ప్రముఖ సినీ జర్నలిస్టు, ‘సంతోషం’ సినీ పత్రిక అధినేత, సినీ నిర్మాత కూడా అయిన సురేష్ కొండేటి వ్యవహారం ప్రతిసారీ సినీ పరిశ్రమలో కలకలం రేపుతూనే వుంది. కొన్నాళ్ళ క్రితం ఓ హీరోయిన్ పుట్టుమచ్చల గురించి ప్రెస్ మీట్లో ప్రస్తావించి.. పెను వివాదానికి కారణమయ్యాడు.
పలువురు సినీ ప్రముఖులు, ప్రెస్ మీట్లలో సురేష్ కొండేటి మీద సెటైర్లు వేయడం, వాటిని సురేష్ కొండేటి లైట్ తీసుకోవడం తెలిసిన విషయాలే. ప్రతి యేడాదీ సంతోషం సినీ అవార్డ్స్ కార్యక్రమాన్ని సురేష్ కొండేటి నిర్వహిస్తుంటాడు. అత్యంత ప్రతిష్టాత్మకంగా వీటిని ఆయన నిర్వహిస్తుండడం తెలిసిన విషయమే.
అయితే, ఈ ఏడాది నిర్వహించిన అవార్డుల ప్రధానోత్సవం ఒకింత గందరగోళానికి కారణమైంది. తెలుగు సినిమా పరువు తీశాడంటూ విమర్శలు రావడంతో, దీనిపై ప్రముఖ నిర్మాత అల్లు అరవింద్ కూడా స్పందించారు. మెగా పీఆర్వో.. అనే ట్యాగ్ అతను వినియోగించడంపైనా అరవింద్ కీలక వ్యాఖ్యలు చేశారు.
ఈ వివాదం అనంతరం, సురేష్ కొండేటిని కొన్నాళ్ళపాటు ప్రెస్ మీట్లకు దూరంగా వుంచేలా తెలుగు సినీ జర్నలిస్టుల అసోసియేషన్ నిర్ణయం తీసుకున్నట్లు, సంబంధిత వాట్సాప్ గ్రూప్లో ఓ పోస్ట్ హల్చల్ చేసింది. దాంతో, సినీ జర్నలిస్టుల్లో చాలామంది ముక్కున వేలేసుకున్నారు.
తనను ఎవరూ బ్యాన్ చేయలేదనీ, డివోషనల్ టూర్లో వున్న తాను, ఆ టూర్ నుంచి తిరిగొచ్చాక యధాతథంగా ప్రెస్ మీట్లలో పాల్గొంటానంటూ సురేష్ కొండేటి సోషల్ మీడియా ద్వారా స్పష్టతనివ్వడంతో వివాదం కొత్త మలుపు తిరిగింది. బ్యాన్ చేశారా.? లేదా.? అన్నదానిపై సినీ వర్గాల్లోనూ జోరుగా చర్చ సాగింది.
కేవలం పీఆర్వోలు మాత్రమే, సురేష్ కొండేటిని బ్యాన్ చేయాలని నిర్ణయించారనీ, తెలుగు సినీ జర్నలిస్టుల యూనియన్ తరఫున ఎలాంటి బ్యాన్ లేదని ఇంకో వాదన తెరపైకొచ్చింది. ఫిలిం క్రిటిక్స్ అసోసియేషన్ ప్రధాన కార్యదర్శి లక్ష్మినారాయణ ఈ మేరకు ఓ వివరణాత్మక మెసేజ్ వాట్సాప్ ద్వారా పోస్ట్ చేశారు.
కాగా, ప్రెస్ మీట్స్ టైమింగ్స్ సహా పలు అంశాలపై తెలుగు సినీ జర్నలిస్టుల యూనియన్లో చర్చ జరిగింది. ఆ వివరాలన్నీ ఇప్పుడు వెబ్, మెయిన్స్ట్రీమ్ మీడియాలో చర్చకు కారణమవుతున్నాయి.
ఇంతకీ, సురేష్ కొండేటిని బ్యాన్ చేసినట్టా.? కాదా.? ఎవరి వెర్షన్ వారిది. సినీ జర్నలిస్టుల్లోనూ చాలామందికి సురేష్ కొండేటి అంటే గిట్టని పరిస్థితి వుంది. అదే ఈ గందరగోళానికి కారణమని చెప్పొచ్చేమో. మరోపక్క, పలువురు ఇతర సినీ జర్నలిస్టుల మీదా వివిధ కారణాలతో సాటి జర్నలిస్టుల్లో అభ్యంతరాలు వ్యక్తమవుతూ వస్తుండడం కొత్తేమీ కాదు.!