ఎన్నిక‌ల్లో ప్ర‌జ‌ల అభిమ‌తం గెల‌వాలి : కేసీఆర్‌

మహబూబ్‌నగర్‌ జిల్లా భూత్పూర్‌ బహిరంగ సభలో ఓట్లు, రాజకీయాల కోసం ప్రధాని నరేంద్ర మోదీ పచ్చి అబద్ధాలు మాట్లాడారని తెలంగాణ సీఎం కేసీఆర్ ఆరోపించారు. రాష్ట్రంలో అమల్లో ఉన్న ఆరోగ్యశ్రీని కాపీ కొట్టి ఆయుష్మాన్‌ భారత్‌ పథకం తీసుకొచ్చారని పేర్కొన్నారు.

మిర్యాల‌గుడ ఎన్నికల ప్రచార సభలో కేసీఆర్‌ మాట్లాడుతూ.. తాము చేపట్టిన అభివృద్ధి, సంక్షేమ కార్యక్రమాలను ప్రజలకు వివరిస్తూనే కేంద్రంలో బిజెపి, కాంగ్రెస్‌ పాలనపై తీవ్రస్థాయిలో విరుచుకుపడ్డారు. ఆయుష్మాన్‌ భారత్‌ పథకం కింద ఇచ్చేది చాలా తక్కువని, దానికంటే మెరుగ్గా ఆరోగ్యశ్రీ ఉన్నందునే తాను తిరస్కరించానని చెప్పారు.

ఈ రెండింటిలో ఏది గొప్పదో చర్చకు రావాలని సవాల్‌ విసిరారు. మోదీ ఐదేళ్ల పాలనలో ఏం చేశారో ప్రజలు ఆలోచించాలని సూచించారు. రైతులు, దళితులు, గిరిజనులు, ముస్లిం మైనార్టీలు, బిసిలకు ఏమైనా చేశారా? అని మోడీని ప్ర‌శ్నించారు. . గాంధీలు ఓ వైపు.. చౌకీదార్‌లు మరోవైపు తమ ప్రచారాలతో దేశంలో మైకులు పగులుతున్నాయి తప్ప ప్రజలకు మాత్రం ఏమీ ఒరగడంలేదని కేసీఆర్ అన్నారు.

‘‘దేశాన్ని సుమారు 72 ఏళ్లు పాలించిన ఈ రెండు పార్టీలు బిసి మంత్రిత్వశాఖ పెట్టలేదు. ఎందుకు పెట్టరని ప్రశ్నిస్తున్నా. దేశంలో గుణాత్మక మార్పు రావాలి. దేశం కొత్తబాట పట్టాలి. ప్రజల బాధలు ఈ రెండు పార్టీలతో తీరవు. ఎన్నికల్లో గెలవాల్సింది పార్టీలు, వ్యక్తులు కాదు.. ప్రజల అభిమతం.. అదే విజయం సాధించాలి. ప్రజలు ఎవరిని గెలిపించాలని కోరుకుంటారో వాళ్లే గెలవాలి. ఆర్థిక ప్రగతిలో నంబర్‌ 1, కరెంటు సరఫరాలో నంబర్‌ 1, సోలార్‌ విద్యుదుత్పత్తిలో 2 స్థానం.. ఇలా తెలంగాణ అద్భుతంగా ప్రగతి మార్గంలో వెళుతోంది. ప్రజా సంక్షేమబాట పట్టింది. దాన్ని చూసే అసెంబ్లీ ఎన్నికల్లో అద్భుతమైన విజయం అందించారు. ఆంధ్రప్రదేశ్‌లో గతంలో బందీలుగా ఉన్నాం.. ఇప్పుడు స్వతంత్రులుగా ఉన్నాం. రైతులకు నీళ్లు ఇచ్చే బాధ్యతను తీసుకుంటా. చివరి ఎకరానికి కూడా నీళ్లు ఇస్తాం. లోక్‌సభ ఎన్నికల తర్వాత అన్ని జిల్లాల్లో పర్యటిస్తా. జిల్లాలో 3, 4 రోజులు ఉండి సమస్యలు పరిష్కరిస్తా. జిల్లాలో ఎత్తిపోతల పథకాలు, కాలువల సమస్యలు పరిష్కరిస్తా’’ అని కేసీఆర్‌ భరోసా ఇచ్చారు.