కర్ణాటక పంచాయతీ తేలింది.. ఏపీది ఎప్పుడో?

కరోనా కారణంగా వాయిదా పడిన కర్ణాటక పంచాయతీ ఎన్నికలకు నగారా మోగింది. డిసెంబర్ 22, 27వ తేదీల్లో రెండు విడతలుగా పంచాయతీ ఎన్నికలు నిర్వహించాలని ఆ రాష్ట్ర ఎన్నికల సంఘం నిర్ణయం తీసుకుంది. ఫలితాలు 30న వెలువరించనుంది. ఈ మేరకు షెడ్యూల్ విడుదల చేసింది.

కర్ణాటకలో పంచాయతీల కాలపరిమితి ఈ ఏడాది జూన్ తో ముగిసింది. అయితే, కరోనా కల్లోలం కారణంగా అక్కడ ఎన్నికలను ఎన్నికల సంఘం ఆరు నెలలపాటు వాయిదా వేసింది. ఈ క్రమంలో ఎన్నికల నిర్వహణకు ఎస్ఈసీ సమాయత్తం కాగా, పలువురు హైకోర్టులో పిటిషన్లు వేశారు. అయితే, హైకోర్టులో ఎన్నికల నిర్వహణకు అనుకూలంగా తీర్పు వెలువడింది. అనంతరం సుప్రీంకోర్టు సైతం దానిని సమర్థించింది. దీంతో ఎస్ఈసీ ఎన్నికల షెడ్యూల్ విడుదల చేసింది.

ప్రస్తుతం కర్ణాటకలో కరోనా కేసులు పెరుగుతున్నాయి. అయినప్పటికీ ఎన్నికల నిర్వహణకు ఎస్ఈసీ మొగ్గు చూపడం విశేషం. ఇక ఏపీ విషయానికొస్తే కరోనా సాకు చూపించి ఇప్పట్లో స్థానిక సంస్థల ఎన్నికలు నిర్వహించడం సాధ్యం కాదని అధికార పార్టీ నేతలు తెగేసి చెబుతున్నారు. ఎస్ఈసీ నిమ్మగడ్డ రమేశ్ కుమార్ తో ఉన్న విభేదాల కారణంగానే వైసీపీ ఇలా వ్యవహరిస్తోందన్నది అందరికీ తెలిసిన విషయమే. ఈ విషయంపై గత కొంతకాలంగా ఏపీ సర్కారు వర్సెస్ నిమ్మగడ్డ అన్నట్టుగా పోరు సాగుతోంది.

ప్రస్తుతం ఈ వ్యవహారం హైకోర్టులో ఉంది. ఇప్పటికే తెలంగాణలో జీహెచ్ఎంసీ ఎన్నికలు జరుగుతుండగా.. పలు రాష్ట్రాలు స్థానిక సంస్థల ఎన్నికల నిర్వహణకు సిద్ధమవుతున్నాయి. కానీ ఏపీ సర్కారు మాత్రం ససేమిరా అంటోంది. ఈ నేపథ్యంలో కర్ణాటక హైకోర్టు ఆ రాష్ట్ర పంచాయతీ ఎన్నికల విషయంలో చేసిన వ్యాఖ్యలు ప్రాధాన్యత సంతరించుకున్నాయి. స్థానిక సంస్థల ఎన్నికలను నిర్దేశిత కాలం మేరకు వాయిదా వేసే అధికారం రాష్ట్ర ఎన్నికల సంఘానికి ఉంటుందని కర్ణాటక హైకోర్టు పేర్కొంది. ఈ వ్యవహారంలో జోక్యం చేసుకునే అధికారం రాష్ట్ర ప్రభుత్వానికి లేదని స్పష్టంచేసింది.

‘‘రాష్ట్రంలో ఏవైనా అసాధారణ పరిస్థితులు ఉన్నాయా లేదా అనేది ఎస్ఈసీ ప్రత్యేకంగా నిర్ణయించాల్సిన అంశం. ఎలాంటి పరిస్థితులు ఉన్నాయో నిర్ణయించే అధికారం రాష్ట్ర ప్రభుత్వానికి లేదు. అయితే, రాష్ట్రంలో అసాధారణ పరిస్థితులు ఉన్నాయా లేదా అనే అంశాన్ని ఎస్ఈసీ.. రాష్ట్ర ప్రభుత్వాన్ని సంప్రదించి తెలుసుకోవచ్చు’’ అని హైకోర్టు ధర్మాసనం పేర్కొంది. అంటే, రాష్ట్రంలో ఎన్నికలు నిర్వహించాలా.. వద్దా అనే విషయం పూర్తిగా ఎస్ఈసీ పరిధిలోనేనని తేల్చి చెప్పింది. ఈ నేపథ్యంలో ఏపీ పంచాయతీ ఎన్నికల వ్యవహారంలో సైతం ఇదే తరహా తీర్పు వెలువడుతుందనే విశ్లేషణలు సాగుతున్నాయి.