మహిళలు పారిశ్రామికంగా ఎదగాలి.. వారి చెంతకే వ్యాపారావకాశాలు: సీఎం జగన్

ఆర్ధికంగా వెనుకబడిన ఎస్సీ, ఎస్టీ, బీసీ, మైనార్టీ మహిళలను ఆదుకునేందుకు వైఎస్ జగన్ కొత్త పథకాన్ని ప్రవేశపెట్టారు. ‘వైఎస్సార్ చేయూత’ పేరుతో ఒక కొత్త పథకాన్ని ప్రవేశపెట్టారు. ఎస్సీ, ఎస్టీ, బీసీ, మైనార్టీ వర్గాల్లోని 45 ఏళ్ల వయసు దాటిన మహిళలంతా ఈ పథకానికి అర్హులు. ఈ పథకాన్ని తాడేపల్లిలోని సీఎం క్యాంపు కార్యాలయంలో సీఎం జగన్ మోహన్ రెడ్డి ఈ పథకాన్ని ప్రారంభించారు. ఈ సందర్భంగా సీఎం మాట్లాడుతూ..

‘పాదయాత్ర సమయంలో ఆర్ధికంగా ఇబ్బందులు పడుతున్న ఎటువంటి ఆసరా లేని మహిళల్ని, వారి బాధల్ని చూశాను. ఆ సమయంలోనే వీరిని ఆదుకోవడానికి ఏం చేయాలో అప్పట్లోనే ఆలోచించాను. 45 నుంచి 60 ఏళ్ల మధ్య ఉన్న మహిళలకు ప్రభుత్వం తరపున ఆదుకోవాలని నిర్ణయించాను ఏడాదికి వీరి ఒకొక్కరి ఖాతాల్లో రూ.18,750 జమ చేయాలని నిర్ణయం తీసుకున్నాను. ఈ మొత్తాన్ని బ్యాంకులు వారి పాత ఖాతాలకు జమ కాకుండా ఉండాలని కూడా ఆదేశాలు జారీ చేశాం. ఈ మొత్తంతో మహిళలు తమ కాళ్ల మీద తాము నిలబడేందుకు ఉపయోగపడుతుంది’.

‘నగదుతోపాటు వారికి రెండు పేజీల లేఖ కూడా వస్తుంది. వ్యాపారం చేసుకుని స్థిరపడేలా అవకాశాలను వారి వద్దకే చేర్చేలా ఏర్పాట్లు చేస్తాం. ఇది మా ప్రభుత్వ లక్ష్యం. ఇందుకు అనుగుణంగానే అమూల్, పీఅండజీ, రిలయన్స్ వంటి సంస్థలతో ఒప్పందాలు కూడ చేసుకున్నాం. ఈ సంస్థలతో మహిళలు నేరుగా స్పందించి వ్యాపారం కోసం ప్రయత్నాలు చేసుకోవచ్చు. ఈ పథకం గురించి నాపై విమర్శలు వచ్చినా పట్టించుకోలేదు’ అని సీఎం జగన్ అన్నారు.