జస్ట్ ఆస్కింగ్: ఆంధ్రప్రదేశ్ రాష్ట్ర ఆదాయమెలా పెరుగుతుంది.?

ఓ వైపు అప్పుల కోసం పరుగులు.. ఇంకో వైపు రాష్ట్ర ఆదాయాన్ని పెంచేందుకు తంటాలూ.. వెరసి, ఆంధ్రప్రదేశ్ రాష్ట్ర ఆర్థిక పరిస్థితిపై గందరగోళం ఎప్పటికప్పుడు మరింత పెరుగుతూనే వుంది. విభజన కారణంగా ఆంధ్రప్రదేశ్ రాష్ట్రం నష్టపోయిందన్నది నిర్వివాదాంశం. కానీ, ఇంకా ఎన్నేళ్ళు అదే పాత పాట పాడుకుంటూ బాధ్యతల్ని విస్మరిస్తామన్న కనీసపాటి సోయ లేకుండా పోతోంది అధికారంలో వున్నవారికి.

రాష్ట్ర ఆదాయం పెరగాలంటే, రాష్ట్రంలో అభివృద్ధి జరగాలి. పొరుగు రాష్ట్రాలతో పోల్చితే పెట్రో ధరలు ఆంధ్రప్రదేశ్‌లో ఎక్కువ.. రాష్ట్రంలో రోడ్ల పరిస్థితి అధ్వాన్నం.. పూర్తి చేయాల్సిన ప్రాజెక్టులేవీ సకాలంలో పూర్తవడంలేదు. చెప్పుకుంటూ పోతే సమస్యలు చాలానే. సంక్షేమం పేరుతో, రాష్ట్రం నెత్తిన అప్పుల భారాన్ని మోపేస్తున్నారు.

ఇలాంటి పరిస్థితుల్లో రాష్ట్ర ఆదాయం పెరగడానికి వున్న స్పష్టమైన మార్గాల్ని విస్మరిస్తుండడమే అందర్నీ విస్మయానికి గురిచేస్తోంది. రాష్ట్రానికి సరైన రాజధాని వుంటే, ఆ రాజధాని నుంచి రాష్ట్రానికి ఆదాయం పెరగడం అనేది జరుగుతుంది. కానీ, ఎనిమిదేళ్ళుగా రాజధాని విషయమై గందరగోళం కొనసాగుతూనే వుంది. ఇదెక్కడి వింత.?

చంద్రబాబు హయాంలో అమరావతి ఆంధ్రప్రదేశ్ రాజధాని అయ్యింది. అబ్బే, ఒక్క రాజధాని సరిపోదు.. మూడు రాజధానులు కావాలంటూ, దాదాపు మూడేళ్ళపాటు కాలయాపన చేసింది వైఎస్ జగన్ సర్కారు. రాజధాని విషయంలో ఇంతటి గందరగోళ వైఖరి, రాష్ట్రానికి శాపం. ఈ విషయమై ఇంకా రాష్ట్ర ప్రభుత్వం వాస్తవ పరిస్థితుల్ని తెలుసుకోలేకపోవడం శోచనీయం.

ఆదాయం పెరగాలంటే, ఆస్తులు అమ్మేసుకోవాలన్నట్టుంది పరిస్థిది. దాన్ని ఆదాయం పెంచుకునే మార్గమని అనగలమా.? పన్నులు పెంచినా అది ఆదాయాన్ని పెంచుకునే మార్గమే అవుతుంది. కానీ, తద్వారా దోపిడీకి గురయ్యేది ప్రజలే కదా. అది అభివృద్ధి ఎలా అవుతుంది.?

పోలవరం ప్రాజెక్టు పూర్తి చేసుకుని, స్టీలు ప్లాంటు, పోర్టు వంటి వాటిని రప్పించుకుని, రాష్ట్రంలో పారిశ్రామికాభివృద్ధిని పెంచుకుంటే అదీ అసలు సిసలు అభివృద్ధి. కానీ, ఆ సోయ అధికారంలో వున్నవారికి ఎప్పుడొస్తుందో ఏమో.!