జగన్ ది అతి విశ్వాసమా.. ఆత్మ విశ్వాసమా?

ఏ విషయంలోనైనా ఆత్మ విశ్వాసం ఉండొచ్చు. కానీ అతి విశ్వాసం పనికిరాదు. అతి విశ్వాసంతో ఒక్కోసారి బొక్కబోర్లా పడి తల బొప్పి కట్టించుకునే అవకాశం ఉంటుంది. వైఎస్సార్ సీపీ అధినేత వైఎస్ జగన్ మోహన్ రెడ్డి ప్రస్తుతం ఆత్మ విశ్వాసంతో ఉన్నారా లేక గత ఎన్నికల తరహాలోనే అతి విశ్వాసంతో ఉన్నారా అనేది తెలియడంలేదు. ఏపీలో ఎన్నికలు ముగిశాయి. గెలుపుపై ఎవరి లెక్కలు వారు వేసుకుంటున్నారు. క్షేత్ర స్థాయి పరిస్థితులు, పోలింగ్ సరళిని బట్టి వైఎస్సార్ సీపీ తమదే గెలుపు అని ధీమాగా ఉంది.

మరోవైపు ఈవీఎంల మొరాయింపు, ఈసీ వ్యవహార శైలిపై చంద్రబాబు ఆందోళన చేస్తుండటం కూడా వైఎస్సార్ సీపీ గెలుపు తమదేనని అంచనా వేసుకుంటోంది. పోలింగ్ తర్వాత సైలెంట్ అయిన చంద్రబాబు, టీడీపీ నేతలు మౌనం వీడారు. ఈసీపై యుద్ధం ప్రకటించి, ఢిల్లీ బాట పట్టారు. గెలుపు తమదేనని అంటున్నారు. సాయంత్రం వేళ మహిళలు, వృద్ధులు పెద్ద సంఖ్యలో బారులు తీరి ఓట్లేశారని.. అవన్నీ తెలుగుదేశానికేనని ఆ పార్టీ నేతలు ధీమాగా ఉన్నారు.

మరోవైపు వైఎస్సార్ సీపీ అధినేత జగన్ మాత్రం పోలింగ్ పూర్తి అయినప్పటి నుంచి చాలా సంయమనంతో ఉన్నారు. పోలింగ్ రోజు రాత్రి 8.30 గంటల సమయంలో మీడియాతో మాట్లాడిన ఆయన.. గెలుపు తమదేనని పేర్కొన్నారు. వైఎస్సార్ సీపీ భారీ మెజార్టీతో గెలవబోతోందని ధీమా వ్యక్తంచేశారు. ఇంతవరకు బాగానే ఉంది. తదుపరి జగన్ చర్యలు ఆయనలోని అతి విశ్వాసానికి నిదర్శనంగా ఉన్నాయి. ఈ చర్యల్లో ఆయన ప్రమేయం లేకపోయినప్పటికీ, జనాల్లో మాత్రం ప్రతికూల భావనలు కలుగుతున్నాయి.

ఈ ఎన్నికల్లో రాజకీయ వ్యూహాలు అందించేందుకు ప్రశాంత్ కిషోర్ అనే రాజకీయ సలహాదారును జగన్ నియమించుకున్న సంగతి తెలిసిందే. పోలింగ్ ముగిసిన నేపథ్యంలో ఆయన తన సిబ్బందితో సహా స్వస్థలానికి పయనమయ్యారు. ఈ నేపథ్యంలో వారికి వీడ్కోలు పలికేందుకు జగన్.. ప్రశాంత్ కిషోర్ కార్యాలయానికి వచ్చారు. ఈ సందర్భంగా అక్కడున్నవారంతా సీఎం.. సీఎం అంటూ నినాదాలు చేశారు. ఇందుకు జగన్ చిరునవ్వు నవ్వి ఊరుకున్నారు. తర్వాత ప్రశాంత్ కిషోర్ మాట్లాడుతూ.. ఏపీకి బెస్ట్ సీఎంగా ఉండాలని జగన్ కు సూచించారు.

ఈ సందర్భంగా జగన్ మాట్లాడుతూ.. 2024లో కూడా గెలుపే లక్ష్యంగా ముందుకెళ్లాలని అభిప్రాయపడ్డారు. ఇంకా ఏపీ అసెంబ్లీ ఫలితాలు విడుదల కాలేదు. అయినప్పటికీ, జగన్ ఏకంగా 2024 గురించి మాట్లాడారు. మరోవైపు ‘వైఎస్ జగన్ మోహన్ రెడ్డి, గౌరవనీయ ఆంధ్రప్రదేశ్ ముఖ్యమంత్రి’ అని తయారుచేయించిన నేమ్ ప్లేట్ సోషల్ మీడియాలో చక్కెర్లు కొడుతోంది. అభిమానులు ఎవరో అత్యుత్సాహంతో తయారుచేయించిన ఆ నేమ్ ప్లేట్ ఫొటో సోషల్ మీడియాలో రావడంతో ప్రత్యర్థి వర్గాలు విరుచుకుపడుతున్నాయి. ఇంకా ఫలితాలు వెలువడక ముందే ఇదేం చోద్యమని విమర్శలు గుప్పిస్తున్నాయి.

గత ఎన్నికల్లో కూడా అతి విశ్వాసంతోనే జగన్ దెబ్బ తిన్నారని గుర్తుచేస్తున్నాయి. 2014లో గెలుపు తమదేనని గుడ్డి నమ్మకం పెట్టుకున్న జగన్.. మిగిలిన విషయాలు అంతగా పట్టించుకోలేదు. అప్పటివరకు జగన్ వైపు ఉన్న వేవ్ కాస్తా చివరి రెండు నెలల్లో ఒక్కసారిగా చంద్రబాబుకు అనుకూలంగా మారిపోయింది. అది గమనించని జగన్.. విజయం తమదేనని ధీమాతో ఉండి భంగపడ్డారు. ఈసారి పోల్ మేనేజ్ మెంట్ వంటి వాటిలో పూర్తిగా విజయం సాధించిన ఆయన.. మరోసారి అతి విశ్వాసం కనబర్చకుండా మామూలుగా ఉంటే బాగుంటుందని విశ్లేషకులు అభిప్రాయపడుతున్నారు. ఫలితాలు వెలువడే వరకు సంయమనంతో తెలివిగా వ్యవహరించాలని సూచిస్తున్నారు.