోని అధికార పార్టీ నేతలకు పుండు మీద కారం చల్లినట్లయ్యింది.

‘భీమ్లానాయక్’ సినిమాని తమకు చేతనైనంతగా దెబ్బ తీయడానికి నానా తంటాలూ పడుతున్నారు వైసీపీ నేతలు. కొత్త కొత్త ఆలోచనలు చేస్తున్నారు, ఆ సినిమాని దెబ్బతీయడానికి.

ఒక్క మాటలో చెప్పాలంటే అధికార వైసీపీ అహంకారానికీ, ‘భీమ్లానాయక్’ సినిమా అభిమానుల ఆత్మగౌరవానికీ మధ్య జరుగుతున్న యుద్ధంలా మారిపోయిందిప్పుడు పరిస్థితి. ఎంత గింజుకున్నా, ‘భీమ్లానాయక్’ సినిమా విడుదలనైతే బులుగు బ్యాచ్ అడ్డుకోలేదు కదా.? ఇంకెందుకీ అర్థం పర్థం లేని అహంకారం.? అధికారం వుంది కాబట్టే.!