పేదోడి నాడి తెలిసిన డాక్టరు.. తండ్రికి తగ్గ తనయుడు.!

వైఎస్‌ రాజశేఖర్‌రెడ్డి.. ఉమ్మడి ఆంధ్రప్రదేశ్‌లో ఆరోగ్య శ్రీ పథకాన్ని ప్రవేశపెట్టిన ఘనుడు. అవును, ఆయన పేదోడి నాడి తెలిసిన డాక్టరు. వృత్తిపరంగా వైద్యుడైన రాజశేఖర్‌రెడ్డి, పెద్ద అనారోగ్యం సంభవిస్తే, పేదోడి పరిస్థితేంటో తెలుసు గనకనే, ముఖ్యమంత్రి అవుతూనే ఆరోగ్య శ్రీ పథకానికి శ్రీకారం చుట్టారు. అది అప్పట్లో పెను సంచలనం. అప్పటికీ ఇప్పటికీ.. దేశవ్యాప్తంగా ప్రపంచ వ్యాప్తంగా ఆరోగ్య శ్రీ పథకానికి ప్రశంసలు దక్కుతూనే వున్నాయి.

ఆ ఆరోగ్య శ్రీ పథకానికి మరింత మెరుగులు దిద్దారు వైఎస్‌ రాజశేఖర్‌రెడ్డి తనయుడు వైఎస్‌ జగన్‌ మోహన్‌రెడ్డి. నేటి నుంచి సరికొత్త ఆరోగ్య శ్రీ పథకం వైఎస్సార్‌ పేరుతోనే అందుబాటులోకి వచ్చింది. 2 వేలకు పైగా జబ్బులకు ఈ సరికొత్త ఆరోగ్య శ్రీ సరైన మందు కాబోతోంది. దాంతోపాటుగా, ఇప్పటివరకూ కేవలం తెల్ల రేషన్‌ కార్డు వున్నవారికే పరిమితమైన ఆరోగ్య శ్రీ పథకం. ఇకపై తెల్ల రేషన్‌ కార్డు లేనివారికి (వార్షికాదాయం 5 లక్షల లోపు వున్నవారికి) వర్తించనుంది. ప్రజారోగ్యానికి సంబంధించి ఇదొక సంచలన నిర్ణయంగా అభివర్ణించాల్సిందే.

ప్రస్తుత పరిస్థితుల్లో రోగి, తనకు వచ్చిన రోగంతో కాకుండా, ఆసుపత్రులు వేసే బిల్లుతో ప్రాణాలు కోల్పోవాల్సిన దుస్థితి. ఈ తరుణంలో, కొత్త ఆరోగ్య శ్రీ పథకం, పేదోడికే కాదు.. మధ్య తరగతి ప్రజానీకానికీ పెద్ద వరం కాబోతోందన్నది నిర్వివాదాంశం. క్యాన్సర్‌ వ్యాధికి సైతం సంపూర్ణమైన వైద్య చికిత్స అందిస్తామని ముఖ్యమంత్రి వైఎస్‌ జగన్‌ మోహన్‌ రెడ్డి, ఈ రోజు పశ్చిమగోదావరి జిల్లా పర్యటనలో వ్యాఖ్యానించడం గమనార్హం.

అంతే కాదు, వివిధ రకాలైన దీర్ఘకాలిక వ్యాధులతో మంచాన పడ్డవారికి పెన్షన్‌ తరహాలో ఆర్థిక సహాయం అందించడం, శస్త్ర చికిత్స అనంతరం కొద్ది రోజులపాటు మందులు ఇతర ఖర్చుల నిమిత్తం ఆర్థిక సాయం చేయడం.. ఇవన్నీ కొత్త ఆరోగ్య శ్రీ పథకంలో భాగం. అవును, రాజశేఖర్‌ రెడ్డి మాత్రమే కాదు.. ఆయన తనయుడు వైఎస్‌ జగన్‌ మోహన్‌ రెడ్డి కూడా పేదోడి నాడి తెలిసిన డాక్టరే.!