Jr.Ntr Birthday Specials: అచ్చం ఎన్టీఆర్ ను చూస్తున్నట్టే ఉంది.. ఎవరబ్బాయి..? 1997లో గుణశేఖర్ దర్శకత్వంలో తెరకెక్కిన బాల రామాయణం సినిమాలో రాముడి పాత్రలో ఒదిగిపోయిన బాలుడ్ని చూసి సగటు సినీ ప్రేక్షకుల మదిలో మెదిలిన ప్రశ్న. అనేక సినిమాల్లో రాముడిగా సమ్మోహన రూపంతో తెలుగు ప్రేక్షకుల గుండెల్లో నిలిచిపోయిన నందమూరి తారకరామారావు మనవడే ఈ చిన్న రామయ్య అనుకున్నారు అభిమానులు, ప్రేక్షకులు. ఎన్టీఆర్ కుమారుడు హరికృష్ణ తనయుడు. తండ్రి పేరే కుమారుడికి పెట్టుకున్నారు. అతడే నందమూరి తారక రామారావు. తాత పోలికలే ఉండటంతో జూనియర్ ఎన్టీఆర్ గా పిలుచుకున్నారు. నిజానికి జూనియర్ ఎన్టీఆర్ జూనియర్ గా తాత ఎన్టీఆర్ దర్శకత్వంలో 1991లో వచ్చిన బ్రహ్మర్షి విశ్వామిత్రలో నటించాడు. సరిగ్గా పదేళ్లకే నందమూరి వంశం నుంచి వచ్చిన మిస్సైల్ గా 2001లో వెండితెరపై హీరోగా తెరంగేట్రం చేశాడు ఎన్టీఆర్.
రాముడిగా ఒదిగిన చిన్న రామయ్య..
నిజానికి దర్శకుడు గుణశేఖర్ చిన్న పిల్లలతో రామాయణం తెరకెక్కించాలని భావించడమే ఓ సవాల్. అందమైన కావ్యంగా ఆ సినిమాను తెరకెక్కించి ఆయన విజయం సాధిస్తే.. అందుకు రాముడిగా నటించిన ఎన్టీఆర్ తాతను మరిపించి సినిమాకు మరింత కళను అద్దారు. దీంతో నాటి లవకుశలో ఎన్టీఆర్ ను చూసిన అనుభూతినే ప్రేక్షకులు పొందారు. నందమూరి అభిమానులైతే చిన్న ఎన్టీఆర్ ను చూసి పులకించిపోయారు. నందమూరి వంశానికే బ్రాండ్ అయిన మైథలాజికల్ జోనర్ లో జూనియర్ ఎన్టీఆర్ ఎంట్రీ ఇవ్వడమే కాదు.. ప్రేక్షకుల్లో గుర్తింపు తెచ్చుకోవడం సగటు నందమూరి అభిమానికి ఎంతో సంతోషాన్నిచ్చింది. చిన్న వయసులోనే నటనపై ఉన్న స్పష్టతను చూపాడు జూనియర్ ఎన్టీఆర్. తాతతో పోలిక అనేది ఆ వయసుకి అర్ధమయినా కాకపోయినా.. తనలో ఉన్న నటననే రాముడిగా నటించి మెప్పించాడు.
నటనలో మేటి..
అటుపై.. పూర్తిస్థాయి హీరోగా ఎన్టీఆర్ తెరంగేట్రం 2001లో నిన్ను చూడాలని సినిమాతో ప్రారంభమైంది. నందమూరి వంశం నుంచి మూడో తరం హీరో తప్పితే.. అప్పటికి ఎన్టీఆర్ పై భారీ అంచనాలు, అభిమానుల ఆశలు వంటివి ఏమీ లేవు. కానీ.. తనలో ఉన్న నట వారసత్వంకి తోడు తన ప్రజ్ఞాపాటవాలు ఎన్టీఆర్ కు తెరపై కొత్తగా ఏమీ అనిపించలేదు. సినిమాలో ఎక్కడా కొత్తగా ఫీలయిన సన్నివేశం ఎన్టీఆర్ నుంచి కనపడదు. అంతకంటే చిన్న వయసులోనే రాముడిగా మెప్పించిన ఎన్టీఆర్ సామాజిక కథాంశంలో హీరో పాత్ర ఆయనకో కేక్ వాక్ లా అయిపోయింది. తెలుగు చిత్ర పరిశ్రమకు వచ్చిన కొత్త హీరోగా తన నటనతో మెప్పించి అతి తక్కువ కాలంలోనే నందమూరి అభిమానులకు, ప్రేక్షకులకు జూనియర్ ఎన్టీఆర్ గా చేరువయ్యాడు.